紅海 迦南 以色列【信仰詩】

[王立信]

紅海 迦南 以色列

以色列的上帝！阮的天父

你 旨意定著 憐憫人 流離喪鄉

你 執意追討 任憑人 硬心抵抗

你 信實無退 顯神跡 急時幫贊

.

當患難的日子飽足 就開活路

結束阮 見肖為奴 看做寶惜

降十災 擋法老 釋放伊的百姓

.

定意摩西 謙卑的柺 佇頭前導路

就按呢！海水造牆兩邊排 穩行乾地過紅海

埃及 兵車戰馬直直來 洶蓋蓋

摩西柺 指落此地界 淹死嘸免埋

.

雖然迦南的乳蜜 四十年後才愈得著

毋閣！雲柱火柱照腳步 予阮袂跋倒

嘴乾兼夭餓？

以琳石磐出水泉 鵪鶉嗎哪現燒燒

.

阮天頂的阿巴父！獨行奇事的上帝

創造萬物一切 乃至新天新地

祭物祢毋愛 祇愛尊崇聽伊話

祢的律例阮持守 任世界怎樣換替

掠住你的應允 阮實在福氣