【台語短篇小說】我的一票五千箍

[小城綾子]

 

     十月拄過，規個永康鄉親像崁佇鼎底的磅米芳，嗶嗶啵啵位街頭磅到巷尾，閣再位巷尾磅轉來到街頭。

    這幾輪的轟炸，將永康的天頂炸甲金光閃閃瑞氣千條。鄉民見著面，笑甲嘴仔裂獅獅，表情卻是十分的曖昧，相拄嘴窸窸窣窣：「阮這條巷仔昨暝二號嘛來過矣！佮一號同款，一票二千箍；阿恁咧？」

     ˙

    早起八點，水雲已經佇客廳偎大門的壁邊認真咧踏針車。

    收音機內底電台主持人用親切甲予人規粒心肝強欲溶去的聲音，介紹比仙丹閣較好用的妙藥：

「怹少年的佇外口拍拚事業，咱老大人佇厝內身體嘛著愛家己顧……，這味是用誠濟高貴藥材煉成的，治高血壓、糖尿病、肝病…攏真有效……」

「骨刺免開刀，無效毋免錢！這罐藥仔給食落去，三工，阿伯阿姆啊聽斟酌嘿，三工就看會出效果，免外久拐仔做你給撣掉無要緊…」

    「敢有影遐好用？」水雲伸手捶幾下仔尻川頭，心肝有淡薄仔撓。長期坐咧車衫，腰脊骨不時痠痛甲真厲害，若真正有效……

    「續落去為咱聽眾朋友放一首好聽的歌曲：洪一峰的：舊──情綿綿」

    聽著歌名，水雲元氣規個好起來，胛脊胼伸挺挺，吞一下嘴瀾放軟情緒綴咧唱：「一言說出就要放乎忘記哩 舊情綿綿暝日恰想也是你……」

    恬靜的無尾巷，單調的針車聲。水雲腳手猛掠，仝一式的囝仔衫位伊正手爿的土跤一領一領疊懸起來，漸漸疊成了一粒小山。

    「啊 ~ ~不想你，不想你不想你，怎樣我又擱想起，昔日談戀的港邊…」

    水雲愈唱愈哀愁，針車嘛愈踏愈慢落來。

 

    十點外，一陣放送頭的聲音位巷仔口傳來，鬧熱滾滾，聽起來聲勢不只仔大。腳步聲愈行愈近，人聲愈來愈吵，水雲停止踏針車的動作，頭敧敧想欲聽斟酌，厝邊隔壁已經有人開門出來探頭，嘛有人規氣行到巷仔口等欲看是佗一個鄉長候選人出來掃街拜票。

    這擺頂一任佮現任的鄉長攏相爭欲出來選，兩個人仙拼仙，王拼王，頂一任的一號先下手為強，規個鄉總掃，一票二千箍，里長負責抄名冊，只要戶籍佇遮有投票權的攏有份，厝內人口較濟的這聲卯死矣，清彩收嘛超過一萬箍。

    講著這，逐家歡頭喜面笑咳咳，攏講確實有影是真「寶貴」的一票。

    現任的二號知影了後氣甲規個面烏一爿，大力頓桌仔幹譙：「一票行情價嘛才五百箍爾爾，伊偏偏掖二千箍，明明是刁故意欲擾亂行情……。幹！恁爸佮伊拼矣！二千箍就二千箍，伊買會起，我敢就買袂起？」

    輸人毋輸陣，現任的鄉長嘴齒根咬咧，仝款規鄉一個人掖兩千。

    永康鄉的天頂自按呢金光強強滾，烏魚炒米粉，風中攏鼻會著銀票的臭芳味。

 

    水雲規家伙仔四票，攏總收著萬六箍。

    「逐擺選舉若攏有這好康就好矣，按呢上好逐個月攏來辦選舉。」指頭仔一張一張算著銀票，水雲歡喜當中摻著淡薄仔酸澀：針車著愛踏偌久才趁有這萬六箍？厝內兩個老的加起來百五歲，規身軀病痛；兩個少年的猶咧讀冊，註冊費嘛是誠大的負擔，一家口仔六支嘴欲食……。

