分享花開的聲音

花開的聲音     春天的花園內    無意飛來一隻白色的尾蝶仔    害阮想起青春少年時     阮刁意故起無空創治伊    偷偷仔和(hām)伊滾耍笑講    阮捌聽過花開的聲音喔     伊聽一下驚一趒    心肝噗噗惝烏白亂飛    那飛那喝咻    無可能，無可能    花開的聲音干焦我聽會著    你哪會聽著花開的聲音     論真講起來就話頭長    彼(he)是古早古早    足久以前的代誌     彼(hit)一年    人今仔十五歲    佇一個三月的透早    一絲絲仔溫柔的光線    淡薄仔溫暖的天氣    看著埕斗滿園花欉中    一蕊白色的花苺嬌滴滴    五片花瓣    已經展開兩瓣    現出一半藍色的花心     阮決定    欲留落下來等待    等待伊齊開上媠的彼一秒    貼心的伊並無予阮等傷久    無張持    落尾的三片花瓣拍開矣…