王立信 的部落格 -- 九月 2009 封存 (26)
詩兮誕生
昨日兮阮
不減閒時詩興
寐求自娛之作
若 金色錦鯉之不可得
今日兮阮
輾轉失眠
難耐粼光片羽之姿
蒐揣 艷影 芳蹤
明日兮阮
淡薄勾勒出 蜿蜒 婀娜
佇浮藻 礁石 之間
穿梭 恩愛 纏綿
亦臆出伊人暗自傷悲緣由
仝款兮阮
猶原邊幅不修 哀吟
濟濟兮阮
拭寫.空思.嗟嘆.字紙簍
濕澹兮目墘 留互這馬
予家己含孤獨 捧杯對飲
準係 錦鯉干旦一般色緻
著急搶鮮兮汝
網頂泡茶 閒來遮坐……。
門外哀歌
叩門兮阮
映望像門內 汝兮溫柔。
若汝愈倘觀透 門外
心晟 孤寂兮儂影。
狹入門內兮阮
果然熟練 親和請安兮扮勢
自本底；
慣勢時常迎受兮習練
嗎算 刁持虛情兮手路
另外即個「阮 」
猶原佇扣門及毋扣兮崁站
躊躇失意 消瘦元氣。
舒適兮「汝」
輕鬆萬利 行禮如儀
敢愈記得 彼當陣
緊緊掠住起初 搵予
冰冷兮手溫 予伊燒烙。
若準 貼心眼神 熱情兮手骨
亦著閣按算 龍交龍 鳳交鳳
閣刁意故 假做 咦咦唔唔兮說客
凊采狡辯講 無彼款代誌
抑若夯目頭諸個；
係欲安怎閣講起。
備註：「阮 」：仝遭遇兮儂。夯目頭：高姿態
「汝」：第二人稱兮阮。
方便之「道」
上 原始喊喝
上 原創象形
濟濟 圖騰記認
霎那間成就了永遠。
即陣；極不極
沒「解放」，
較慘死兮真理。
勿免文明去闡明,
勿免歷史演進來插手…。
道者;通道也。
自然而然發生。
化生；神有機性的理則。
若像人；蹲缸、坐化、入定
若像人；神遊、頓悟、涅槃。
道道道；非常道 。
太初有道；
「老子」亦急兮道理。
「可口可樂」廣告詞講;
暢快呀………。
假借脫肛而出兮；
清氣癖來譏刺，
儂嘴唇皮兮污穢。
「嗯嗯」！阿爹喂！阿娘喂！
腫頷.突目.浮筋.
使盡喟力；通譯翻出……
上帝啊！祢美意原係安尼。
註：「老子」北京語此位係指家己
註：看倌.恁甘知秘結兮艱苦，
無恁叫是我咧寫通關達竅.
得道升天兮代誌喔。
由王立信於2009 九月 26 4:00pm添加 — 無評論
哲思反芻
遠遠漸明兮行影
是伊!
毋是伊!
是伊；嗎若沒親像是伊!
是伊，嗎毋是講毋是伊!
請問汝；到底是伊抑不是?
汝看；溪底泅兮魚仔誠快樂!
抑汝亦唔是魚仔，怎知伊泅 誠快樂!
汝嗎毋是我；若知阮毋知魚仔泅 誠快樂!
伊手 指著天邊兮月娘講月娘圓
阮是 看伊手指頭仔指向天邊
伊咧講月娘
阮咧講伊指兮手指頭仔
安尼辨證；吃愈飽嗎愈袂消化。
兩人置風頭旗竿跤咧答嘴鼓
汝看；旗仔咧動!
唔對；是風咧透!
是旗仔先動則證明有風塊咧透!
嗯！抑風若沒先透旗仔安怎嗎拽袂振動。
詩若欲按呢寫；永遠佗寫袂煞矣…。
我沒騙汝!
