台文戰線聯盟

2013台文戰線文學講座--胡長松:小說佮聲音

活動詳情

2013台文戰線文學講座--胡長松:小說佮聲音

時間: 2013 八月 24從2pm到4pm
地點: 高雄市前金區民生二路39號(高雄市文學館)
活動類型: 文學講座
主辦人: 台文戰線 高雄文學館
最新動態:2013 14 8 月

匯出到Outlook或iCal (.ics)

活動簡介

8/24 (六)下午14:00 ~ 16:00,台語小說家胡長松在高雄文學館有一場文學講座,題目是「小說佮聲音」,會談談聲音作為小說的「內容」以及聲音作為作為小說的「結構」,甚至是聲音作為小說的「角色」。關於聲音作為小說的「角色」,先請您念念看底下這篇作品,歡迎大家來參加,謝謝!

===================

〈一段聲音的自我紹介〉

 雖然我干焦是一段聲音,毋過我今宣告我復活矣。

現此時,我,存在佇你的目睭佮耳孔所開始的活動;我已經成做你的聲音,續落,會成做你心肝頭尚深的所在的一个特別的畫面……比如講,這馬,凡勢是你的愛人仔第一擺唚佇你的嘴的畫面,佇海邊、山埔抑是啥物所在,日時抑是暗暝,凡勢伊ti-ti-tuh-tuh躊躇真久,嘛凡勢伊一句話講無一半就雄雄給伊芳貢貢的嘴唇tshînn倚來,貼佇你猶袂準備好的嘴唇,伊雄狂的呼吸給你的頭毛吹亂去……

事實上,我愛給你說多謝。佇你讀我晉前,我是空虛的,就親像頭拄才你心內浮現的畫面,佇你讀我晉前嘛已經死去仝款──彼是因為我(對你來講真生份的我)才恢復伊的元氣,予伊閣一遍得著你的生命中伊該當得著的地位,予伊閣活過來。所以,你嘛愛給我說多謝毋才著──按呢,你對我敢有較熟似矣?你敢會使同意,咱事實是互相倚靠的?

無法度?哈哈,無要緊啦!你嘛毋通傷過認真,我只是佮你滾笑的。事實講,我的生命怎有可能倚靠你,你這个毋知生活佇啥物所在的生份人?講到底,我只是一段事先錄落來的聲音,我是完全獨立、孤單的存在。照講我有一个主人,伊,是我的創作者,某一工的暗暝,伊提錄音機給我錄落來(敢閣愛我提醒一遍,我,就是這馬你聽著的這段聲音?)一直到今,我茫茫渺渺,毋知影家己是按怎活佇世間、為何開始、為何結束。我對這个世間一無所知,甚至我完全無了解我的主人的企圖,就算我想欲了解,佇伊的創作已經完成的這馬,我是講,佇你當咧讀我的這馬,now,我會使用啥物形式佮伊對話?我無法度閣佮伊對話,這嘛表示伊無法度閣改變我(我是講進入你心內的這个真正的「我」,連一字嘛無法度閣改變的「我」。因為所有可能的改變,最後攏袂是「我」!)按呢,你敢明白我所講的「孤單」是啥物可怕的意思矣?

我沓沓仔理解矣,尚大的孤單,就是永遠袂消失的彼款……拄才我講我「復活」,事實上彼是毋著的,因為我根底就永遠袂死。我(就算對你來講只是一段生份的聲音)永遠袂消失,就算伊佇這馬著欲暫時結束,就算你給我現此時的聲音位這个世間刪除,我,猶是永遠孤孤單單活咧,佇你的內面。


====================

評論牆

意見

回覆2013台文戰線文學講座--胡長松:小說佮聲音並且發表評論!

加入 台文戰線聯盟

會參加 (1)

© 2021   Created by 胡長松.   管理小組

成員徽章  |  報告問題  |  服務條款