柯柏榮的台語詩〈單戀〉

[柯柏榮]

單戀

一欉蔫去的玫瑰
倚佇萬紫千紅輪迴的
牆仔角
恬恬的花影
縛著我
無神魂的目光

幽幽仔問伊：
烏黃焦去的花片
捌予偌濟多情的手唚過？
枝身萎去的尖刺
捌鑿傷偌濟無情的手蹄？

挺挺的花枝 撐懸
勼勼的花心 伊
無話無句

我文文仔燒的目睭
無細膩 摸著伊
勾勾的蒂頭 刻滿
必必的愁痕
一巡一巡
是遠去的蜜蜂
是黃去的豔紅
是老去的春夢

老去的春夢
鑽入我老去的心房
浮出一絲紅牙的光影
拍通斷截的感情線

我徛佇
一個眼神的距離

撈一杓真心順順仔沃
激一甕情詩柔柔仔壅
驚日傷炎
驚霜傷凍
驚雨傷厚
驚風傷透

啊！時到
花便開

驚驚的心
甜甜等待
一欉蔫去的玫瑰
蒂頭再開