業務員 - 頂pha：約伯ê死
「我甘願為著關係來棄捒一切。」
我ná聽伊講話，ná佇記持內底tshiau揣伊ê生張，伊teh欲30歲--ah，毋過面kháng看--起-來猶有囡仔相，若伊teh講話ê聲音佮話款是真幼秀，幼秀罔幼秀，he聲--ni̍h煞親像有包鐵筋，ē予人感覺伊對濟濟代誌心內攏有子午tī-leh。
藍國亞，1个2 工前猶生頭毋捌分ê人，tsit-má煞佇電話線ê hit爿teh講hit號伊甘願賣皮當骨來交換ê性命重心。
講--起-來伊毋是啥物熟似ê朋友，to 1个業務員niā-tiānn，因為阮公司ê資金調度是我teh tsiáng頭，所以ùi銀行到投資信託，ùi投資信託到資產管理，攏kā我當做in ê目標，有時陣，ē感覺家己親像Ahronglong Sakinu (亞榮隆．撒可努) ê冊--ni̍h，hit隻去予超級獵人Sakinu in pâ，tshuā Sakinu綿綿tsinn-tsinn jiok beh tsang--伊ê飛鼠，總--是好死毋死，我ê樹khang，是通人攏知ê秘密。
「我感覺你無sîng一般teh走業務--ê，in hiah-ê業務員為著做生理，攏袂輸ē hip倒--人，毋過hām你講話，ia̍h-tsiah是面會，攏感覺真輕鬆、真快活。」我柴關刀直破按呢kā講，ùi電話tsit-pîng聽ē--出來，伊毋是第1擺予人按呢kā呵咾--ah，伊to也老神在在，tsiann自然就koh kā話頭接紲--落-去，tsit khoo有影是生成做sales--ê。
「Heh heh，我teh賣--ê毋是人袂使無ê物件，毋過我向望我會當親像人性命內底袂使無ê mi̍h kāng款，猶佇leh ê時是hiah-ni̍h-á自然，ah若無--去ê時就不得了--a，袂輸1粒心用風筒灌風，感覺不止仔空虛，按呢人自然就袂kā我放袂記--tsit。」聽著伊按呢講，我ná像佇電話tsit-pîng，看著伊ê喙角ngiauh倒起--來，2爿喙phé浮頭，kā khong幼絲ê烏框目鏡lu懸，伊ê頭殼頂有lua̍h kah tshàng-tshàng，毋過koh袂hőng感覺jû亂ê短頭tsang，hit个人pān袂輸是佗1部bàng-gah內底ê âng-á--leh。
「啥物是性命中上kài重要ê物件？」我半心適kā問。
「Taokara，約伯記，你kám有讀過約伯記？」
「啥？你講啥？」我臨時臨iāu sa無tsáng，tsit khoo ê反應，有時陣ná深山林內欲暗仔無張持tah大濛，tshím頭to風日晴和，目tsi̍t-nih已經陷入斷半色水、連家己ê跤手to無看ê夢之世界。
「我、是、講、聖、經、ê、約、伯、記--lah。」伊重koh 1字1字呼音，了後接leh講，「雖bóng 我毋是教徒，毋過我teh想，咱若是有親像約伯hit款ê經驗，應該袂對啥物是性命中上kài重要ê物件想無路來。」
約伯記我捌讀--過，hit个故事ê過程比Hollywood ê特效koh較予人gông-ngia̍h，毋過若欲問我故事有啥物啟示，犯勢叫我分析Samuel Beckett ê《Waiting for Godot》ê對話ē較規氣。一來二去，he內容約其略是上帝允准魔鬼，用災厄電影ê手路，予義人約伯ê財產、囝兒查某囝佮伊ê健康tsiâu失落--去，來kā約伯試看伊ē反背上帝--無。
我決定欲直拄直來展tsi̍t-ē-á予知，我毋是hit款「3 ē咬；袂見餡」ê人，加話無講，隨就問伊：「若按呢講--起-來，你性命中上kài重要ê物件，是錢項財產、未來ê囝兒查某囝，ia̍h是勇健ê身體--leh？」
