耶穌的學生；台灣的人格者 高俊明牧師

[王立信]

耶穌的學生；台灣的人格者 高俊明牧師

悲傷是濛濛 斷崖
怨嗟是茫茫 大海
台灣啊！你無悲情的權利 失意的本錢
四百年來的映望
人權的鬥士 真理的捍衛者
蒐找人性起初的尊嚴
肩胛愈重 腰骨那挺

伊 耶穌的學生 台灣的人格者
當時 上帝創世伊甸的意念 置伊心中發生
習耶穌受苦的精神 誓做台灣魂
發動挺身的公義 呼吸仁愛的空氣
悲憤化義怒 做所當做 佇實踐中寫遺書
白色黑牢憂鬱藍 放捨身家受關監
意志及目屎灌沃自由的花蕊
喚醒塊睏的靈魂

堅持 上帝的教示
信心 希望 仁愛 公平的社會
拍造 真 善 美 佇地像天的地理
伊嘸做無味的鹽 嘸做斗底的光
為著族群的和好 人佮鄉土的親和
決意拆毀中間猜疑的牆
互白雲的天頂有野花的草芳味

伊有先覺者的悲憫
對台灣母親的疼 用一世人來顯明
目光的青暝兮啊 享受前人的蔭影 恁倘驚
緊去栽一叢樹仔栽 互你的子孫
正義的劍 積聚義憤的盾牌 已經出宿
您兜的門楣甘有插著一種叫做
福爾摩沙的艾草
艾草 愈互汝較疼惜咱的鄉土
盤過壓迫的怒火

後記：台灣心聲訪高俊明牧師 .知伊為這塊土地所做的事
感受伊願做台灣魂的情操佮高尚的人格. 堪為世代典範
由伊所行.就看出伊的確是耶穌的學生. 數念你！高牧師。

[丁信民]