王立信的部落格 (116)
信仰詩【2】盟感耶穌恩典
史筆春秋遠
凌音空谷迴
前塵談不堪
回首拾淚斑
今聞鞭十架
仁義鮮血紅
硬心得感化
罪重替我扛
羔羊白如雪
杯餅常紀念
雲火石磐水
嗎哪滋味真
聖言錄啟示
霞光鑰天開
喜樂平安賜
棚敗倘期待
福音傳地極
天使奏琴瑟
徛立審判台
天父笑阮知
由王立信於2009 十月 8 11:29am添加 — 無評論
信仰詩【1】保羅遇大光
認可尊貴 法利賽血統
一等特權 羅馬公民身分
迦瑪列學說首席得意門生
傲鶴立雞群 睥睨掃群英
拼實績 主義驗證
榮譽惦大腦平衡
一夫當關 親身踐行
血氣衝冠 逼迫操演
風發意志 異端何處脫逃
難得辯才與我爭鋒
全身完膚引退
論口舌利劍
點石成金流派學識
連門佗沒 想欲班門弄斧
前程燦爛錦繡
垂手功名在我
啥貨！ 死後三日閣活
旦坐上帝大傍
太好笑 聖神降落逐人內心！
明明三歲孩童思想
全全漁夫 木匠 税吏
探馬報說
前去大馬色洞口暗影活動
註你末日該到 手握密令
連星趕日 黃土揚灰
轉眼；雲中射出金光
一道光 是光 極亮大光 啊。
仆倒 平靜 安息
彼道光開啟暗房閉鎖
彼道光極其溫柔叫阮
保羅 保羅 。
風颱眼
用旋箍的款式跨跤步
佇啜飲 情傷了後
狠霸心的悻眼。
閣較濟兮沙包也塞袂牢
潰堤的珠淚滴流。
莫問我兮名字
抑免肖想欲究竟探底
窺探我 懟旦善變的心。
沒張弛
瞪你即個 天旋地轉
冷笑你即個 衛星噷相定位。
掠準全宇宙 通緝鎖定
千山阮獨往
乘風踏湧而來...。
甘拜的；
加添寡清水作酒 含著泡麵
點上蠟燭 近倚膜拜。
起風兮時 念我名號
等待我 歡喜暢快彼當陣
送恁即個 秋高氣爽
外加乘長風 狂濤湧兮心適興。
一群加勒比海 蝴蝶的翅股
佗倘積聚 煽動我孤獨的存在。
請看觅 看我來兮進前
天邊的虹彩
淡薄 聊聊仔表示
聽候 苦害後的悲哀…。
由王立信於2009 十月 6 11:00pm添加 — 無評論
關於查甫人
怎樣愈袂妒忌呢
查某人啊！
母性的認識
查甫人；
只是潛在的嬰仔爾爾
佇成熟的外在
嗎掩崁袂牢
情慾的目睭孔
佇悠遊彼款
邪思的放縱了後
佗沒纏沒當
學貓形兮款勢；
縱轉去阿母吸乳兮時的胸坎
來閃避假無意
歸下無辜的面龐…。
由王立信於2009 十月 6 10:00pm添加 — 無評論
阿母講；古早古早.土豆毋免炒
阿爸兮神祇牌
囥佇紅格桌頂
作忌抑係二九冥
兄弟攏倒來圍爐。
阿母 飽足乳水
所生兮囝仔
有兮才調 有兮怯勢
總是 隨人去展現
有時星較光 有時月較圓
阿母講；有孝沒在佇言語
心意食水甜。
時間兮土石流 淹東溢西
阿爸兮神祇牌仔 浮浮沉沉
阿兄含小弟惦遐 諍來諍去
笑破厝邊頭尾兮褲底。
佳哉 阮係阿母撿飼矣
阿母飽足乳水 滿溢
並無增差 缺欠阮即個
厝內阮無算外人抑家己
紙頭紙尾無名
顛倒較清心快意。
