番薯有骨

[王立信]

番薯有骨
(追憶228牽手護台灣兮歷史意義)

誠確實是鉤著大條神經啦
代誌佗過遮尼久啊
才發現228牽手兮歷史意義
即目瞬若昨冥爾爾

彼袸相招相導 .分旗配帽
團隊夆分配惦楠仔坑高速公路跤
規路咧塞車嗎擋勿住血管兮通路
基隆到屏東若玆支龍骨鞭
四百公里. 兩百萬外人.聽候二點二十八分到
黑崁崁 .手牽手. 心連心
連阿公阿嬤紅嬰仔及坐輪椅兮人佗推推出來
霎那間思維 喘喟暫停止！心臟煞愈跳愈緊
時間佇歷史兮進行中結凍. 停電
閃動快門兮聲起起落落像雷公熾爦咧彈。

直昇機佇空中咧行禮.校閱.巡視咧見證諸個番薯仔兮心
啊！番薯有骨！原來番薯有骨.即支龍骨啦！
手牽手兮時親像通過電杉兮電流
逐個人神經線攏活起來
阮知；台灣人傷古意.唔閣心內斗底卻
隱藏著唐山過台灣兮勇氣
充滿黑水溝湍流兮氣魄。

台灣哪！汝即隻雉雞安怎這呢慢啼呢！
台灣哪！汝腰身兮龍骨啥物時才夯愈直呢！
前到旦佇有夢兮暝夢中阮猶原咧數念汝！