「我甘願為著關係來棄捒一切。」藍國亞攏無延緩就應，tse確實予我tsiann意外。
伊應著青碰白碰，予我tsua̋nn-á死喙，只好激恬等伊kā話拆明。
「Taokara，你感覺是啥物予你活著真紲phah、tsiann有興頭？是食了真tshenn-tshau、穿著真派頭、事業kài成功、ia̍h是家庭kài和諧？無--tsiá，kám是四界去tshit-thô看光景真lè-táu，ia̍h-tsiah是尻川鬥柄千富萬爛.........？」
「Eh.．．」 我想tsi̍t睏tsiah想著欲按怎kā應，「我感覺tsiah-ê代誌攏有一定ê價值！毋過講--起-來，嘛通比論咱teh食1盤salad，若準其他ê部份má-má-hu-hu，1个惜份ê人嘛有可能獨獨因為salad ê醬真利口，ia̍h-tsiah是菜蔬真青翠，就感覺爽神--ah。」
「若準講．．．Taokara.．．若準講予你有頂頭tse攏總ê福氣，毋過，煞無人了解--你，按呢你kám猶原ē滿足、快樂？」
我想我對tsit-ê問題猶無鼻縫，所以決定先做忠實ê聽眾。
「我是講，就準講你有tse攏總ê幸福，毋過你ê身軀邊無1个lo̍h-ngauh ê人來佮你分享，koh身軀邊攏無人佮你鬥搭，捌你ê language，知影你致意啥貨，teh想啥貨，若是按呢，就準kā全世界攏予--你，嘛袂感覺hiah-ni̍h-á生意，予人sannh心khùi，kám毋是？」
「Eh．．．毋過總是ē有1半个仔hit款ê人--ah！」我ná像想著啥物，真緊就kā應講，「人總--是有朋友hit款ê伴--ah，ah koh來，人ē嫁娶--ah，你免驚ē孤單無局--lah！」
「Taokara，你nah毋講做講，人koh ē生囝來tshiânn，囡仔嘛ē ta̍uh-ta̍uh-á大漢--leh？」
我聽ē出伊話內有話仁。
「人總是感覺講tsit个人，ia̍h hit个人，就有資格來擔任tsit个soul mate ê角色--ah，koh來，人koh phāu樂觀想講，若有tsit-ê人，自然tik伊ē佇適當ê時間佮咱sann tn̄g頭，事實上，tsiann濟人kah尾--á是姑不終著kā tsit个期待放予袂記--得，了後心sīnn孤sng，甚至連”家己真孤單” tsit个代誌嘛kā做伙hiat入去心內上內底ê hit个屜仔內，較免ke̍h目鑿心肝.....」藍國亞假若無欲擋括ê款，我ànn頭看手錶仔，雖然tsit个業務袂講真顧人怨，毋過tsit通電話to也有1段時間--a，tsit場已經無sîng業務拜訪ê對話嘛通好煞鼓--ah。
「藍--先-生，無的確有tsi̍t寡人in毋是按呢想--ê，我感覺講，若是1个人伊ê人際關係tsiann正常，嘛不一定著用tsit款tsiah “集中”ê方式，來排比hit號揣人做伴、予人了解ê需要；毋過，我承認.....若有1工發現家己ê牽--ê毋是soul mate，煞著愛逐工sann倚傍，鬥陣生活徛起、睏sann隔壁.....，tsit款ê情況有影是khah礙謔......」
「檢采是按呢ê款，Taokara，檢采只有我tsit款佮厝內人生疏，佮朋友來去嘛凊tè-tè ê人，tsiah ē tsiah致意hit號soul mate iah毋是soul mate ê問題.....」伊無張無持煞笑出聲，「你定著感覺我講ê話tsiânn sông-tâng--hoonnh！」