    想著遮，水雲吐一個大喟，尪婿坤林本底佇紡織公司上班，兩冬前，工廠規個徙去中國，坤林自按呢失業。年歲大歹揣頭路，只好四界做臨時工，拼甲大粒汗細粒汗，收入猶原袂穩定…。

   是講…兩個候選人攏買兩千箍，到底是欲投予佗一個才好？

    水雲拄按呢想，大隊人馬已經斡入來這條無尾巷。隔壁掛黑框老歲仔目鏡的里長洶洶狂狂位怹兜跑出來。

　　水雲離開針車，行出大門看斟酌，來的是一號候選人，頂一任的鄉長錢愷濟。

    錢愷濟笑咳咳目睭掃過四箍輦轉，一個一個點頭：「逐家鄉親拜託拜託！予愷濟仔閣再一擺為咱鄉親服務的機會…」

    「無問題啦！阮逐家這票一定頓予你！」里長替厝邊隔壁掛保證。水雲想起幾工前二號來里長嘛講仝款的話。

    錢愷濟滿面的笑容一直到行入去里長怹兜隨捋落來，像罩著一層厚厚的寒霜：

    「怹娘咧！我開二千伊也綴二千，欲參怹爸拼到底就對啦？是講里長伯仔你嘛誠無夠意思，已經提我的錢矣又閣替二號買，這毋是刁故意欲予我歹看是啥？」

    「無啦！錢董仔你誤會矣！」里長心肝雄雄趒一下，趕緊請伊坐膨椅，一面請煙一面解說：「伊是現任的鄉長，人講人在江湖身不由己，阮做小小里長的只不過是做一個面子予伊，替伊發一下仔錢，私底下，其實阮攏是支持你的啦！」

    「敢─按─呢？」

    「絕對無騙你！別的所在按怎我毋敢講，若阮這箍籬仔的票一定攏是你的…」

    「上好是按呢啦！……幹！頂擺無細膩栽佇伊的手頭，這擺絕對欲予伊輸甲車畚斗…」

    「是，是，錢董仔重出江湖，這擺無倘予伊遮好食睏矣！」里長老罔老，腰脊骨佮頷頸猶原誠柔軟。

    「我若選牢……，這你知影啦，毋免我閤加講矣…」

    「是是，這我了解！」

    錢愷濟無予外口一群人等傷久，大跤步踏出厝外。

    規群人離開了後，巷仔恢復原來的恬靜。

    水雲行倒轉去針車前坐落，心內親像海湧浮浮沉沉：這擺兩個候選人相爭掖錢買票，聽講一個上無嘛愛開一兩億。

    夭壽咧！一兩億呢！幾世人嘛開袂了，是按怎有錢袂曉守？

    是講…人生哪會遮無公平？有的人好額甲毋是款，無將錢當作錢看；有的人卻是散赤甲強欲予鬼掠去…。水雲吐一喙大氣：親像家己，規年昶天踏針車，就算有蜈蚣遐濟支腳，恐驚仔逐支攏踏斷了了嘛無才調趁外濟錢，三頓腹肚若顧會飽就謝天謝地矣。

 

投票日愈接近，永康鄉愈鬧熱，親像瓦斯爐頂面一直噗泡仔的滾水；地方上一寡仔賭盤嘛動起來，開始搏到底佗一個會當選。

 

