分享【極短篇小說】一段聲音的自我紹介 (附朗讀)

【極短篇小說】一段聲音的自我紹介 /胡長松 雖然我干焦是一段聲音，毋過我今宣告我復活矣。現此時，我，存在佇你的目睭佮耳孔所開始的活動；我已經成做你的聲音，續落，會成做你心肝頭尚深的所在的一个特別的畫面……比如講，這馬，凡勢是你的愛人仔第一擺tsim佇你的嘴的畫面，佇海邊、山埔抑是啥物所在，日時抑是暗暝，凡勢伊ti-ti-tuh-tuh躊躇真久，嘛凡勢伊一句話講無一半就雄雄共伊芳貢貢的嘴唇tshînn倚來，貼佇你猶袂準備好的嘴唇，伊雄狂的呼吸共你的頭毛吹亂去…… 事實上，我愛共你說多謝。佇你讀我晉前，我是空虛的，就親像頭拄才你心內浮現的畫面，佇你讀我晉前嘛已經死去仝款──彼是因為我（對你來講真生份的我）才恢復伊的元氣，予伊閣一遍得著你的生命中伊該當得著的地位，予伊閣活過來。所以，你嘛愛共我說多謝毋才著──按呢，你對我敢有較熟似矣？你敢會使同意，咱事實是互相倚靠的？ 無法度？哈哈…