風颱眼

[王立信]

風颱眼

用旋箍的款式跨跤步
佇啜飲 情傷了後
狠霸心的悻眼。

閣較濟兮沙包也塞袂牢
潰堤的珠淚滴流。
莫問我兮名字
抑免肖想欲究竟探底
窺探我 懟旦善變的心。

沒張弛
瞪你即個 天旋地轉
冷笑你即個 衛星噷相定位。
掠準全宇宙 通緝鎖定
千山阮獨往
乘風踏湧而來...。

甘拜的；
加添寡清水作酒 含著泡麵
點上蠟燭 近倚膜拜。
起風兮時 念我名號
等待我 歡喜暢快彼當陣
送恁即個 秋高氣爽
外加乘長風 狂濤湧兮心適興。

一群加勒比海 蝴蝶的翅股
佗倘積聚 煽動我孤獨的存在。
請看觅 看我來兮進前
天邊的虹彩
淡薄 聊聊仔表示
聽候 苦害後的悲哀…。