總袂用兮佇厝
無代無誌 閒仙仙，
脫腹裼，
偆一領短褲節仔
佗作一首詩吧…。
由王立信於2009 九月 26 4:00pm添加 — 無評論
無言之歌
毋願閣夯筆更試此段酸甘閣蜜甜兮過去,先輩再會;敬疼兮顏牧師及可愛兮牧師娘。寫毋寫無言之歌嗎沒啥增差抑啦;仝款兮結語爾爾。此站阮亦深刻覺悟乞求救贖兮人性軟弱兮模樣.此界汝決意別離.幾落擺心情五味雜濫,肖想日子唯頭閣開始;比較昔前約束講欲逗陣夠路尾兮心志;前夠旦咧……。沒疑誤映望兮出帆煞駛入袂轉舵兮湍流暗溝,留阮失落信仰兮倚靠.孤獨滋味尤其像今夜飄搖兮風雨冥.濕澹濕澹兮街路。豈采偆回味汝傳播兮聖言佮詩歌遮呢鮮明兮音聲,豈采猶原牽掛汝曾經釘根欲致意兮代誌.猶惦腦海裡咧拍箍.這陣亦雲淡風清抑啦。應該嗎著漸漸放捨遮兮籌謀及牽礙則對.亦隨在愁諸浮動.像來來去去兮海湧.拍岸夠伊恬靜煞去。指頭仔扼扼咧,拄好按算佇金針花遍野滿山兮節期,正式汝欲行前面綠色青翠兮魂夢境緻.諸個攏總;得確愛灌滿即寡仔勇氣兮風帆去迎旨啊.莫得閣越頭.毋甘已經行過吵嘈兮笑聲.親像眾醉茶香,率性親和兮日子.不爾過是擴大心兮胸脥,去開疆拓土排列陣勢;為主爭戰好兮爭戰爾爾.上時嗎為潤澤苦難兮台灣母親這遍土地.去認真拍拼涵養伊兮肥土啊!肯定是阮大家沒夠額兮福氣來聽趁汝有所不為.徛在兮調直硬氣.及聽趁接序欲… 繼續
由王立信於2009 九月 26 4:00pm添加 — 無評論
顏信星台語文學選集讀感
身外單薄 掩不住清風般兮滄桑
輕輕飄過臉頂矣.刻出一冬一冬堅定記號
無情環境有情兮天
順風滿帆兮心靈迴唱著 飽飽的兮歌詩
平安喜樂滿心田 佇地像佇天
雖然行過有「海」、有「佃」兮酸甘甜
目屎中兮珍珠光采有芳味
大海寶藏係為著撒網來豐富
田園著儂耕作則愈釘根
寶貴的珍珠啊！
的確著好好珍惜.則袂失落
想當初.三輪車伕兮時陣
佮鄉土兮愛情.暗暗定落兮姻緣
佗佇月娘樹跤.夠旦猶原數念
數念著攑頭映天兮誓願
阮兮初戀佗惦置
阿爸及阿母生我兮所在.哈瑪星
遐有舢板.海鳥 .大海湧
含細漢辦家伙兮囝仔伴攏總兮記智
大海湧雄雄拍佇渡船頭兮海岸頂. 一湧一湧
海鳥亦不時呼應著阮.心內兮大海湧
一聲一聲佇心靈深處咧喉叫
啊！ 這是血及汗滲著吞落的目屎作伙大漢兮所在
疼惜啊！… 繼續
由王立信於2009 九月 26 3:30pm添加 — 無評論
簡單自我紹介
阮是芋葉蕃薯心第一代兮臺灣儂.九年教育窮欲讀袂透.手面趁食30
冬.育2女。18冬前信耶穌.現部是長老教會執事.接觸台語詩兮緣由是阮教會前任牧師顏信星兮鼓勵.伊任內設立羅雅教會網站.伊詩.文.詞曲.攏充分表明懟臺灣玆塊土地兮疼.伊亦激勵阮會友大家盡量寫.寫予出味。可惜網站3冬前綴著伊去屛東九如上任煞來結束.阮嗎停止拄則孵芽兮文字習練.佳哉教會幹事提一本台文戰線予阮看〈原來是寄予顏牧師的〉。安尼煞引起阮佇網路蒐找台文戰線兮蹤影.果然予阮揣著。
歸尾來講.敝人才疏學淺.干旦寫寡生活感懷而已.學術性兮物件阮攏沒半撇啦。前仔佇羅雅網站有寫寡.唔閣驚儂笑.唔敢捧出來現世.玆回沒意中知影. 台文戰線聯盟有可能受稿.則沒惜面底皮投石問路.佇遮亦感謝長松兄三言兩語春風般兮鼓勵。嘸管安怎.台文玆遍田園係值得耕作做伙拍拼矣。小弟立信亦意願佇諸位先進教導下.勇敢踏進前.嘸閣想倒轉來.阮玆咧食老則塊出僻兮儂所捧出來兮物件.敢愈看口哩.阮嗎嘸知影？敢袂笑破儂兮喙.總是祈望諸位先進海涵多多.感謝。
