浪人陳建成的頁面

受害者（台語詩）


卸去一個枷
擱舉另外一個枷
爬出一個窪仔
擱爬入另外一個窪仔
無明的暗夜
鍛就生命的強韌
耗空生命的強韌

用一種
權宜的誤讀佮詮釋
保持焐燒的溫度
用另外一種
權宜的誤讀佮詮釋
勾織出厚厚重重
刺蝟的毛草
袂當擋寒的武裝

不管時
保持警覺
不管時
目光集中佇大象
的尾溜
飛來飛去的胡蠅

不管時
演習練劍
為著不管時
會當進行征戰對抗
無分敵人
無分朋友

有人問起
累累傷痕的時
感覺榮耀佮安慰
總是命運賞賜
予咱生佇
無明的暗夜

陳建成2009 / 9 / 29

歷史的迴廊 —2 2 8（台語詩）

彎彎斡斡
歷史的迴廊
茫茫渺渺
敢講攏無攔遮的所在

是安怎
長長一甲子
阿媽猶有聽著
彼一日
雄雄狂狂
掃射過街頭的槍聲
無冤無仇四界討命

彎彎斡斡
歷史的迴廊
茫茫渺渺
敢講攏無安魂的所在

是安怎
長長一甲子
阿媽猶擱留咧
彼一暝
阿公無返來
彼雙恬甲無話無句
落佇路邊的舊淺拖

彎彎斡斡
歷史的迴廊
茫茫渺渺
敢講攏無正直的所在

是安怎
長長一甲子
阿媽過身的時
心肝窟仔
猶咧想
猶咧疼


陳建成2009 / 9 / 25

路邊的袈裟（台語詩）

浮浮搖搖的世情
敢有養命的可能

黃昏的天色淡薄仔迷惘
街路是河川店頭是驛站
按下殺性
按下癡貪
輕淡梳妝的是素食館

無看伊的渡船停佇叨位
來自遙遠的西方
猶是同款的人間
一軀黃黃的袈裟
點照城市入夜的黯淡

徛挺挺的是法杖
恬恬測度世俗的冷暖
圓輾輾的是銅缽
靜靜等待過路的善念
一軀黃黃的袈裟
一道幽微的考驗

浮浮搖搖的世情
敢有養命的可能


陳建成 2008/12/9

註：刊於海翁台語文學92期2009年8月

消費券的MV腳本（台語詩）





無人掠魚拍獵

無人種作開泉

天焦焦

地焦焦

豐年祭的音樂聲

Ui高高的山頂

一路放送到山腳



袂曉掠魚拍獵

袂曉種作開泉

大頭目

幼秀幼秀

白肉白肉

頭殼頂

插一隻雞毛

舉一支甘蔗

向西方開壇拜請

向南方作法施教

表演跳舞

表演唱歌



毋免掠魚拍獵

毋免種作開泉

大頭目跳舞唱歌

教咱勇敢向前行

教咱啥物攏免驚

我消費你

你消費我

先食的藥氣先行

先消費的先活命

管伊千斤萬斤

留予囝孫擔

Ui高高的山頂

一路消費到山腳



漸漸落山

日頭漸漸落山

愈來愈暗

愈暗愈寒

明仔載欲安怎

無人知影

大頭目

只賸… 繼續