彼陣；阮佇高雄文學館

[王立信]

淺拖

 

一雙塑膠淺拖 向頂司

短褲節仔 報告

惦厝內兮庶民 上

自由兮極限

 

水餃

 

濃縮 飯.菜.湯 緊緊

追趇時代速度脈動

拍呃 堵堵兮腹肚

愈少愈好

 

寫詩

 

紙筆看手骨一直故意

糟蹋愛睏兮老花鏡

拔起拔落

 

講座

 

參 天神扼手

佮 仙班揜像

轉來 靈動發功

 

起雲劑

 

媒體 起雲罩霧 塑化

公信力 催符唸咒

痟想催逼吞落喉兮

善男信女

 

三行詩【1】

 

柯柏榮 佇高雄文學館

用凜兩點鐘騙我講三行詩兮要訣

恁及看；我骨力算七遍

佗無影咧

 

三行詩【2】

 

幢幡拜請 偈即般兮陰風

三更半冥 魔音穿腦

饒命咧 明那在佗閣上班矣

 

傳承

 

老師仔壓迫徒弟

食伊兮水涎泉

呸出一蕊 牡丹花兮可能

 

插花

 

逐個流派 催眠目睭

接受三角函數 縮短

佮大自然 久長以來兮瓜葛

 

電風

 

納電錶費 烏紗

封牢牢公寓一樓 唱出

天然兮四季謠 兼模仿

落葉轉踅兮角度

 

練歌

 

歸碟生豆芽仔

敢愈當保養

九官兮囔喉

 

文藝營

 

半路兮袈裟 照光

缽內清清兮戒疤

痟想法會鐘聲

 

台文寫作

 

連電腦佗欺侮我 顯示

拍錯字傷濟兮苦惱

恁老師咧 食儂夠夠