「袂--ah，nah ē--lah！」我猶袂赴斟酌kā想伊tsit句話是半sńg笑iah是頂真--ê，毋過我真好禮kā否認，「是講，真少人ē願意講tsiah-ê代誌，eh...想看覓...有人通tháu心內話嘛bē bái--neh.....」我無tin無tang又koh佇記持內底teh tshiau揣，我已經有偌久無hām別人講破腹話--a，除了公司佮厝--ni̍h ê代誌，我佮身軀邊ê人的實毋是tsiann了解互相心內teh想啥，袂輸連我家己就強欲無熟似我家己--ah。
Koh kap伊lā幾句á套頭話了後，總算有才調kā電話切斷，開始無閒手頭ê代誌。
我無kā hiah-ê話囥佇心--ni̍h，hiah-ê想法siunn怪孽--ah，無必要去深想。Thài-thó ē知我掠準無軁入心--ni̍h ê hiah-ê話，兩工後煞來佇我ê夢中teh tak纏。
佇夢--ni̍h我變做hit个衰尾約伯，親目看著捲螺á風kā我饒裕ê家產佮下跤手人攏掃kah無khuàinn影--去，了後方時風掀厝蓋，規間厝綴leh崩倒離離，可憐去硩死我ê糖霜丸、我心愛ê囝兒查某囝--ooh，當我phak佇土跤放聲慘háu ê時，koh發現田螺sô有tsuā，夯雙連枷猶無夠額，tī時我家己規身軀攏生毒瘡，是疼koh tsiūnn，予人張欲tsìh-tsài袂牢。
Tann我總算會當體會是按怎《約伯記》內底，約伯ē sa hāu-phiann-phè來khau毒瘡--ah，我ê婦jîn人，我ê牽手，伊為著tsit个家ê流擺teh怨天tsheh地；了後是hit 3个朋友來拜訪，袂輸teh唸歌訣--leh，講kah lò-lò長，teh開破我是按怎ē去犯著走馬天罡，毋過tse攏總ê怨嘆、頭理路直ê分拆佮青臆白臆，tsiâu是隔衫teh糊藥，攏較無hāu-phiann-phè khau毒瘡hiah直透入心。
我坐佇火灰中ai-tshan吐大氣，kā火灰掖佇家己ê頭殼頂，gia̍h頭tsi̍t-ē看，煞siam見魔鬼佮上帝佇雲--ni̍h teh應答。
「你koh有想欲創--啥-無？你感覺著koh kā啥物kā搶走，tsiah有法度予伊規个人崩敗？」上帝按呢問魔鬼。
「Heh heh.....毋免偌久，做你kā看！」Tse魔鬼看--起-來生毛帶角，ná講ná奸臣á笑，「人就準生活饒裕，猶原著愛面對1个人上深ê空虛；我kā伊攏總ê mi̍h齊搶--去，其實是催化劑爾爾。」魔鬼小停tsi̍t睏，hit个面bái kah ē驚--人，koh因為siunn過頭揚氣，無意中起bán-tshuah，「你注意kā看！無人了解--伊，無人體會--伊，無人佮伊kāng心，嘛無人佇起起落落ê人生路站--ni̍h tsham伊分享，讀捌伊ê心內話，tse就是伊每1工、逐月日、每1 冬上kài大e拖磨.....」，魔鬼「koh....koh.....koh」笑出聲，ná像機械敗馬hit款艱苦聽ê噪音，「伊擋袂久--a-lah.....」
聽著tsit个應答，我袂輸徛佇法官ê面頭前聽著死刑判決，koh親像看著家己予孤單佮空虛ê生活teh凌遲，慢慢á失去意志。
雄雄我欶1口氣，uì凶夢精神--過-來，規身軀重汗無顧，連大氣to喘袂離，四箍輦轉烏烏暗暗，看無半人，獨獨我1 个、家己1个爾爾，耳khang邊hōng-hōng叫--ê，是干焦家己袂輸he-ku、喘kah ná半暝牛跋深潭，tū水lo̍k-kok ê聲音。
（猶未煞）
我ná聽伊講話，ná佇記持內底tshiau揣伊ê生張，伊teh欲30歲--ah，毋過面kháng看--起-來猶有囡仔相，若伊teh講話ê聲音佮話款是真幼秀，幼秀罔幼秀，he聲--ni̍h煞親像有包鐵筋，ē予人感覺伊對濟濟代誌心內攏有子午tī-leh。
藍國亞，1个2 工前猶生頭毋捌分ê人，tsit-má煞佇電話線ê hit爿teh講hit號伊甘願賣皮當骨來交換ê性命重心。
