畢業了後上重要的代誌～～繼續看冊

[黃靜惠]

畢業了後上重要的代誌～～繼續看冊

 

　　一定有袂少的學生囡仔佇畢業彼一工，定定想欲共冊包擲掉，抑是想欲共往過讀的冊燒掉，閣咒誓後擺永遠無愛閣讀冊矣。這層代誌我哪會知咧，講起來就真歹勢，因為我嘛捌少年青春過。想當年，阮高中聯考一結束，新聞就報有一位考生佇高雄愛河邊共冊包擲入愛河內底，閣佇河邊若起痟按呢烏白亂叫，共大家驚一趒，驚伊一時想袂開跳愛河自殺，就趕緊報警，好佳哉伊只是考試壓力傷大叫叫敨氣一下，並無想袂開。考牢大學，逐家想的就是會當好好仔耍四年，畢業了後揣一个頭路，結婚生囝，從此幸福快樂過一世人。

　　其實，經過遮濟年，發現真正的學習是佇離開學校才開始，因為佇社會走跳揣工課食頭路，真濟代誌攏是學校的老師佮教授毋捌教過的。所以，閱讀無應該佇你畢業彼一工變做永遠停止的紅燈，有真濟冊畢業了後嘛是愛閣讀。

　　這陣熱天6月是學生畢業的季節，網路頂就有一篇文章講，專業進修、偏好議題佮個人理財，是三種冊畢業了後嘛是愛讀的冊。我個人認為個人經濟計畫佮管理，嚴格來講嘛是偏好議題的一種，如此論真講起來畢業了後一定愛讀的冊只有兩種，就是發展專業佮培養興趣。會當看足濟足濟的冊是誠好，毋過萬不利，若是無遮濟時間，因為家庭、事業、朋友攏需要時間經營、拍拚佮交陪，實在是予人怨嘆時間有限，常在無夠用，恨不得一工有72點鐘，會當一工做三工用按呢上好。無要緊，這陣咱會當濃縮提煉，共專業和興趣結合，好好仔選一本冊，認真共讀了，按呢閱讀對咱生活鬥幫贊的效果一定閣較好。

　　對六月初一開始，就聽著六年仔逐班開始咧唱「我已經大漢」這條歌，閣袂歹聽呢，佮往過欲哭欲啼的畢業歌攏無仝款。我就共教六年仔的閩南語老師討歌詞和ＣＤ，有閒就放來聽，那聽那綴咧唱，想欲共學起來。可惜，這馬老矣，聽十幾遍閣記袂起來，無像往過聽兩三遍就記起來矣。　　

　　雖罔，好話一句講三遍連狗嘛嫌的道理我嘛知，毋過為著咱的下一代好，佇這个歡喜鬧熱恭喜畢業生畢業的時陣，我就閣加講一句，向望咱的畢業生，畢業了後，逐工除了看「人面冊」，嘛愛小可撥一下工，三不五時，好好仔看一下仔冊。若無，洗身軀的時陣，閣共「我已經大漢」加唱幾遍，複習一下，溫故知新嘛袂䆀。

 

我已經大漢

 

　　　　　　　　　　今仔日　鳳凰花紅紅

　　　　　　　　　　阿母講　我已經大漢

　　　　　　　　　　愛勇敢面對未來的挑戰

　　　　　　　　　　做一个認真拍拚的人

 

　　　　　　　　　　同學　咱已經變大漢

　　　　　　　　　　雖然猶毋是真正的大人

　　　　　　　　　　猶無真濟真濟的負擔

　　　　　　　　　　但是咱愛有家己媠媠的夢

 

　　　　　　　　　　我已經大漢　感謝老師

　　　　　　　　　　陪我度過種種的難關

　　　　　　　　　　想起咱這馬欲來分西東

　　　　　　　　　　心情有淡薄仔毋甘

 

　　　　　　　　　　我已經大漢　祝福同學

　　　　　　　　　　會當完成美好的願望

　　　　　　　　　　希望咱過了快樂閣平安

　　　　　　　　　　將來做一个有路用的人

 

　　講遮爾濟，就是希望逐家畢業了後，毋通袂記家己的本土語言，親像王昭華寫的歌詞「大樹青青」仝款，大樹青青，鳳凰花開，小學六年真毋簡單建立起來的閩南語根底，點點滴滴，向望同學，永遠莫放袂記。

 

大樹青青

　　　　　大樹青青　鳳凰花開　南風溫柔吹起

　　　　　紅色蝴蝶　欲來離枝　飛向家己的藍天

 

　　　　　點點滴滴　小學六年　難忘美麗回憶

　　　　　感念感心　老師同窗　再會重逢何時

 

　　　　　蟬聲依依　響亮上天　精神遐爾飽滇

　　　　　寂寞韆鞦　幌來幌去　擛手告別童年

 

　　　　　點點滴滴　小學六年　永遠莫忘記

　　　　　感謝感恩　老師同學　祝福前程萬里

 

基隆市閱讀教育電子報第 75 期105.06