台文戰線聯盟

嘴唇內兮舌

頑孽兮時 天雷 地火 閃熠
柔順兮時 涼風 冷泉 虹天

伊 是心靈殿院武士腰下雙鋒兮利劍
身軀懷著光明及烏暗兮鎖匙
歷史是伏拜兮溪流 向汝

伊 不時徘徊 徘徊佇子午線頂
良善及罪惡佇汝雙旁 搖來擺去
汝是玆班來來回回 袂停兮捷運車
發動著瞬間兮意念

汝若是 王頭壳頂謙遜兮冕旒
阮願是彼粒上細粒兮珍珠 至少
珍珠是屬佇高貴兮血統
若準汝妖嬌兮媚眼 如蛇
勾引著豺狼兮身軀 跳舞
阮決斷欲親像弓箭 離汝
遠 遠 遠………

天頂兮阿爸父 萬權能兮上帝
求汝用燒炭鮮血兮紅
擦掉阮牙槽裡垃散兮嘴舌
佮阮三分鐘熱度兮意志

免得終其尾
攑柴添火灼 將阮放火燒
囥佇地獄兮火爐
若無 賜阮恬靜 永遠袂出聲
予單單注目汝兮眼神 誠實
免得流落街頭 親像無主兮曳尾狗
汰疙爛濁四界走

後記:「激勵」的話語若一股兮燒烙
渴慕著拍開阮心內兮門窗
惦屬佇寒冰即般樣兮世間迴響
良知兮深處深深咧相磕
因為 這是上帝兮國度!
阮想!的確無人願意接受 撒旦兮祝福
好話兮嘴舌 嚴冬變春天 百花齊齊開
苦情山谷流甜水 白雲飄來春風去 祝福滿滿是
草木青翠 青春正當時 頓時怨妒苦毒攏無去
啊!短短三寸舌 大甲透拄天 袂使無細膩

檢視次數: 105

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款