聽儂講；素人是無畫妝
沒負擔 嗎免夯香缀拜
阮知 神祇牌係過去代
有孝阿母較實在。
阿母講；恁兄弟免相爭
前古早 拍虎掠賊親兄弟
才調 怯勢… 繼續
由王立信於2009 十月 6 9:30pm添加 — 無評論
俺某兮喙
俺某兮喙
龍眼蜜
阮澹即滴
墓仔埔亦敢去
俺某兮喙
灶腳刀
阮是七月半鴨仔
予刣及流血水
俺某兮喙
破銅鑼
若嘸斟足聽
目睭皮佗挫咧等
俺某兮喙
畫圖筆
伊凊彩佐佐撇撇咧
阮佗欣賞幾偌日
俺某兮喙
唸是愛阮好
聽某喙 大富貴
沒酒嗎天天醉！
俺某兮喙
三步珠淚
唉!老尪公婆仔矣
若沒相疼 是欲擱按怎
由王立信於2009 十月 4 8:30pm添加 — 無評論
楓仔；汝是秋天兮女神維納斯
楓仔；
係浸過歸冬 秋天兮甕
較贏葡萄 搖泏閃光兮玫瑰紅
悚一下目尾 看佗醉啊
葉仔青翠到鮮紅 透金黃兮色緻
予儂忌妒 伊爪兮型體 媠啦
像 少女飄飄 振動兮角花仔裙
若 老翁公婆仔公園散步兮背影
唉呀！則知創造者遮呢愛滾笑
伊 浪漫 秩序 狂野 溫純
秋；思戀楓仔 楓仔戀慕秋
怎樣剝離 吟欸 畵欸 唱欸
攏袂倘表示啦 加講矣！
詩人醉兮心湧總是當等霜涼
飄飄落葉兮季節 眼即下 停格
賞楓仔 的確著有武士切腹兮氣概才倘呢！
賞楓仔 的確愛有 前無古人………
念天地之幽幽 獨愴然而淚下兮悲意
楓仔；汝是秋天兮女神維納斯
秋 汝是付出啥代價；
則得到楓仔遮尼媠兮嫁妝。
信心兮身影
彼日透早 阿爸佮阮相同行
伊講欲獻燔祭 佇摩利亞兮山頂遐
三日續連行 伊行阮隨 心貼心。
日頭緊過 星光暗夜照著阿爸堅定兮身影
霎那 想著阿爸佮阮兮感情
佗親像伊對耶和華兮尊敬
耶和華若叫聲 伊應阮佇這
伊教阮就行。
一路上 耶和華兮恩典講袂煞
伊兮眼神看阮 甜蜜閣滿足 嘸甘閣疼惜
阿爸輕聲講 若準天星變鑽石 石頭換瑪瑙
囝啊!汝係阿爸寶貝仔心肝兮全部
伊閣講 上帝無棄嫌 早前兮亞伯蘭
按怎離開本族本家 謙卑順服 奉獻上好
求上帝 救羅德 起祭壇 接待天使
無撓疑 百歲得孝生 受祝福 承接萬邦萬族
夠山跤 看山頂 阿爸兮目睭轉神聖
阿爸!阮開聲 伊應我! 以撒阿囝 我佇遮
兩儂燒烙兮心肝 靠相偎
阿爸!柴及火把攏佇遮 獻祭羊羔佇搭落
免煩惱 耶和華兮山頂有備辦
阿爸頭前行 伊堅定兮背影… 繼續
由王立信於2009 十月 2 10:18pm添加 — 無評論
扦第一粒石頭
指指拄拄
極力清算所有兮沖犯
經學士飽滿兮屈勢
用律法來論斷
倫常 道德 教規
挨挨狹狹 攬攬摻摻
逼汝到袂堪得兮坑坎
嘿！敢著干旦為著彼粒
沾沾刺刺兮幼沙
卡佇伊兮目睭仁 看甲目空赤赤赤
汝腹內煞像衝煙灼火兮煙筒
敢知影 長長兮大箍杉
拄好橫柴卡佇家己目墘兮灶孔
毒蛇兮種類呀！
儂入天國親像駱駝穿過兮針孔
抑較簡單。
註：人時常偽裝清氣來分別做聖，
定別人兮罪閣面皮結厚厚，扦