佇遮順祝台文戰線聯盟諸位勇士朋友安平.建康.快樂。
由王立信於2009 九月 22 2:00pm添加 — 無評論
無通徛高山
台灣人的心聲 阮逐工攏致意
嗑瓜子 看電視 遐是下班了後的代誌
嗯！ 浸嘛的天頂是有卡清氣 黑陰落雨有冬時
想起威權五十年 古物商的政府孤門閣獨市
戒嚴雞毛當令箭 戴帽仔盧鰻吃芭樂放槍子
二二八及美麗島只是鳥啪仔試手氣
親像乞丐趕廟公 嘴念阿彌陀 手夯剃頭刀
白色的統治 黑金政商勾結的代議 膨風的經濟貧富透拄天
貪官污吏滿滿是 國庫財庫通黨庫 親像灶神鎮灶空
撈百姓 飼政府 阮是吃昧肥嘛餓昧死
一塊一塊的大餅 親像天邊的月娘 放置八月十五的暗瞑
一盤一盤臭酸的牛肉冷支支 連退冰都猶退昧離
立法院的大哥甲大姐 冤家娘債 摔椅擋桌
掀肚擠 玩三p 申請有專利
上扣應 抹粉點胭脂 佇攝影鏡頭前 逐日咧拼生死
欲哮欲笑隨在伊 人古早是教忠教孝 因是教姦閣教哭
悲哀的選民 菜市仔腦智 一千五百 佗將民主一賣五十年
海外黑名單 台灣魂… 繼續
由王立信於2009 九月 21 8:24pm添加 — 無評論
等玆咧春天
織一領情網
無恨無怨
緣絲相牽
親像汝柔軟兮頭鬃
互阮好眠好夢 到天光
等玆咧春天
無霜無寒
日光溫暖
親像汝無邪兮笑容
互阮若蝴蝶 戀慕牡丹
鼻親情氣味
無嫌無厭
反哺跪乳
親像看喪鄉兮厝邊
表明父佇儂無虧兮疼
候無限時機
胸懷開擴
堅持有心
丹田呼吸勇敢喊喝
霎那間 世界抹輸歸咱
演一齣野台
生旦淨末
小丑跳樑
扮 樊梨花移山倒海
息 卸妝也著恬恬無聲
看人間惜惜
無爭無鬪
口舌平和
用最深兮內在揚顯
佇天國上媠兮水晶海
聽聖神音聲
腑落謙卑
靜靜聽趁
進入室內真意傾訴
佇遮領受逐日兮空課
由王立信於2009 九月 21 3:00pm添加 — 無評論
牽汝的手；我的愛人同志
我的思念.親像流星甩過天邊兮彼支掃帚尾. 閃閃爍爍
掃帚尾結晶的光彩是看透我家己固執的人生觀及自我歷史觀點
可比落雪的冬天 .形形色色的六角形體.雪的傘花.一直塊偷看
佗趴佇眠床邊兮窗仔口 .一直塊偷看. 看我夠融去
嘛像透早. 埕仔口老榕仔叢 .葉尖的露水滴. 滴佇伊等待兮鬚邊
而且掠抹住新兮思念夆拍斷 .抹輸慢慢仔佇宇宙中老去的 .自轉的地球
這是欲按怎講呢！佇我兮行住坐臥. 喜怒哀樂中. 霧霧無明啦
有時靈機一閃 .感動變少熱情也變薄啦 .顛倒是雜念塊反起翻倒卡最呢
懟伊兮愛情雖然沒有少年時代兮熱情. 唔閣趣味兮是. 頭鬃愈白
漸漸老花兼散光兮目珠煞愈來愈注神佇伊檢查出來的
肝指數及糖尿.及伊那來那稀微兮身軀啊！
汝懟我兮疼！我比啥人佗閣卡知影. 阿若欲解釋我佮別人生命中的交纏
我兮愛人同志；牽妳的手將近30年 .嘛睏破三領蓆
佇遮我欲奉主的名摸心肝. 無影無隻兮代誌 .祇是一陣的風聲
由王立信於2009 九月 21 3:00pm添加 — 無評論
台北京城咧走山
九月九兮放鏡
放大禮義廉恥兮心肝
凱達格蘭
註定受欺負受囤踏兮運命
此陣；台北京城咧走山
十數萬人頭殼敢歹去,抑是食傷飽
準是啥物天；
頓悟兮空氣參烏雲罩霧兮面腔
煞沒張弛開遍紅葩葩閣厚刺兮玫瑰
遐有三代老幼及交加兮陣雨相招坐「心酸」
某人阿! 講曾隨摩西行過紅海兮彼個約書亞咧
某人阿!耶利哥城兮銅牆鐵壁敢擋愈住；
七日一直玲瓏旋和三聲喊喝兮陣勢
現時台仔頂兮五色人.話屎誠入耳
