意識型態

[王立信]

意識型態

 

副手 全無聲較濟

毋閣伊辯解兮嘴唇皮仔

明明寫二字 白賊

 

老

 

開始欣賞秋兮淒清 含

春風勻勻吹徙葉尖 佮

樹縫波光洩落來兮水影

 

中國人

 

睏獅青龍全化牛

勝王敗寇天霧霧

紅樓夢中大觀園

若行專制攏加舞

 

騙術

 

先作結論後鋪張 添目頭

抑 感動咧！

文人相輕兮世代

 

冊包

 

起立.敬禮.坐下

各位同學…

啊！我兮一生

 

老師

 

所以 傳道 授業…

報告老師

有人放屁

 

保險套

 

愛卿平身 寡人

龍心大喜 出旨

風調雨順 國泰民安

 

菩提本無樹

 

拈花微笑 短詩

挽花文笑 散文

挫樹大笑 小說

 

耳鳴

 

青梅佗戀慕 嘈唸是本科

有即工 伊尖聲嚎叫

醫師.牧師.律師.隨在汝揀

 

水肥車兮哲理

 

抽 臭皮囊偆兮卡路里

千拳歸一路 萬病歸脾土

哦！人原來攏係糞土

 

 

行刑犯

 

前 鐵齒銅牙敢吞熊心豹膽

旦 閃尿消毒軟腳蝦浸酒

掩目硬硬吞落