講--起-來伊毋是啥物熟似ê朋友，to 1个業務員niā-tiānn，因為阮公司ê資金調度是我teh tsiáng頭，所以ùi銀行到投資信託，ùi投資信託到資產管理，攏kā我當做in ê目標，有時陣，ē感覺家己親像Ahronglong Sakinu (亞榮隆．撒可努) ê冊--ni̍h，hit隻去予超級獵人Sakinu in pâ，tshuā Sakinu綿綿tsinn-tsinn jiok beh tsang--伊ê飛鼠，總--是好死毋死，我ê樹khang，是通人攏知ê秘密。
「我感覺你無sîng一般teh走業務--ê，in hiah-ê業務員為著做生理，攏袂輸ē hip倒--人，毋過hām你講話，ia̍h-tsiah是面會，攏感覺真輕鬆、真快活。」我柴關刀直破按呢kā講，ùi電話tsit-pîng聽ē--出來，伊毋是第1擺予人按呢kā呵咾--ah，伊to也老神在在，tsiann自然就koh kā話頭接紲--落-去，tsit khoo有影是生成做sales--ê。
「Heh heh，我teh賣--ê毋是人袂使無ê物件，毋過我向望我會當親像人性命內底袂使無ê mi̍h kāng款，猶佇leh ê時是hiah-ni̍h-á自然，ah若無--去ê時就不得了--a，袂輸1粒心用風筒灌風，感覺不止仔空虛，按呢人自然就袂kā我放袂記--tsit。」聽著伊按呢講，我ná像佇電話tsit-pîng，看著伊ê喙角ngiauh倒起--來，2爿喙phé浮頭，kā khong幼絲ê烏框目鏡lu懸，伊ê頭殼頂有lua̍h kah tshàng-tshàng，毋過koh袂hőng感覺jû亂ê短頭tsang，hit个人pān袂輸是佗1部bàng-gah內底ê âng-á--leh。
「啥物是性命中上kài重要ê物件？」我半心適kā問。
「Taokara，約伯記，你kám有讀過約伯記？」
「啥？你講啥？」我臨時臨iāu sa無tsáng，tsit khoo ê反應，有時陣ná深山林內欲暗仔無張持tah大濛，tshím頭to風日晴和，目tsi̍t-nih已經陷入斷半色水、連家己ê跤手to無看ê夢之世界。
「我、是、講、聖、經、ê、約、伯、記--lah。」伊重koh 1字1字呼音，了後接leh講，「雖bóng 我毋是教徒，毋過我teh想，咱若是有親像約伯hit款ê經驗，應該袂對啥物是性命中上kài重要ê物件想無路來。」
約伯記我捌讀--過，hit个故事ê過程比Hollywood ê特效koh較予人gông-ngia̍h，毋過若欲問我故事有啥物啟示，犯勢叫我分析Samuel Beckett ê《Waiting for Godot》ê對話ē較規氣。一來二去，he內容約其略是上帝允准魔鬼，用災厄電影ê手路，予義人約伯ê財產、囝兒查某囝佮伊ê健康tsiâu失落--去，來kā約伯試看伊ē反背上帝--無。
我決定欲直拄直來展tsi̍t-ē-á予知，我毋是hit款「3 ē咬；袂見餡」ê人，加話無講，隨就問伊：「若按呢講--起-來，你性命中上kài重要ê物件，是錢項財產、未來ê囝兒查某囝，ia̍h是勇健ê身體--leh？」
「我甘願為著關係來棄捒一切。」藍國亞攏無延緩就應，tse確實予我tsiann意外。
伊應著青碰白碰，予我tsua̋nn-á死喙，只好激恬等伊kā話拆明。
「Taokara，你感覺是啥物予你活著真紲phah、tsiann有興頭？是食了真tshenn-tshau、穿著真派頭、事業kài成功、ia̍h是家庭kài和諧？無--tsiá，kám是四界去tshit-thô看光景真lè-táu，ia̍h-tsiah是尻川鬥柄千富萬爛.........？」
