無言之歌

[王立信]

無言之歌

毋願閣夯筆更試此段酸甘閣蜜甜兮過去,先輩再會;敬疼兮顏牧師及可愛兮牧師娘。寫毋寫無言之歌嗎沒啥增差抑啦;仝款兮結語爾爾。此站阮亦深刻覺悟乞求救贖兮人性軟弱兮模樣.此界汝決意別離.幾落擺心情五味雜濫,肖想日子唯頭閣開始;比較昔前約束講欲逗陣夠路尾兮心志;前夠旦咧……。沒疑誤映望兮出帆煞駛入袂轉舵兮湍流暗溝,留阮失落信仰兮倚靠.孤獨滋味尤其像今夜飄搖兮風雨冥.濕澹濕澹兮街路。豈采偆回味汝傳播兮聖言佮詩歌遮呢鮮明兮音聲,豈采猶原牽掛汝曾經釘根欲致意兮代誌.猶惦腦海裡咧拍箍.這陣亦雲淡風清抑啦。應該嗎著漸漸放捨遮兮籌謀及牽礙則對.亦隨在愁諸浮動.像來來去去兮海湧.拍岸夠伊恬靜煞去。指頭仔扼扼咧,拄好按算佇金針花遍野滿山兮節期,正式汝欲行前面綠色青翠兮魂夢境緻.諸個攏總;得確愛灌滿即寡仔勇氣兮風帆去迎旨啊.莫得閣越頭.毋甘已經行過吵嘈兮笑聲.親像眾醉茶香,率性親和兮日子.不爾過是擴大心兮胸脥,去開疆拓土排列陣勢;為主爭戰好兮爭戰爾爾.上時嗎為潤澤苦難兮台灣母親這遍土地.去認真拍拼涵養伊兮肥土啊!肯定是阮大家沒夠額兮福氣來聽趁汝有所不為.徛在兮調直硬氣.及聽趁接序欲展現汝沒欄柵.上媠兮才調所放射出來兮光輝.若愈得閣挽回,意願閣較真足咧寶惜汝純真兮笑容及論說兮風采.沒定是上天刁意固佇無聊兮世間.賞賜上好兮禮物像汝飄撇詩人性格兮柔情鐵漢,已經無地閣蒐揣抑啦.阮知;汝無張弛留落兮典範.定著;再創信仰高峯親像人文璀璨寶石發射兮光芒.天父惦天頂嗎愈明白清楚咧註記汝當初誓約兮堅持。亦銘記四年前汝助阮提筆掘挖心靈土地,汝講過:「心悶攏佇離別後,離別是再會兮源頭」。這兩句話嘛晟作無言之歌屯底結尾兮緬茉蕊啦……。
註：臺灣基督長老教會牧師係四年一聘.顏信星牧師受聘去屏東九如牧會進前.阮心內非常嘸甘.臨別前兮掙扎.感情難以割捨.所以寫批佇羅雅教會網站予伊.表達阮兮數念。夠旦亦三冬外啦. 羅雅教會網站亦關啦.唔拘阮懟伊兮懷念並沒綴著時間消失來減少.畢竟伊是鼓勵.啟蒙阮夯筆疼惜鄉土臺灣母親活活兮見證.閣是引導阮有尊嚴面對人生道路兮恩師啦。