台文戰線聯盟

https://readpaper.kl.edu.tw/index.php?id=994

基隆市閱讀電子報第74期主題

煞(sannh)著看冊~對囡仔歌開始   

      佮唐山話豐沛的肥底比起來,閩南語就若像可憐gâu欶水的瘦田仝款,無論咱按怎沃水、掖肥,伊定定嘛是焦涸涸結無子。無奈何,干焦會當感嘆咱是欲按怎來培養學生囝仔看閩南語文章的慣勢呢?   

      毋過,底蒂無好毋是問題,人戇嘛毋是上帝的錯誤,我相信一枝草一點露,隱痀的食雙點,天無絕人之路,因為危機就是轉機,世間絕對無予人白食的中晝頓。有人講,設使偉大的發明家愛迪生,若準知影欲予電火球發光就愛用鎢絲,伊就毋免經歷千千萬萬遍的失敗;不而過,愛迪生捌講過,若無這千萬遍的失敗,伊嘛無法度知影鎢絲會當予電火球發光遮爾久。雖罔,凡事起頭難,但是只要咱堅持做著的代誌,一年、兩年、三年……,沓沓仔做,一定會進步,連作家凌拂嘛講:「對一欉樹去熟似第二欉樹,對這粒山看著後一粒山,按呢就袂䆀矣。」

   所以,這个時陣囝仔歌就是閩南語上好的閱讀教材,因為伊旋律簡單,用字淺白,好念好唱閣好耍,而且內容有笑詼嘛有智識,真正是一兼二顧,摸蜊仔兼洗褲,用伊來做推捒閩南語閱讀教材的火車頭,會使講是拄拄仔好。   親像華語有一條教囡仔算數字的囡仔歌叫做『數蛤蟆』,細漢的時陣咱攏捌唱過,會曉算的人閣會愈唱愈緊,害阮常在算甲重耽花去綴袂著,彼當時感覺足見笑,就開始拍拚學算數,這馬想起來真趣味。其實,閩南語嘛有一首這款的囡仔歌,就叫做「學算數」。        學算數     

連算貓,學算數,連算數數一隻貓,     

一隻貓頭兩肢耳,一肢貓尾四肢跤。     

連算貓,學算數,連算數數兩隻貓,     

        兩隻貓頭四肢耳,兩肢貓尾八肢跤

        …………

  逐擺囡仔若做伙唸歌,逐家就開始比賽看啥人唸較緊,看in認真綿爛算數,閣愛用閩南語唸出來,常常袂赴講,喙齒強強欲咬著喙舌的表情,實在有夠古錐,若是厲害的學生囡仔會當一直算甲十幾隻。

  另外,若是講著菜蔬,譬論講二年仔課本真平版內底就有一課「高麗菜」。     

高麗菜     

高麗菜,高麗菜,人客來買高麗菜,

買一粒轉去試看覓,試了若好才閣來。

  這課課文好唱閣好聽,囡仔真緊就學起來矣。老師就有真濟冗剩時間補充其他菜蔬的講法,不過干焦教各種菜蔬按怎講,實在傷四常、傷無聊。好佳哉,閣有一長一短兩首囡仔歌嘛佮菜蔬果子有關係,較短的彼首叫做「白的白翎鷥」。

白的白翎鷥

白的白翎鷥,紅的是紅柿,檨仔青酸濫甜食甲烏喙齒;

鴨肉配薑絲,韭菜炒大麵,身軀也有兩仙錢想欲食魚翅。   臺灣童謠用白翎鷥做起頭的袂少,親像:「白翎鷥車畚箕」、「白翎鷥擔柳枝」、「白翎鷥白溜溜」。這首「白的白翎鷥」囡仔就會當學著紅柿、檨仔、檨仔青、鴨肉、薑絲、韭菜、大麵、魚翅,佮食物有關的語詞。另外較長的彼首叫做「正月正」,in攏是方子文作詞,施福珍作曲的臺灣囡仔歌。           

正月正     

正月正請囝婿入大廳,二月二刣豬公來謝土地,

三月三桃仔李仔伨頭擔,四月四桃仔來李仔去, 

五月五龍船鼓水內渡,六月六踏水車拍磟碡,

  七月七龍眼烏石榴必,八月八牽豆藤挽豆莢,

 九月九風吹滿天吼,十月時冬瓜糖霜落餞盒,

十一月年兜邊人挲圓,十二月穿新衫通過年。

  這首囡仔歌除了會當學著桃仔、李仔、龍眼、石榴、豆藤、豆莢、冬瓜以外,閣會當學習in佮民俗節氣的關係。若是閩南語能力閣較好的學生,嘛會當予in欣賞「賣菜義」佮「安童哥買菜」這兩首流行歌。