「Eh.．．」 我想tsi̍t睏tsiah想著欲按怎kā應，「我感覺tsiah-ê代誌攏有一定ê價值！毋過講--起-來，嘛通比論咱teh食1盤salad，若準其他ê部份má-má-hu-hu，1个惜份ê人嘛有可能獨獨因為salad ê醬真利口，ia̍h-tsiah是菜蔬真青翠，就感覺爽神--ah。」
「若準講．．．Taokara.．．若準講予你有頂頭tse攏總ê福氣，毋過，煞無人了解--你，按呢你kám猶原ē滿足、快樂？」
我想我對tsit-ê問題猶無鼻縫，所以決定先做忠實ê聽眾。
「我是講，就準講你有tse攏總ê幸福，毋過你ê身軀邊無1个lo̍h-ngauh ê人來佮你分享，koh身軀邊攏無人佮你鬥搭，捌你ê language，知影你致意啥貨，teh想啥貨，若是按呢，就準kā全世界攏予--你，嘛袂感覺hiah-ni̍h-á生意，予人sannh心khùi，kám毋是？」
「Eh．．．毋過總是ē有1半个仔hit款ê人--ah！」我ná像想著啥物，真緊就kā應講，「人總--是有朋友hit款ê伴--ah，ah koh來，人ē嫁娶--ah，你免驚ē孤單無局--lah！」
「Taokara，你nah毋講做講，人koh ē生囝來tshiânn，囡仔嘛ē ta̍uh-ta̍uh-á大漢--leh？」
我聽ē出伊話內有話仁。
「人總是感覺講tsit个人，ia̍h hit个人，就有資格來擔任tsit个soul mate ê角色--ah，koh來，人koh phāu樂觀想講，若有tsit-ê人，自然tik伊ē佇適當ê時間佮咱sann tn̄g頭，事實上，tsiann濟人kah尾--á是姑不終著kā tsit个期待放予袂記--得，了後心sīnn孤sng，甚至連”家己真孤單” tsit个代誌嘛kā做伙hiat入去心內上內底ê hit个屜仔內，較免ke̍h目鑿心肝.....」藍國亞假若無欲擋括ê款，我ànn頭看手錶仔，雖然tsit个業務袂講真顧人怨，毋過tsit通電話to也有1段時間--a，tsit場已經無sîng業務拜訪ê對話嘛通好煞鼓--ah。
「藍--先-生，無的確有tsi̍t寡人in毋是按呢想--ê，我感覺講，若是1个人伊ê人際關係tsiann正常，嘛不一定著用tsit款tsiah “集中”ê方式，來排比hit號揣人做伴、予人了解ê需要；毋過，我承認.....若有1工發現家己ê牽--ê毋是soul mate，煞著愛逐工sann倚傍，鬥陣生活徛起、睏sann隔壁.....，tsit款ê情況有影是khah礙謔......」
「檢采是按呢ê款，Taokara，檢采只有我tsit款佮厝內人生疏，佮朋友來去嘛凊tè-tè ê人，tsiah ē tsiah致意hit號soul mate iah毋是soul mate ê問題.....」伊無張無持煞笑出聲，「你定著感覺我講ê話tsiânn sông-tâng--hoonnh！」
「袂--ah，nah ē--lah！」我猶袂赴斟酌kā想伊tsit句話是半sńg笑iah是頂真--ê，毋過我真好禮kā否認，「是講，真少人ē願意講tsiah-ê代誌，eh...想看覓...有人通tháu心內話嘛bē bái--neh.....」我無tin無tang又koh佇記持內底teh tshiau揣，我已經有偌久無hām別人講破腹話--a，除了公司佮厝--ni̍h ê代誌，我佮身軀邊ê人的實毋是tsiann了解互相心內teh想啥，袂輸連我家己就強欲無熟似我家己--ah。
Koh kap伊lā幾句á套頭話了後，總算有才調kā電話切斷，開始無閒手頭ê代誌。
