【詩】嫷面

[胡長松]

嫷面


毋是因為面無嫷才拆破
根底就毋是相黏的面
你的目睭tsīng出世就生佇遐
無生佇伊的目眉下

毋是因為知影袂死才敢倒落去睏
是因為相信
上帝猶未欲接你去

你猶未予伊拆破的嫷面嘛是按呢

毋是因為面嫷才無拆破
是因為猶有相信
才會當做永遠
袂破

你的面若無整做佮伊一模一樣無宛二體
你早慢嘛是愛死

[浪人陳建成]

長松兄，「嫷面」這個詞據我較少聽到，一般聽著的情形好親像有二種用法，一種用法比如「某某人嫷面咧」，大概指華語的「某某人往自己臉上貼金」，另外一種用法比如「某某人嫷（彼個）面」，大概意味「某某人（只）漂亮（那個）臉」，擱有其他意思無我就毋知矣。因為這首詩嘛算隱晦，感覺你親像有雙關用法毋敢確定，想欲知你的想法佮欲表達的深意，是毋是嘛會當開示一下。

[李秀]

你的面若無整做佮伊一模一樣無"宛"二體....宛--按怎讀?啥咪意思?

[胡長松]

感覺建成兄讀詩真用心，咱就毋通閣互相謔講「開示」落去, 因為我若〔開示〕落, 就成做師父(su-hu), 阿我閣是基督徒, 這聲犯著的就是大條的--矣. 閣因為是我tshua頭謔的, 我會失禮啦.

你講的意就是我借來用的詞源無毋著, 這詩原意是政治性的摳洗, 命題接近「毋通數想是家己嫷面（kan-ta嫷彼個面嘛無效）, 就袂予人拆破面」, 主要摳洗無實際的統合的數想. 比如咱阿九騜, 毋是因為伊的kau2(是九, 毋是狗)面嫷, 中國人就袂佮伊拆破面. 前一站的紅施嘛是按呢, 數想欲佮老K合作, 憨面啦. 講是政治性的摳洗, 無限佇政治的討論, 男女佮各種社會關係, 攏有這款普遍的政治性的現象.

[胡長松]

宛, 音uan2〔遠〕, 親像的意思. 無宛二體, 音[bo5-uan2-ji7-the2], 無親像2个物, 仝款仝款的意思.

[胡長松]

多謝阿本兄的意見，若有機會發表就按呢改啦！

不過猶是愛替「無宛二體」揪一票。因為這個詞是位阮查某祖來的，我是時常聽著，較早毋捌字，毋知遮文雅。攏是親tsiânn 五十抱囡仔來的時，阮查某祖就講:「噯喲，生甲遐親像怹老爸(抑是老母、阿公、阿媽等等)，你共看he鼻，tsok-tsok-tsok，無宛二體嘛!」按呢，無宛二體就成做阮兜的「口頭禪」矣呢。實在毋知遐文--就著啦! 結局，我捌台文了後，問真濟人，攏講無聽過。想想咧，阮阿祖無讀冊，suah講會出「無宛二體」? 我實在na想na憢疑，一直到彼工，我聽涂妙沂講柴山阮祖仔的故鄉出過一个麥進士，才知影柴山文風鼎鼎這个緣故啦。以上講來予逐家罔參考罔笑。

[施俊州]

Ań-ne 我 beh kā「無宛二體」khioh khi’ái īng，因為台語創作 tâng 時是「khioh」kap「exploit/explore」ê kiâⁿ-pàng。

[胡長松]

原底「你的面若無整做佮伊一模一樣無宛二體
你早慢嘛是愛死」

改做：
你的面若無整做佮伊仝款仝款
你早慢嘛是愛無命

另外, 感謝俊州無棄嫌, 無宛二體四字免費相送啦.

[李秀]

"你的面若無整做佮伊仝款仝款
你早慢嘛是愛無命"
按呢改我即看有了，嘛感覺輕巧濟了.

[陳金順]

阿本兄的意見當然真好，毋過既然是ui恁阿祖hia聽來的，我建議彼句改做：

你的面若無整做佮伊無宛二體
你早慢嘛是愛無命

[胡長松]

多謝金順兄意見, 無宛二體單獨存在對一般讀者阻礙較大, 可能嘛佮本詩用詞的調性有距離, 所以會閣考慮.