張愛玲窗外的奢華上海

[黃靜惠]

張愛玲窗外的奢華上海

　　今仔日的世界非常多元，有人講芳就有人講臭，有人佮意就有人嫌甲無一塊著，有人贊成就有人反對。真歹講啥物是主流，啥物是前衛。明明昨昏已經無流行的想法，今仔日可能隨變做時行的元素，嘛有可能今仔日上風騷的物件，明仔載煞變成無人欲挃的糞埽，這馬的文壇差不多嘛是按呢。

　　毋過，檢采美麗的景致，看過的人自然就會共伊保留佇記持的相簿內底，有可能是烏白反黃的老相片，嘛有可能是畫質清楚的彩色相片。就親像，只要是好文章就有伊存在的地位價值佮影響力。

　　像張愛玲佇上海拄仔衝紅的時陣，就有人批評伊只不過是提舊的小說，濫一寡西洋的寫作技巧爾爾；嘛有人講伊是受著祖公仔是清朝大官的致蔭，閣笑伊貴族的血統有若無咧，是遠遠遠的親情關係，就若親像共一隻死雞僆仔，擲入去黃浦江裡，就講全上海的人攏啉著雞湯仝款。

    毋過，這馬若講著張愛玲就予人想著上海，若是佇上海就會予人想著張愛玲，鬧熱滾滾的上海因為伊加加添一份文學氣質。女作家章緣講雖罔伊毋是正港對張愛玲足迷戀的，毋過伊佇上海過著奢華生活的時陣，嘛是有時仔會想起張愛玲，無法度因為這是伊的城市。

　　章緣講佇別个所在奢華代表浪費，是好額人囂俳聳鬚的行為。毋過佇上海，奢華這个詞無歹意，是一種對生活品味的呵咾，是會當用一屑屑錢就會使享受上頂級的上海都市生活的意思。譬論講，新臺票八十箍，就會使買著一盆比人閣較懸的四季桂、一盆半人懸的石榴佮兩箱日頭花和日日春；抑是請人來厝裡摒掃，四十外坪的公寓，一禮拜三改嘛才新臺票三十外箍爾爾。連作家木心佇〈上海賦〉裡，嘛講對上海人來講「合算」是非常重要的事情呢。這是兩千空七年奢華的上海生活。彼當時，就準講佇咱臺灣庄跤，這嘛是無可能發生的代誌。

　　就按呢，佇一个立秋的下晝時，蟬仔叫袂停，伊行過規排的梧桐樹的街仔路，看著跔佇樹跤修理跤踏車的查埔人，褪腹裼歇涼的老人，來買蔥仔餅的查某囡仔，一个無聊到哈唏流目油的下晡，予伊想起上海女作家張愛玲。後來，伊閣真正走去看張愛玲蹛過的常德公寓，閣差一點就共五樓一間套房買落來，變做張愛玲的厝邊。毋過，愛都愛，天公伯仔就毋安排，終其尾厝頭家無欲賣，害伊一場美夢無法度實現。

　　章緣想欲買的套房佇五樓，樓頂真拄好就是張愛玲蹛過的公寓。胡蘭成第一改去遐拜訪張愛玲，張愛玲無欲見伊。第二工，換張愛玲親身去胡蘭成in兜看伊。第三工，胡蘭成又閣隨去常德公寓看張愛玲，這斗張愛玲為伊共門拍開。伊轉去了後，隨寫一張批予張愛玲，批內面寫講：上海的雲影天光，世間的無限風華，攏對你的窗仔外流過。

　　歷史上有才華的美人，蔡文姬、李清照、上官婉兒、卓文君、班昭，攏是千年以後予人想也想袂完，是因為咱若看著in就若看著天地萬物，就若看著咱家己，就若看著一枝花，若夢仝款。如今，張愛玲嘛成做一蕊花，咱若有心拍開彼扇夜藍色的窗，就會使佇窗仔口看伊佇月光中開甲誠鬧熱，誠鬧熱。

海翁台語文學第171期2016.3