我無kā hiah-ê話囥佇心--ni̍h，hiah-ê想法siunn怪孽--ah，無必要去深想。Thài-thó ē知我掠準無軁入心--ni̍h ê hiah-ê話，兩工後煞來佇我ê夢中teh tak纏。
佇夢--ni̍h我變做hit个衰尾約伯，親目看著捲螺á風kā我饒裕ê家產佮下跤手人攏掃kah無khuàinn影--去，了後方時風掀厝蓋，規間厝綴leh崩倒離離，可憐去硩死我ê糖霜丸、我心愛ê囝兒查某囝--ooh，當我phak佇土跤放聲慘háu ê時，koh發現田螺sô有tsuā，夯雙連枷猶無夠額，tī時我家己規身軀攏生毒瘡，是疼koh tsiūnn，予人張欲tsìh-tsài袂牢。
Tann我總算會當體會是按怎《約伯記》內底，約伯ē sa hāu-phiann-phè來khau毒瘡--ah，我ê婦jîn人，我ê牽手，伊為著tsit个家ê流擺teh怨天tsheh地；了後是hit 3个朋友來拜訪，袂輸teh唸歌訣--leh，講kah lò-lò長，teh開破我是按怎ē去犯著走馬天罡，毋過tse攏總ê怨嘆、頭理路直ê分拆佮青臆白臆，tsiâu是隔衫teh糊藥，攏較無hāu-phiann-phè khau毒瘡hiah直透入心。
我坐佇火灰中ai-tshan吐大氣，kā火灰掖佇家己ê頭殼頂，gia̍h頭tsi̍t-ē看，煞siam見魔鬼佮上帝佇雲--ni̍h teh應答。
「你koh有想欲創--啥-無？你感覺著koh kā啥物kā搶走，tsiah有法度予伊規个人崩敗？」上帝按呢問魔鬼。
「Heh heh.....毋免偌久，做你kā看！」Tse魔鬼看--起-來生毛帶角，ná講ná奸臣á笑，「人就準生活饒裕，猶原著愛面對1个人上深ê空虛；我kā伊攏總ê mi̍h齊搶--去，其實是催化劑爾爾。」魔鬼小停tsi̍t睏，hit个面bái kah ē驚--人，koh因為siunn過頭揚氣，無意中起bán-tshuah，「你注意kā看！無人了解--伊，無人體會--伊，無人佮伊kāng心，嘛無人佇起起落落ê人生路站--ni̍h tsham伊分享，讀捌伊ê心內話，tse就是伊每1工、逐月日、每1 冬上kài大e拖磨.....」，魔鬼「koh....koh.....koh」笑出聲，ná像機械敗馬hit款艱苦聽ê噪音，「伊擋袂久--a-lah.....」
聽著tsit个應答，我袂輸徛佇法官ê面頭前聽著死刑判決，koh親像看著家己予孤單佮空虛ê生活teh凌遲，慢慢á失去意志。
雄雄我欶1口氣，uì凶夢精神--過-來，規身軀重汗無顧，連大氣to喘袂離，四箍輦轉烏烏暗暗，看無半人，獨獨我1 个、家己1个爾爾，耳khang邊hōng-hōng叫--ê，是干焦家己袂輸he-ku、喘kah ná半暝牛跋深潭，tū水lo̍k-kok ê聲音。
（猶未煞）
-
施俊州在11:53pm對2009 八月 30的評論
-
Ah ē-pha--leh？
.
-
Voyu Taokara Lâu在9:32am對2009 八月 31的評論
-
Koh有兩pha，是幾若冬前寫--e，當原初是華語，兩三冬前捌試翻台語，翻kah三分二擋恬，tann koh掀出來看，重巡，雖罔主要是改翻譯e部份，m-koh我跤手有較慢...ai koh等--tsit-e.....
-
胡長松在10:05am對2009 八月 31的評論
-
我嘛底等neh...
-
-
恁讀著攏真緊...你kap俊州發表e小說ke真長，我ma tioh用時間讀，所以我tsit爿koh ai等khah久--leh....XD
（其實我tsit-ma ti學校圖書館，今仔日有設定beh揣幾篇a論文，koh來碩論欲寫e部份需要參考--著）。
意見
您必須是成員才能發表評論！
加入 台文戰線聯盟