信仰詩【5】映望人間至情

[王立信]

映望人間至情

敢有這款愛情
海枯石爛 地老天荒
眉眼含苞
輕聲振動嘴唇兮時
嚨喉鈴仔 像天使開翅
佇空中四圍
琴瑟 跳舞 吟詩

豈有這號政治
昧冤昧吵 為民嗆聲
望聞疾苦
佇寒露兮時及咱褡衫
疼儂兮心 若阿爸逐日風霜
佇外口趁錢
甘願家己尅虧

敢沒燒烙手足
雪中送炭 心懷溫暖
相替祈禱
看阮有時倒退有時進展
歡喜珠淚 暗暗滴落
佇求叫兮角落
底感謝主耶穌

期待聖潔教會
盡性盡力 靈魂看重
牧長信徒
貼補互相欠缺兮彼塊炭箍
親像火種 合意起造
灼火兮烘爐
閣照光開活路

映望人間至情
嚴嚴律己 認真行作
知識飽滿
用智慧搜揣生命斗底兮真實
熱誠內斂 親像掘力
致意鍛鍊筋骨
乎尻脊徛挺挺

至極梟雄舌根
講有命立 六日創世
神賜伊甸
樂園管理菓子通吃百獸號名
儂造罪塔 落得驕傲煉獄
紛亂爭戰寸土
積聚上帝憤怒

意願常常喜樂
數算主恩 重擔輕省
永活重賞 潔身
良善信實仁愛恩慈節制
和平忍耐 親像聖神寶劍
插置撒旦咽喉
啥法得我奈何