信心兮身影

[王立信]

信心兮身影

彼日透早 阿爸佮阮相同行
伊講欲獻燔祭 佇摩利亞兮山頂遐
三日續連行 伊行阮隨 心貼心。

日頭緊過 星光暗夜照著阿爸堅定兮身影
霎那 想著阿爸佮阮兮感情
佗親像伊對耶和華兮尊敬
耶和華若叫聲 伊應阮佇這
伊教阮就行。

一路上 耶和華兮恩典講袂煞
伊兮眼神看阮 甜蜜閣滿足 嘸甘閣疼惜
阿爸輕聲講 若準天星變鑽石 石頭換瑪瑙
囝啊!汝係阿爸寶貝仔心肝兮全部

伊閣講 上帝無棄嫌 早前兮亞伯蘭
按怎離開本族本家 謙卑順服 奉獻上好
求上帝 救羅德 起祭壇 接待天使
無撓疑 百歲得孝生 受祝福 承接萬邦萬族

夠山跤 看山頂 阿爸兮目睭轉神聖
阿爸!阮開聲 伊應我! 以撒阿囝 我佇遮
兩儂燒烙兮心肝 靠相偎
阿爸!柴及火把攏佇遮 獻祭羊羔佇搭落
免煩惱 耶和華兮山頂有備辦
阿爸頭前行 伊堅定兮背影 親像欲赴筵席

行到位 阿爸起壇 排柴 綁阮 攑刀 跤手真魅掠
阮想!阿爸兮耶和華 一定有羊羔 傳佇遮
彼時 天使煞應聲 以撒毋倘刣
汝無留 看作寶貝兮獨生囝
論福氣 我欲賜大福氣 互汝兮子孫

阿爸佇頭前行 阮佇後面綴
獻祭兮山頂 信心傳承
耶和華的確是 以撒兮上帝。