台文戰線聯盟

路邊的袈裟(台語詩)

浮浮搖搖的世情
敢有養命的可能

黃昏的天色淡薄仔迷惘
街路是河川店頭是驛站
按下殺性
按下癡貪
輕淡梳妝的是素食館

無看伊的渡船停佇叨位
來自遙遠的西方
猶是同款的人間
一軀黃黃的袈裟
點照城市入夜的黯淡

徛挺挺的是法杖
恬恬測度世俗的冷暖
圓輾輾的是銅缽
靜靜等待過路的善念
一軀黃黃的袈裟
一道幽微的考驗

浮浮搖搖的世情
敢有養命的可能


陳建成 2008/12/9

註:刊於海翁台語文學92期2009年8月

檢視次數: 235

王立信在3:18pm對2009 九月 27的評論
陳大哥建成兄汝好:
無意中踏入台文戰線行列拜讀詩文大作.初初看著「浪人」兩字.
隨想著「木屐」, 呃;覓滾笑較好.這若無細膩咧.木屐是欲給人敲頭殼吶。

看「判決」帝國的正義. 猶原維持引經據典. 徹底伸張. 毋捌容隱過異族的邪惡…….
嗯;誠深綠。

看「底線」詩.銀色的薩克斯風……掩護一帆蟳仔.猶未熟就紅去的蟳仔.試探橫行的底線。 嗯;即咧人浪漫閣勇敢。

看覆李秀「討債」童詩. 嗯;即咧人親和閣好禮。

看「初醒的夜來香」初醒的夜來香知影.只有我.佮我的冰咖啡.探看小小的花園.探查伊吞吞吐吐的秘密.淡薄仔癡迷.淡薄仔愛意.靜靜咧等伊。 阮感受汝多情柔軟兮心。

「看慾望的吧檯」長長的吧檯.有酒以來.就是天人的交界. 酒斟來 酒斟來。 嗯;浪人飄撇兮心內

「看伊一暝」毋甘瓊花彼一般早謝的媠趁有月光恬恬看伊一暝
嗯;彼個癡情兮男性。

「消費券的MV腳本」插一隻雞毛.舉一支甘蔗…..。
感受汝懟失落文化內含的本質.祇剩表面生活的無奈.用上低限度的尊嚴來表演起碼的生存.彼款的悲哀.汝用反諷兮態度來關懷族群。寫夠玆.阮夯大箍母欣賞汝。

「路邊的袈裟」浮浮搖搖的世情.敢有養命的可能……。
感受詩人懟世態變遷.各種的角色身份.走形去的扮演.荒腔走板。
這款眼識,看出半世記長期執政掌權.過渡兮態心。玆首詩的影含「消費券的MV腳本」插一隻雞毛.舉一支甘蔗.有異曲同工兮精神。阮敬佩佇心内。結尾來講.建成兄詩人性格表露無疑,阮倘學習先輩跤步.來為台文拍拼則應該啦。
浪人陳建成在8:39pm對2009 九月 27的評論
立信兄你好,感謝捧場。

「浪人」是無啥在意世俗的觀點,希望佇有限的人生中求一個自在。木屐傷重,所以無穿木屐。

支持國家獨立,發展本土的文化藝術,消遣惡質化的政治,只是良知,無屬於一般咧分的深綠。

歡喜會當以詩會友,鬥陣為台語文學拍拼。

意見

您必須是成員才能發表評論!

加入 台文戰線聯盟

© 2020   Created by 胡長松.   管理小組

成員徽章  |  報告問題  |  服務條款