    投票前一工，下晡二三點，水雲當咧踏針車，隔壁里長伯仔行入來伊厝內。

    「來，一票一千箍，恁兜有四票，…」

    「一千箍？」水雲目睭展大蕊感覺真意外：「一號二號攏買矣，敢講閣有第三號欲出來選？」

    「毋是啦！是一號錢董仔…頂一任彼個鄉長啦！伊真阿沙力閣追加一千箍…」

    買票也有追加的？水雲心內起愛笑，食甲欲五十歲矣，大大小小拄過的選舉遐呢濟，毋捌拄著這款代誌。

    算算咧，一個人攏總收著五千箍。幾張銀票捏佇手裡，真輕，嘛真重。

    「選一個鄉長爾爾，也毋是外大的官位，一任做落來，月給才外濟銀？開遮濟錢買票…敢算會合？」

    水雲拄問煞，里長聽一咧笑甲強欲落下頦：「若照妳這款算法，買票的人逐家攏愛走路矣！嘖！講甲予妳捌 嘴鬚著會打結！月給對怹來講是零星仔，無看佇眼內，彼條看袂著的，較大條、較油洗洗啦……」

 

    盈暗九點外，水雲佮尪婿坤林坐佇客廳看電視。

    「你看明仔載啥人會選牢？」坤林問。

    「誰知影？啥物人選牢攏佮咱無治代。」

    「哪會佮咱無治代？我…」坤林話講一半雄雄擋牢無閣講落去。

    「你按怎？啥物人選牢你就毋免討賺喔？還是怹會請你去公所做秘書吹冷氣？」

    「莫講講這三八話啦！」坤林身軀偎近水雲，聲調放小：「莫予房間內底兩個老的聽著，我是看現任鄉長贏面較大，搏伊會選牢啦！」

    「啥？搏？」水雲聽著強欲位椅仔頂趒起來：「無你敢是頭殼歹去矣？你有啥物本錢佮人去搏？若搏輸咧？」

    「嘖！妳即咧查某實在有夠破格！猶袂知輸贏就佇遐唱衰…」

    「生食著無夠矣閣有倘曝乾，欲搏，錢咧？錢位佗位來？」

    「妳遐毋是有怹買票的錢？提遐的錢來搏啊！」坤林的目睭光燦燦，親像已經搏贏仝款。

    「袂使！」水雲一聲就拒絕。厝內這台針車已經老矣，遮的錢欲儉起來以後倘好買一台新的。

    「若無…提一半出來就好。」坤林退一步。

    「袂使！」水雲堅持。一銑錢嘛袂使黑白拍損。

    「上無…」坤林閣退一步：「妳嘛將我彼票四千箍的額提予我。」

    四千箍？看來伊猶毋知影這票已經起價矣，水雲決定暫時無欲予伊的尪婿知影。

    「我講袂使就袂使啦！搏儌毋是正當代誌……」

    水雲話猶未講煞，坤林規個面腔突然間風雲變色：「啥物叫做正當？妳收著遐的錢敢就是正當的？」

    「……」

    看著尪婿歹聲嗽頷頸仔浮青筋，水雲的聲勢規個弱落來，就算有外大的理由、外濟的委屈，嘛忍牢咧恬恬無閣再出聲。

    （憨頭憨面！頂任鄉長加開一千箍買票，伊才是贏面較大，你臆現任的會贏，真正搏落去穩輸的！）

    幾句話佇水雲嚨喉空輦來輦去，吞袂落去嘛講袂出來。

    吞落去，驚伊押毋對爿搏輸；講出來，又閣袂輸鼓勵伊去搏……。

    一暝長勒勒，房間暗趖趖，心肝亂糟糟，水雲佮坤林尪某兩個隨人睏一爿，無講半句話。

 

    透早，坤林就無看人影。

    早頓食飽，兩個老的入去房間換好衫褲佇客廳等，準備時間一到就欲出門去附近的慶安宮投票。水雲看著，開嘴款勸：「阿母這幾工毋是頭殼重重人無爽快？我看莫去投矣，佇厝裡歇睏就好。」