咱給看；外最廟會兮心態比賽看啥儂擋較久
唔拘；民意佗親像流水此般……
時浪靜.時排山倒海
選民唔若是選票爾爾,伊嗎有深深兮期待
當等伊兮憤慨用比大箍姆倒頭栽兮時陣
歷史!請汝作干証；
啥是法老王,啥人作先知
註：追憶彼年自稱紅衫軍兮羣衆所聚集兮
氣勢.或者是私人意志.所謂公理正義
攏交互歷史去判評啦。
由王立信於2009 九月 21 2:30pm添加 — 無評論
耶穌的學生；台灣的人格者 高俊明牧師
悲傷是濛濛 斷崖
怨嗟是茫茫 大海
台灣啊！你無悲情的權利 失意的本錢
四百年來的映望
人權的鬥士 真理的捍衛者
蒐找人性起初的尊嚴
肩胛愈重 腰骨那挺
伊 耶穌的學生 台灣的人格者
當時 上帝創世伊甸的意念 置伊心中發生
習耶穌受苦的精神 誓做台灣魂
發動挺身的公義 呼吸仁愛的空氣
悲憤化義怒 做所當做 佇實踐中寫遺書
白色黑牢憂鬱藍 放捨身家受關監
意志及目屎灌沃自由的花蕊
喚醒塊睏的靈魂
堅持 上帝的教示
信心 希望 仁愛 公平的社會
拍造 真 善 美 佇地像天的地理
伊嘸做無味的鹽 嘸做斗底的光
為著族群的和好 人佮鄉土的親和
決意拆毀中間猜疑的牆
互白雲的天頂有野花的草芳味
伊有先覺者的悲憫
對台灣母親的疼 用一世人來顯明
目光的青暝兮啊… 繼續
某年某月某日兮淺腹雜記
即首歌兮歌詞按怎起筆……
冊中詩人澎湃兮情感袂得倘收煞呢。
亦是哈瓦那纏綿欲絕兮情歌，
一直惦電視腳放送.巴西迷醉兮旋律。
沒的確逼近中年兮阮猶沒夠資格談論「人生」二字。
盈暗,牽手吓又閣發明即種俗俗健康兮雜菜麵，
對付著現步逐項攏有「黑心」兮品質兮世代。
佇導領飯前祈禱了後,幸福兮滋味開始湠開，
親像茶葉兮香喟,特別是大雨捏造暗冥兮氛圍。
咁相信有幾個烏手工敢夢想著詩人兮夢想，
我想鑿仔及拱搥應該閣恰合舒啦。
現不打牽手吓喝聲咧交代
掼三杯薏仁紅豆佮一包五斤裝兮白米囥惦冰箱冰;
閣講冰過兮白米煮起來卡好吃兮一篇大道理
當等阮翻身起床放尿,
沒拍算即寡雜念咧拍箍,唔放我煞
水電瓦斯大門巡煞了後,
連鞭佗夯筆凊采佐佐咧，即陣
淡薄兮憨眠 淡薄兮空靈… 繼續
番薯有骨
(追憶228牽手護台灣兮歷史意義)
誠確實是鉤著大條神經啦
代誌佗過遮尼久啊
才發現228牽手兮歷史意義
即目瞬若昨冥爾爾
彼袸相招相導 .分旗配帽
團隊夆分配惦楠仔坑高速公路跤
規路咧塞車嗎擋勿住血管兮通路
基隆到屏東若玆支龍骨鞭
四百公里. 兩百萬外人.聽候二點二十八分到
黑崁崁 .手牽手. 心連心
連阿公阿嬤紅嬰仔及坐輪椅兮人佗推推出來
霎那間思維 喘喟暫停止！心臟煞愈跳愈緊
時間佇歷史兮進行中結凍.… 繼續
由王立信於2009 九月 21 1:30pm添加 — 無評論
炒冷飯的新『新』聞
誰儂唆使汝！
獻出純潔兮肉體。
新聞工作者豈嘸是著持守；
像貴氣兮皇后彼玆般的貞操嗎？
那會嬈嬌體態「凡」事綜藝化
那會曖昧眼神「泛」事政治化
現現.脫褲弄，明明.姦夫勾結？
雖講日光下面沒啥鮮事……何況，
鑒誡不遠；傳媒祇是循環性兮『惡』，
親像閣再一擺夆蹧蹋閣出賣捌儂兮老娼頭。
曾經『聯合』獨占幾落拾冬兮青春；
哪裡猶愈顧得了『民生』歲月。
夠旦咧；沒『自由』寧願死兮下場。
亦嘸閣；媠『蘋果』嗎是外拍臘.內落膿兮款。
賤忘兮阮；亦誤飲了孟婆下蠱兮毒水
意識型態煞夆集體催眠去.看阮；
目珠白仁吊高.喙箍嗷嗷唸…置入式.
