媽 祖

[黃靜惠]

媽 祖

千外年前

觀音真珠的光采

憂缽瓊花的芳味

幻化人身　二十八个春夏秋冬

承受千千萬萬的憂愁佮苦難

迎來今日

香燈跤的令旗　愈來愈長

烏水溝的海湧　愈來愈深

 

踅過亂世紅塵　殕殕霧霧的海象

青面青衫的千里眼

紅面紅衫的順風耳

報馬仔做前來開路

繡旗 蒲扇 娘傘  攑懸懸

懸入十八天外

開出一蕊一蕊的菩提紅蓮

軁轎跤的心願　覆低低

低到塗沙粉裡

發出一株一株的草地靈芝

 

長長的一逝路

毋驚天邊潑落來的生狂雨

毋驚海角吹過來的對頭風

點燈直直行

行到九月九　越頭一看

三月滿滿的星光月光

透濫著媽祖花的清芳

早就成做一片心中的　靈山聖水

 

毋知啥物時陣

日頭恬恬浮出東邊的海面

一稜一稜的海湧

激出半天懸的海波浪

天兵天將護送的　金鑾神轎

一步一步　行出來　行出來

佇船仔媽的面頭前

咱攏是勇敢有出脫的　南國島民

 

2015.11.1

 新港奉天宮「百年大醮，詩詠媽祖」徵詩活動母語詩組貳獎