    「免閣勸矣，我已經共講過幾落遍，叫伊莫去投，無精差伊這票，仙講都講袂聽…」水雲伊大倌那講那晃頭，親像咧唸一個無聽話的囝仔。

   「提人的錢，無去投票哪好勢？對人講袂得過啊！」水雲的大家勻勻仔講，徙著淡薄仔虛弱的身軀勻勻仔行到門口。

   「若按呢…怹兩人的錢咱攏有給人收，阿母欲按怎投才袂對人歹勢？」

    「這毋才簡單，恁阿爸頓一號，我頓予二號。」

    「毋過…一號比二號加開一千箍吶！」水雲面笑笑刁故意講。

    「…………」

    「規氣兩粒人頭作一伙頓予怹，按呢上公平啦！」水雲的大倌續落去講，目眉彎彎嘴角翹翹，若欲笑若毋笑。

    「三八咧！你掠準我毋知影按呢是會變做廢票？這擺我無遮憨矣…。對啦！阿雲仔，頂幾日仔電台有賣一款藥仔，聽講對心臟無力誠有效，我看…我這票的錢……」

    「好啦好啦！先來去投票，這錢予水雲主意就好啦！」無等牽手講煞，水雲的大倌就共伊的話截斷，兩人一前一後行出了大門。

 

    下晡三點半，水雲將車好的一疊衫整理好勢才趕緊出門投票。一路上心內按算：

    阿母欲買的心臟藥仔一罐毋知外濟錢？

    扣掉這，這擺選舉收到的錢毋知敢有夠倘買一台新針車？

    過幾工若有閒，著開始來探聽看佗一款針車較好，上好是俗閣新式閣好用的。

    水雲愈想愈歡喜，袂輸一台針車已經車轉來囥佇厝內矣，行路一時無張持煞去撞著路邊的電火柱。

    「夭壽咧！無代無誌哪會矗一支電火柱佇遮！」水雲痛甲目屎強欲輦落來，伸手出力搓頭殼額仔。毋過，痛罔痛，心情猶原誠輕鬆：有新針車，若加上跤手閣較猛掠咧，以後就會當加趁寡錢…。

    投票了後轉去到厝，水雲飲一嘴茶、歇一個喘，隨坐落去針車前。順手轉開收音機，拄好聽著彼個台語歌后優美的歌聲：「阮將青春嫁置恁兜，阮對少年綴你綴甲老，人情世事已經看透透……」

    歌詞內底，做人家後的心聲聽起來袂輸是咧講家己。「阮的一生獻予恁兜，才知幸福是吵吵鬧鬧...」水雲愈聽心肝

愈溫柔，對未來的日子一時充滿了希望。

    一條歌聽煞，心思猶閣浮佇半空中，規氣搡開椅子徛起來，行入去房間拍開衫仔櫥的暗屜，想愈提彼二萬箍出來摸

摸看看咧。

    暗屜一拍開，水雲雄雄像去予電電到，嘴仔開開，一粒心肝像咧摃大鼓，強欲位嘴裡跳出來。

   雙手扶著咖啡色的衫仔櫥，水雲規個人烏暗眩起來。

   毋相信錢會家己生腳走無去，水雲深深吸一口氣，閣喘一個大喟，才逗逗仔踞落去衫櫥前，目睭展大蕊斟酌揣。

   規個衫仔櫥揣透透，猶原無看著彼二萬箍。水雲拍一個加凜恂，心肝一陣畏寒，腳手綴咧皮皮剉，愈剉愈厲害，續

落像起乩仝款，規身軀攏趒起來。

 

   過了一世紀久，腳手佮身軀漸漸恢復正常，心內也已經無抱希望，水雲才一手抵腳頭窩，一手岸衫櫥，勻勻仔徛起

來，無魂附體行出房間，經過客廳，行到針車前，兩蕊目睭失神失神看伊彼台老針車規晡久。看甲目睭無睨，看甲日月無光，看甲天佮地攏老去。

       一直到目眶內底的海湧溢出來，一滴一滴輦落針車頂的時，水雲雙腳一軟跪落土跤。
    「我的一票…五千…箍…，上無…」水雲嚨喉予悲傷塞牢咧，哮袂出聲，哭毋成調：「上無你

嘛共…我彼五千箍…留落來……」

 

    窗外有風輕輕仔吹過，天地無聲，針車嘛無聲。