出第一粒石頭來證明家己替天
行道。無拍算咱的主煞毋係按呢
，耶穌是疼惜人責備罪，親像日
頭照著人內心的污穢，上時嘛帶
來殺菌閣溫暖兮光線呢！
由王立信於2009 十月 2 10:00pm添加 — 無評論
嘴唇內兮舌
頑孽兮時 天雷 地火 閃熠
柔順兮時 涼風 冷泉 虹天
伊 是心靈殿院武士腰下雙鋒兮利劍
身軀懷著光明及烏暗兮鎖匙
歷史是伏拜兮溪流 向汝
伊 不時徘徊 徘徊佇子午線頂
良善及罪惡佇汝雙旁 搖來擺去
汝是玆班來來回回 袂停兮捷運車
發動著瞬間兮意念
汝若是 王頭壳頂謙遜兮冕旒
阮願是彼粒上細粒兮珍珠 至少
珍珠是屬佇高貴兮血統
若準汝妖嬌兮媚眼 如蛇
勾引著豺狼兮身軀 跳舞
阮決斷欲親像弓箭 離汝
遠 遠 遠………
天頂兮阿爸父 萬權能兮上帝
求汝用燒炭鮮血兮紅
擦掉阮牙槽裡垃散兮嘴舌
佮阮三分鐘熱度兮意志
免得終其尾
攑柴添火灼 將阮放火燒
囥佇地獄兮火爐
若無 賜阮恬靜 永遠袂出聲
予單單注目汝兮眼神 誠實
免得流落街頭… 繼續
由王立信於2009 十月 2 9:30pm添加 — 無評論
詩兮誕生
昨日兮阮
不減閒時詩興
寐求自娛之作
若 金色錦鯉之不可得
今日兮阮
輾轉失眠
難耐粼光片羽之姿
蒐揣 艷影 芳蹤
明日兮阮
淡薄勾勒出 蜿蜒 婀娜
佇浮藻 礁石 之間
穿梭 恩愛 纏綿
亦臆出伊人暗自傷悲緣由
仝款兮阮
猶原邊幅不修 哀吟
濟濟兮阮
拭寫.空思.嗟嘆.字紙簍
濕澹兮目墘 留互這馬
予家己含孤獨 捧杯對飲
準係 錦鯉干旦一般色緻
著急搶鮮兮汝
網頂泡茶 閒來遮坐……。
門外哀歌
叩門兮阮
映望像門內 汝兮溫柔。
若汝愈倘觀透 門外
心晟 孤寂兮儂影。
狹入門內兮阮
果然熟練 親和請安兮扮勢
自本底；
慣勢時常迎受兮習練
嗎算 刁持虛情兮手路
另外即個「阮 」
猶原佇扣門及毋扣兮崁站
躊躇失意 消瘦元氣。
舒適兮「汝」
輕鬆萬利 行禮如儀
敢愈記得 彼當陣
緊緊掠住起初 搵予
冰冷兮手溫 予伊燒烙。
若準 貼心眼神 熱情兮手骨
亦著閣按算 龍交龍 鳳交鳳
閣刁意故 假做 咦咦唔唔兮說客
凊采狡辯講 無彼款代誌
抑若夯目頭諸個；
係欲安怎閣講起。
備註：「阮 」：仝遭遇兮儂。夯目頭：高姿態
「汝」：第二人稱兮阮。
方便之「道」
上 原始喊喝
上 原創象形
濟濟 圖騰記認
霎那間成就了永遠。
即陣；極不極
沒「解放」，
較慘死兮真理。
勿免文明去闡明,
勿免歷史演進來插手…。
道者;通道也。
自然而然發生。
化生；神有機性的理則。
若像人；蹲缸、坐化、入定
若像人；神遊、頓悟、涅槃。
道道道；非常道 。
太初有道；
「老子」亦急兮道理。
「可口可樂」廣告詞講;
暢快呀………。
假借脫肛而出兮；
清氣癖來譏刺，
儂嘴唇皮兮污穢。
「嗯嗯」！阿爹喂！阿娘喂！
腫頷.突目.浮筋.
