小城綾子 的部落格 -- 九月 2011 封存 (1)

     十月拄過，規個永康鄉親像崁佇鼎底的磅米芳，嗶嗶啵啵位街頭磅到巷尾，閣再位巷尾磅轉來到街頭。

    這幾輪的轟炸，將永康的天頂炸甲金光閃閃瑞氣千條。鄉民見著面，笑甲嘴仔裂獅獅，表情卻是十分的曖昧，相拄嘴窸窸窣窣：「阮這條巷仔昨暝二號嘛來過矣！佮一號同款，一票二千箍；阿恁咧？」

     ˙

    早起八點，水雲已經佇客廳偎大門的壁邊認真咧踏針車。

    收音機內底電台主持人用親切甲予人規粒心肝強欲溶去的聲音，介紹比仙丹閣較好用的妙藥：

「怹少年的佇外口拍拚事業，咱老大人佇厝內身體嘛著愛家己顧……，這味是用誠濟高貴藥材煉成的，治高血壓、糖尿病、肝病…攏真有效……」

「骨刺免開刀，無效毋免錢！這罐藥仔給食落去，三工，阿伯阿姆啊聽斟酌嘿，三工就看會出效果，免外久拐仔做你給撣掉無要緊…」

    「敢有影遐好用？」水雲伸手捶幾下仔尻川頭，心肝有淡薄仔撓。長期坐咧車衫，腰脊骨不時痠痛甲真厲害，若真正有效……

   …