柯柏榮的台語詩〈囚夢〉

[柯柏榮]

囚夢

夜行軍的蟋蟀仔報數聲嗽
鉸斷拄起鼾的睏眠
趖佇牆仔角巡邏的蟮蟲仔兵
賊頭賊耳，用回憶的雷達
掃瞄囚室內的我

靈魂予爬滿皺紋的月娘下著符仔
頭昏昏，腦鈍鈍
含著夢的奶喙

囚夢一舉跤
隨踢倒覕佇壁角的記憶甕
踅出矸轆的喝咻
釣起田圳溝的笑聲
騎上阿爸肩胛的無邪
牢佇阿媽假喙齒縫的
一暝大一寸

久違的夕陽佇紅瓦厝頂繡針黹
金黃柑仔紅繱絲線，旋藤漫射
徙近的煙筒吐出彩帶樣的疼惜
啊！彼是阿母手蹄厚繭的驕傲

鄉愁搋開我的元神
將散掖掖的記持
一粒一粒抾起
封蓋的時陣
目睭角無細膩去予思念嗆著
滑落一滴歸不回的家園

[王立信]

柯先生前輩者台鑑：
汝兮詩看著心肝頭膨膨衝.抹輸囝仔胚夯頭
看見血氣漢草兮大人無所抹會兮款。詩魂佇
汝內面.即款兮涵養諒必係數十年累積像火燄
山底層滾強強血路兮流動啦。感服之至.意願
詩兮氣慨映汝學習.敬祝平安順序。

[柯柏榮]

立信兄：你傷客氣矣！我只有6、7冬的詩齡，猶閣足初淺的。感謝你的呵咾！