我，參觀戰爭佮和平紀念公園主題館了後

[王立信]

我，參觀戰爭佮和平紀念公園主題館了後

 

為誰而戰……….；

無法定位兮煙硝人生

這包紮含血滄桑歷史。

 

台籍係唯一身分兮錯亂

豈採是落土 殖民淺薄血跡兮印記

變換無仝兮軍服 祇偆和求活命主義兮對決

刺槍.彈藥發射；指映無奈迷濛落月黯淡兮青天

 

敢著佫坐澱則愈清楚看見

飄冷笑弄諷刺；戰事錯置兮旌旗

我沉重神遊；綁腳踏遍南洋.中國.朝鮮兮鎖鏈

誰人無情賜予海風凊凊兮旗津控訴鹹鹹兮歸宿

猶原自焚戰無死兮靈魂

 

請求集倚；散去兮魂魄晟做立碑指引燈塔

艱難兮政權竟然無法回想目屎流落來兮血滴

只偆嘭嘭嗆兮心情寄諸首詩

寄予導覽先生悲切.細膩；寸斷兮柔腸音聲

英靈啊轉來！呼求汝……

感動；愈反省兮政權積極追訴無奈戰事兮神主牌仔

義勇有餘，無名份兮忠烈，無意志兮自由

猶閣有；神聖看護婦兮白衣做奉獻起頭  

質變奧得超生 非人道對待兮慰安婦結尾……..。

 

阮歸路吐喟 踏出導覽說解

一頁滾損笑，損盪人類台籍兮歷史

戰事是迷茫煙硝  老兵不死

無應該凋零佇眾人淺薄兮記持啊。