  「賣菜義」佇民國62年出版,本底歌詞內容是改編貍貓換太子其中的一段生活小故事,描寫賣菜和買菜時發生的五仁詼諧,唱出當時社會一般老百姓的生活心聲,這嘛是伊佇彼當時受歡迎的原因。作詞者陳和平先生有一工佮朋友相約佇台北市民生西路的波麗露西餐廳見面,等來等去攏等無人,雄雄煞聽著外口有人大聲喝:「賣菜喔!欲買菜的人緊來喔!」打動著伊的心,伊筆提起來連鞭共家己所見、所聞、所想寫成歌詞。只是,伊平常時也無去菜市仔買菜,對菜蔬的了解有限,後來請牽手鬥相共,才順利完成「賣菜義」的歌詞,落尾布袋戲大師黃俊雄佇台視演出「雲州四傑傳」,戲中安排一位「賣菜義仔」的角色,閣配合劇情放送這塊歌曲,致使這首歌曲,到今猶原深深受著足濟歌迷的喜愛。這馬咱會當藉由欣賞這首曲調輕鬆的台灣歌謠,予小朋友熟識菜蔬並且體會早期賣菜人的辛苦。

           賣菜義

賣菜義仔囉……透早出門做生意 

毋管酸風冷吱吱 擔著青菜向菜市啊一直去 

為著欲趕早市 毋通踮遮閣延遲 緊來走 緊來去 

目一下nih 看一下去 已經行到菜市仔邊

嘿!嘿都真佳哉 啊隔壁攏猶未人來擺

我著緊來開市嘛才應該 咦……

喔!遠遠看著小姐捾菜籃咧對遮來唷

你是今仔日第一个人客應該著犧牲大減價

我的菜蔬是真濟 應有盡有無問題

啊你欲芹菜   高麗菜 菠薐菜 萵仔菜  苳蒿菜 

捲心白菜 韭菜 花仔菜  嘛有彼號食著會補血的紅光菜 人講冬瓜清涼會開脾 金瓜好食會助胃 苦瓜先苦而後甜 菜瓜食著會紲喙 小姐愛食是芫荽 這是初戀的氣味 

包你愛情會順序  講到下頦強欲落落去 

小姐一時心花開 雄雄才開喙 問我蔥頭一斤偌濟錢 

賰的伊攏無愛挃 害我聽著強欲昏落去

講到天花佮亂墜 只有趁你一箍二角錢 想著是真敨氣 啊……為著三頓不得已 較苦嘛著忍耐度時機

  第二首「安童哥買菜」原底是一首台灣民間,流傳的福佬唸謠,是梁山伯與祝英台樓台會其中的一段戲,樓台相會了後,祝英台的阿母為著欲接待查某囝的同窗好友,特別命令家僕安童上街去買菜,歌詞生動描寫安童上街買菜的經過。一直到民國56年,歌星劉福助才共伊改編變做流行歌曲。

安童哥買菜

安童哥仔囉 我一時有仔主意 欲蹌蹌行伊都蹌蹌去

上街到菜市 彼號菜籃叮仔噹挕 安童哥仔囉 

我雙跤行入彼號到菜市 閣開喙叫一聲頭家矣

目睭眨眨nih 東爿看過來唉唷西爿閣看過去

攑一目 哎唷看一見 彼號肥豬肉閣肥仔志志

哎唷瘦的是紅仔記記 我安童開嘴就問起

這號一斤是欲偌濟錢 彼號刣豬仔兄就應伊

講肥的一斤五角二 彼號瘦的是欲一斤六箍四唷

安童哥仔囉 實在有紲拍 順紲閣買螺肉 轉來去煮瘦肉

錢共伊用予伊焦 順紲買豬跤 買鴨跤 又閣買雞跤

安童哥仔囉 彼號水雞閣鱔魚鱉 伊逐項閣嘛甲意

又閣揹袂去 煞結蹛彼號頷頸仔閣叮噹挕 

哎唷東爿挵過來 哎唷西爿又閣挵過去喔

安童哥仔囉 安童買菜真正gâu 呀!味素買轉來摻湯頭 彼號罐頭酒 五加皮 麥仔酒閣是欲食熱天

我著趕緊買買揹揹煞轉來去唷,安童哥仔囉

  囡仔歌是陪伴囡仔大漢的文學作品,咱會當將伊運用佇母語閱讀教學當中,學一首囡仔歌就若親像學一首母語詩。無論咱的學生將來欲做啥物,攏一定愛多聽、多說、多讀、多寫、多想,因為無論in佇士農工商佗一途,攏一定愛會曉表達,雖然講行行出狀元,毋過定定狀元就是表達能力上好的彼个人。

檢視次數: 437

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款