台文戰線聯盟

柯柏榮的台語詩〈劍獅的死忠〉

劍獅的死忠

「劍!絚絚(ân-ân)咬佇歷史的風風雨雨
一咬400冬,堅持毋放鬆!」

古蹟解說員的兩片喙唇皮
捘(tsūn)開規條老街的嚨喉空
烏巴桑哼歌仔戲、囡仔唸囡仔歌
穿洋裝的女高音、穿西裝的男低音,猶有
假聲男高音徛踮選舉車頂大聲呵咾

每一塊紅磚仔奏出挨挨陣陣的跤步聲調
親像海湧掀開古冊嚷甲大細聲
絞絞滾的音波鑽入我的鼻目喙咧紡干樂
佳哉!一塊百年老店落漆的招牌
將我的目睭扶牢咧

過晝大塊大塊的日頭光
Phiann佇老街的尻脊
凝做一丸一丸的柑仔色
雄雄一箍阿啄仔清嚨喉的聲尾
射向招牌
頂沿的塗沙粉一絲一絲
唯王城的奢颺
輾落府城的拋荒地
掖佇缺角的門額、照牆、刀劍屏
倒彈的光影
佇古早佮現代的敆縫跳格仔

妖魔逃袂開祢的五爪掌
鬼怪閃袂過祢的目劍箭
不變的眼神
四个世紀巡透透
一支劍咬著歷史榮衰的重量

改朝換代的業障硩佇祢的尻脊骿
粗勇的年歲佇繁華的逼趕中老去
咬佇喙內的劍已經行過一个歲月閣一个歲月
已經將昨日躺成明仔再
已經將流亡四世紀的面皮
深深印入我好玄的目睭內

文明的漚筆將祢的厝邊頭尾
漆成一隻一隻花巴哩貓
粗身重骨的命格
據在大官虎的怪手咧舞豬舞狗
規條老街的龍骨
據在時代的烏漉手咧弄鼎弄灶
殘破的面皮一張一張蝹(un)佇文明的壁角
青苔侵門踏戶,白蟻軟塗深掘
光帕帕的歷史翕佇舊siat-siat的文獻哼哼呻
重khuâinn-khuâinn的傳說吊佇老mooh-mooh的喙角盪盪晃
400冬的守護激出文明的殘酷
400冬的傳奇縮做一張雄威的獅仔面
啊!台灣上重的面皮──

一輪失血的月娘phak佇祢皺phé-phé的額頂
生瘡的年代
銅鉎(sian)仔味親像風颱凌遲過的土石流
祢死忠的目神
毋願據在凊冷的新朝代判出局
猶原用上tīng-táu的力頭
堅持將喙角的
劍!絚絚咬佇
歷史的風風雨雨
靜靜聽候造化予祢
上尾的答案

----刊佇《掌門詩學》58期

檢視次數: 158

意見

您必須是成員才能發表評論!

加入 台文戰線聯盟

© 2020   Created by 胡長松.   管理小組

成員徽章  |  報告問題  |  服務條款