趁新年；我好禮仔打包即付跳棋

[王立信]

趁新年；我好禮仔打包即付跳棋

 

國界 注定分明必然命定兮歷史

色緻 踏入意識形態文化兮坔埔

抖跳 反背細漢父母教示兮理路

勝利 手段對付粗魯經濟兮甲子

 

講啥物 保護地球兮肺？

剉樹比發芛兮速度 無較遲延

冰山崩落兮海湧 駛遊艇蹉跎恁兜兮厝邊

講啥物 減碳環保欲綠色？

現曾 盤古兮女媧夠旦猶底補藍藍缺角兮天

為啥物 千萬支兮煙筒向天頂閣一直底開銃

為啥物 爽勢科技戲弄網路下體惦世間公然底露現？

私生規堆吞袂落兮數據 虛虛實實 實實虛虛

吃食討債 為什麼農藥刁持參攬置落喉兮料理？

癌症煞變作普通兮內痔底醫

 

無要緊！天崩落來有萇跤兮來頂

金字塔型兮經濟若有錢 使鬼佗愈挨磨

豈採外太空徛起兮機票現步有較貴

抑若無錢矣 地球係恁永遠兮天

我；趁新年送走團圓圍爐 歸路塞車兮人客了後

 

趁新年；我無意中 好禮仔打包即付跳棋所寫兮詩。