撒該.落來【信仰詩】

[王立信]

撒該.落來

千萬粒心拍結球兮
鋼硬刺圭
轉踅一道關鎖
樓閣兮城闈
阮的心固守著
層層疊疊傷痕兮垛口

每每發射 致使人奧堪得
毒箭發落兮痕跡
推落汝 攀跁刺探阮
歸身朽破空隙兮天梯
掩嵌憂愁兮目結


缚一條敏感兮
地雷佇傷心兮引線
點灼難以制壓兮地火
予脆弱兮自尊破裂
抑免得肖想欲潛越 阮
椎心痛疼兮護城河
抑莫得懍恁 親像萬箭齊發
刁持恥笑來牽拖
佇互相尻脊背後兮暗路

當等 孤傲不可一世
在早佗坐好屈勢 像若我
腰身 箍盤著奧得開喙兮虛榮
在抖挫 一直佇遮
一直佇遐咧膨愴鼓脹著

滾強強兮音聲 引動阮心兮方向
惦遠遠的桑材樹頂咧瞭望
伊 挨狹著一句
若雷彈 貫耳即般兮溫柔
撒該 落來！今仔日救恩夠恁兜
俺娘喂； 耶穌咧叫我

彼時
冰點兮心結 予家己
若像亂馬狂奔兮大雪
唯塔嶺懸頂 緊速卸崩而落
撒該 像若我
跤踏著桑材樹透射兮
映映兮日光絲 可比翅股即般樣
輕輕柔柔兮心爽 輕秤
勻勻仔趨入去耶穌兮懷裡

不知怎樣呢！
阮心靈兮城闈煞咧響號角
哈利路亞 有天使咧唱歌
前夠旦 生命嶄然仔
換新意義。