若大量製造醃腸大腸兮生產線
置入式行銷.一貫化兮頭殼。
搏版面；抹似興奮的野狼咧鼻臊腥血。
路尾；留芳百世抑是臭名萬年！
阮沓沓行入煙花暗巷囉.........。…
繼續
由王立信於2009 九月 21 1:00pm添加 — 無評論
錯誤
錯誤
阮駱慫江南踅過……………….
遐聽候節季攆替的面腔親像蓮花開謝兮性素。
東風若嘸來 三月撦華兮擺柳煙花嘸飛
即時 汝兮心悶若夆圍纍
幼秀孤寂的城樓閣，
及欲準青石仔路頂的廕影
映淒清兮黃昏徙落 寂靜暗冥。
若沒跤步聲 春兮珠簾是掀袂振動的三月
孰了解 汝閉愫的心窗是兹呢阿憂悶咧
阮駱叩的馬蹄蔭聲 媠甲抹輸引動怨妒兮疑猜
足失禮 阮嘸是汝頷頸長長所當等兮
是無張弛現身兮生份儂啦…….。
錯誤 作者 鄭愁予
我打江南走過
那等在季節裡的容顏如蓮花的開落
東風不來 三月的柳絮不飛
你的心如小小的寂寞的城
恰若青石的街道向晚
跫音不響 三月的春帷不揭
你的心是小小的窗扉緊掩
我達達的馬蹄是美麗的錯誤
我不是歸人,是個過客………….。
由王立信於2009 九月 18 11:43pm添加 — 無評論
阮暗頓了後；佇運動埕拍箍咧散步
阮暗頓了後；佇運動埕拍箍咧散步
下昏暗冥；目瞬久
紛紛擾擾，世間外兮活動
汽車音聲像海兮波浪
影隻透射兮光線
攏收集佇看台級梯上頂懸；
白鐵仔鏡面.碗形兮聖火臺墘咧照影
雖莽；零零碎碎.濫濫參參.霧霧無明
總是；曾經證明伊有意無意兮存在。
阮暗頓了後；佇運動埕拍箍咧散步
目珠前玆粒食飯星嘸知見肖閣假博
掠作抹輸惦阮頭前咧導路
自家己當作啟明星欲指引阮人生兮路站
天星啊！這站阮感謝汝兮雞婆啦
安尼好莫；好嘸好！好嘸好啦？
註：食飯星係農業社會每夠暗頓兮習時
攏代先出出現佇天頂嘸知名兮星。
點閱南方兮溫度有感
南方兮溫度；
是椰子樹葉互溫暖南風吹出飄撇兮熱情
南方兮溫度；
是菮蕉旺來芭樂荔枝甘蔗紅柿食出健康
南方兮溫度；
是映朽爛官僚無能野蠻兮政權灑鹽殺菌
南方兮溫度；
是懟台灣玆塊土地誠懇付出深深兮疼惜
南方兮溫度；
是唯生命上深刻兮內層喊喝覺悟出公理
南方兮溫度；
是順服上帝權能創作儂唯真理來兮自由
南方兮溫度；
是熱情健康殺菌疼惜公理自由兮胡長松
由王立信於2009 九月 18 11:39pm添加 — 無評論
