台文戰線聯盟

用母語來寫出咱真實的感情佮記智

開始改用台語寫作這十幾年,足濟朋友問我,是按怎改用台語寫作?In有的人會煩惱我用台語寫作了後讀者會減少,毋過我煩惱的並毋是讀者減少的問題,我較煩惱的是台語文化消失的問題,是全世界可能會減一項多元文化資產的問題。

 

聯合國教科文組織佇2001年公布《世界文化多樣性宣言》(Universal Declaration on Cultural Diversity,傳達出「世界文化的多樣性(多元性)是全人類共同的資產」這個重要的訊息。現此時,所有的母語教育推動者佮母語文學的創作者,攏是為著這份共同的資產咧拍拚:正面來講,是創作、推廣家己族群的語言、文學作品,來予這個世界的文化更加豐富;反面來看,母語書寫,嘛時常是對反多元文化的負面力量的抵抗,彼種反多元的負面力量,時常是位強勢、威權、既得利益的一言堂邏輯產生的。

 

一言堂邏輯,實際上就接近創世紀第11章講著的「巴別塔」,驕傲的人類只有仝一款語言,in佇語文合一當中認為氣力甚至會使贏過上帝,in想欲造抵天的「巴別塔」。佇聖經內面,上帝無歡喜,因為安呢,祂予人類四散佇全地,而且拍亂天下的語言。「巴別塔」是一个人類完全失敗的例,位聖經來看,上帝並無恰意人類佇語文合一內面驕傲,伊恰意人類佇多元的眼界內面學習謙卑佮豐富,所以,咱通發現《世界文化多樣性宣言》佮聖經呼應,有福音的基礎。

 

對大眾來講,這个對世界多元語言價值的認知是真重要的,不過,伊並毋是催sak我來寫母語的尚主要的原因(因為我開始寫台語的時,對這个認知猶是一無所知);我會寫台語作品,大約是因為感情的作用。簡單講,我佇台語創作內面得著過去用北京語寫作毋捌有的滿足:感覺會使佮父母、族群、鄉土ân-ân牽挽做伙的滿足。

 

比如講,我的故鄉佇高雄內惟,這个所在過去出產芋尚出名。我足細漢的時,我的查某祖會用奶母車仔給阮幾个曾仔孫sak咧,佇向時猶真庄跤的田園小路四界踅。我猶會記,伊時常給人講:「我遮孫是我的好寶喔,我給in捧佇手裡,是芋葉咧捧〔phâng〕金珠呢!」彼句「芋葉咧捧金珠」,就是位落雨天芋葉盛雨的美麗畫面結晶落來的,內面有屬佇我的鄉土佮親情,有我囡仔時的記智,是我無法度用北京語百分之百表達出來的,毋過佇台語內面,我有機會給這个感情的原汁保留落來,甚至後來,我寫一首詩叫做〈芋葉〉,成做這个畫面的進一步發展,詩是按呢:

 

大雨了後,
金珠佇芋葉頂懸輦來輦去

查某祖坐佇

芋園邊的亭仔跤
講伊是芋葉
阮是伊芋葉捧的金珠

今雨已經停足久矣
芋葉嘛已經蔫(lian)去矣
Hia一粒一粒的金珠
猶閣佇我的目前輦來輦去

 

  毋知你敢恰意這首短詩?對我來講,這首詩雖然毋是大篇幅抑是表現傑出的作品,毋過,金珠的意象經過三層的轉換,位尚開始的雨水,到查某祖眼中的孫仔,到最後佇時間作用之下,有佮作者目屎重疊的暗示,表面簡單,卻代表我的感情、記智佮我的台語創作之間的彼條線索,嘛代表彼个我無法度佇其他語言走揣著的氣味佮空間,這,通予我來提醒每一个人:母語,m̄-nā是世界多元文化的重要資產,母語,更加是每一个寫作者尚重要的生命資產──只有經過伊,咱才有法度揣著真正的故鄉。

 

  向望你嘛來保惜家己的母語。

 

  向望你用母語來寫出咱真實的感情佮記智。

 

2011/6/19 高雄內惟, 為《教會公報》母語推動所寫的特稿

 

檢視次數: 209

意見

您必須是成員才能發表評論!

加入 台文戰線聯盟

© 2019   Created by 胡長松.   管理小組

成員徽章  |  報告問題  |  服務條款