使盡喟力；通譯翻出……
上帝啊！祢美意原係安尼。
註：「老子」北京語此位係指家己
註：看倌.恁甘知秘結兮艱苦，
無恁叫是我咧寫通關達竅.
得道升天兮代誌喔。
由王立信於2009 九月 26 4:00pm添加 — 無評論
哲思反芻
遠遠漸明兮行影
是伊!
毋是伊!
是伊；嗎若沒親像是伊!
是伊，嗎毋是講毋是伊!
請問汝；到底是伊抑不是?
汝看；溪底泅兮魚仔誠快樂!
抑汝亦唔是魚仔，怎知伊泅 誠快樂!
汝嗎毋是我；若知阮毋知魚仔泅 誠快樂!
伊手 指著天邊兮月娘講月娘圓
阮是 看伊手指頭仔指向天邊
伊咧講月娘
阮咧講伊指兮手指頭仔
安尼辨證；吃愈飽嗎愈袂消化。
兩人置風頭旗竿跤咧答嘴鼓
汝看；旗仔咧動!
唔對；是風咧透!
是旗仔先動則證明有風塊咧透!
嗯！抑風若沒先透旗仔安怎嗎拽袂振動。
詩若欲按呢寫；永遠佗寫袂煞矣…。
我沒騙汝!
總袂用兮佇厝
無代無誌 閒仙仙，
脫腹裼，
偆一領短褲節仔
佗作一首詩吧…。
由王立信於2009 九月 26 4:00pm添加 — 無評論
無言之歌
毋願閣夯筆更試此段酸甘閣蜜甜兮過去,先輩再會;敬疼兮顏牧師及可愛兮牧師娘。寫毋寫無言之歌嗎沒啥增差抑啦;仝款兮結語爾爾。此站阮亦深刻覺悟乞求救贖兮人性軟弱兮模樣.此界汝決意別離.幾落擺心情五味雜濫,肖想日子唯頭閣開始;比較昔前約束講欲逗陣夠路尾兮心志;前夠旦咧……。沒疑誤映望兮出帆煞駛入袂轉舵兮湍流暗溝,留阮失落信仰兮倚靠.孤獨滋味尤其像今夜飄搖兮風雨冥.濕澹濕澹兮街路。豈采偆回味汝傳播兮聖言佮詩歌遮呢鮮明兮音聲,豈采猶原牽掛汝曾經釘根欲致意兮代誌.猶惦腦海裡咧拍箍.這陣亦雲淡風清抑啦。應該嗎著漸漸放捨遮兮籌謀及牽礙則對.亦隨在愁諸浮動.像來來去去兮海湧.拍岸夠伊恬靜煞去。指頭仔扼扼咧,拄好按算佇金針花遍野滿山兮節期,正式汝欲行前面綠色青翠兮魂夢境緻.諸個攏總;得確愛灌滿即寡仔勇氣兮風帆去迎旨啊.莫得閣越頭.毋甘已經行過吵嘈兮笑聲.親像眾醉茶香,率性親和兮日子.不爾過是擴大心兮胸脥,去開疆拓土排列陣勢;為主爭戰好兮爭戰爾爾.上時嗎為潤澤苦難兮台灣母親這遍土地.去認真拍拼涵養伊兮肥土啊!肯定是阮大家沒夠額兮福氣來聽趁汝有所不為.徛在兮調直硬氣.及聽趁接序欲… 繼續
由王立信於2009 九月 26 4:00pm添加 — 無評論
顏信星台語文學選集讀感
身外單薄 掩不住清風般兮滄桑
輕輕飄過臉頂矣.刻出一冬一冬堅定記號
無情環境有情兮天
順風滿帆兮心靈迴唱著 飽飽的兮歌詩
平安喜樂滿心田 佇地像佇天
雖然行過有「海」、有「佃」兮酸甘甜
目屎中兮珍珠光采有芳味
大海寶藏係為著撒網來豐富
田園著儂耕作則愈釘根
寶貴的珍珠啊！
的確著好好珍惜.則袂失落
