我的阿媽真鑠奅

「有一日咱若老，揣無人共咱有孝……」收音機內底，正咧放〈家後〉這條歌。放完的時陣，阿媽越頭共我金金相，講：「這馬時代已經無仝矣，我毋免恁少年人規工踮我身軀邊踅來踅去，顛倒鑿目。」

我知影阮這位「古錐阿媽」的意思，伊毋是講無愛厝裡人陪，是伊嘛有家己的生活佮娛樂。譬論參里長姆仔開講、做志工，或者是對老人會去下港遊山玩水。有時陣我咧想，凡勢阿媽比我行踏過的所在閣較濟，因為伊竟然捌去過遙遠的加拿大𨑨迌。

是啊！為啥物老大人一定愛予人安排活動咧？佇這个遐爾進步閣多元的時代，每一个人攏會當決定欲過啥物款的生活，就算是有歲的人嘛同款！對阮阿媽身上，我看著的毋是荏身，顛倒是活了鑠奅，可以成做袂少人的idol呢！