阿母講；古早古早.土豆毋免炒

[王立信]

阿母講；古早古早.土豆毋免炒

阿爸兮神祇牌
囥佇紅格桌頂
作忌抑係二九冥
兄弟攏倒來圍爐。

阿母 飽足乳水
所生兮囝仔
有兮才調 有兮怯勢
總是 隨人去展現
有時星較光 有時月較圓
阿母講；有孝沒在佇言語
心意食水甜。

時間兮土石流 淹東溢西
阿爸兮神祇牌仔 浮浮沉沉
阿兄含小弟惦遐 諍來諍去
笑破厝邊頭尾兮褲底。

佳哉 阮係阿母撿飼矣
阿母飽足乳水 滿溢
並無增差 缺欠阮即個
厝內阮無算外人抑家己
紙頭紙尾無名
顛倒較清心快意。

聽儂講；素人是無畫妝
沒負擔 嗎免夯香缀拜
阮知 神祇牌係過去代
有孝阿母較實在。

阿母講；恁兄弟免相爭
前古早 拍虎掠賊親兄弟
才調 怯勢 攏無要緊
恁攏係我親生。

阿母講；
古早古早.土豆毋免炒…。