想當初.三輪車伕兮時陣
佮鄉土兮愛情.暗暗定落兮姻緣
佗佇月娘樹跤.夠旦猶原數念
數念著攑頭映天兮誓願
阮兮初戀佗惦置
阿爸及阿母生我兮所在.哈瑪星
遐有舢板.海鳥 .大海湧
含細漢辦家伙兮囝仔伴攏總兮記智
大海湧雄雄拍佇渡船頭兮海岸頂. 一湧一湧
海鳥亦不時呼應著阮.心內兮大海湧
一聲一聲佇心靈深處咧喉叫
啊！ 這是血及汗滲著吞落的目屎作伙大漢兮所在
疼惜啊！… 繼續
由王立信於2009 九月 26 3:30pm添加 — 無評論
簡單自我紹介
阮是芋葉蕃薯心第一代兮臺灣儂.九年教育窮欲讀袂透.手面趁食30
冬.育2女。18冬前信耶穌.現部是長老教會執事.接觸台語詩兮緣由是阮教會前任牧師顏信星兮鼓勵.伊任內設立羅雅教會網站.伊詩.文.詞曲.攏充分表明懟臺灣玆塊土地兮疼.伊亦激勵阮會友大家盡量寫.寫予出味。可惜網站3冬前綴著伊去屛東九如上任煞來結束.阮嗎停止拄則孵芽兮文字習練.佳哉教會幹事提一本台文戰線予阮看〈原來是寄予顏牧師的〉。安尼煞引起阮佇網路蒐找台文戰線兮蹤影.果然予阮揣著。
歸尾來講.敝人才疏學淺.干旦寫寡生活感懷而已.學術性兮物件阮攏沒半撇啦。前仔佇羅雅網站有寫寡.唔閣驚儂笑.唔敢捧出來現世.玆回沒意中知影. 台文戰線聯盟有可能受稿.則沒惜面底皮投石問路.佇遮亦感謝長松兄三言兩語春風般兮鼓勵。嘸管安怎.台文玆遍田園係值得耕作做伙拍拼矣。小弟立信亦意願佇諸位先進教導下.勇敢踏進前.嘸閣想倒轉來.阮玆咧食老則塊出僻兮儂所捧出來兮物件.敢愈看口哩.阮嗎嘸知影？敢袂笑破儂兮喙.總是祈望諸位先進海涵多多.感謝。
佇遮順祝台文戰線聯盟諸位勇士朋友安平.建康.快樂。
由王立信於2009 九月 22 2:00pm添加 — 無評論
無通徛高山
台灣人的心聲 阮逐工攏致意
嗑瓜子 看電視 遐是下班了後的代誌
嗯！ 浸嘛的天頂是有卡清氣 黑陰落雨有冬時
想起威權五十年 古物商的政府孤門閣獨市
戒嚴雞毛當令箭 戴帽仔盧鰻吃芭樂放槍子
二二八及美麗島只是鳥啪仔試手氣
親像乞丐趕廟公 嘴念阿彌陀 手夯剃頭刀
白色的統治 黑金政商勾結的代議 膨風的經濟貧富透拄天
貪官污吏滿滿是 國庫財庫通黨庫 親像灶神鎮灶空
撈百姓 飼政府 阮是吃昧肥嘛餓昧死
一塊一塊的大餅 親像天邊的月娘 放置八月十五的暗瞑
一盤一盤臭酸的牛肉冷支支 連退冰都猶退昧離
立法院的大哥甲大姐 冤家娘債 摔椅擋桌
掀肚擠 玩三p 申請有專利
上扣應 抹粉點胭脂 佇攝影鏡頭前 逐日咧拼生死
欲哮欲笑隨在伊 人古早是教忠教孝 因是教姦閣教哭
悲哀的選民 菜市仔腦智 一千五百 佗將民主一賣五十年
海外黑名單 台灣魂… 繼續
由王立信於2009 九月 21 8:24pm添加 — 無評論
