台文戰線聯盟

艱苦ê椽筆
Tshiám佇靈魂ê肉--裡
Bùn清紅ê血

歡喜ê鋤頭
掘踮活命ê土--裡
Tshìng精英ê泉

拄手ê鎗
鑿佇壓迫者ê心臟
規天暗sàm ê星
和齊出聲

苦澀、tshio-tiô
佇壓制ê下跤
就準大空細裂
嘛欲英威驕kiah

攑頭!!!
詩行(si kiânn)!!!

檢視次數: 1091

浪人陳建成在12:12am對2009 九月 27的評論
前冬,聽明仁兄講「詩行」這個詞是你號的,有隱含「流行」的台語「時行」雙重的意義,期望帶動母語文學,確實號了真好。

這首詩啥物時陣寫的?
Voyu Taokara Lâu在10:46am對2009 九月 27的評論
建成兄,我ê老師李勤岸有講著伊猶佇美國讀冊ê時,就捌想著/使用tsit-ê詞--a,雖罔我毋是kā偷學--ê,毋過我確實毋是頭tsi̍t-ê。

這首詩是昨昏e晡寫--ê。
施俊州在12:57pm對2009 九月 27的評論

1998 年 11 月初 5 有 1 份台語刊物創刊:《時行:台灣文月刊》(聽講後--來改做雙月刊);我手頭上早 ê 1 期是第 8 期,上 uàⁿ 1 期是 23 期。《時行》ê 發行所(出版者),前後是台語文社、時行台語文社,mā 有 1 陣作家 leh 創作、àm-tsīⁿ-á leh 出冊(看版權頁 ke-kiám ē 知成員有 siâng)。In ê 書寫方式是漢羅文,對漢字 mā 不時表達 in ê 戒心。我 tiāⁿ leh 想,in kám ē 加入台文筆會?

Voyu Taokara Lâu在1:54pm對2009 九月 27的評論
初步看--起-來(uì人名、特別是文編ê部份),張春凰kap江永進應該是上主要ê成員--裡ê兩位。我想,in就準beh加入筆會,mā定著ē繼續堅持使用kap tshui廣通用拼音,m̄知筆會對tsit-ê部份kám有要緊?

Tī 台語網mā看著張復聚兄ê提議,希望筆會ê章程明文「tshui廣羅馬字、羅馬字優先漢字」,tse,ē-sái講是除了羅馬字系統ê選擇以外,漢羅中間ê pinn-pui̍h,m̄知筆會ê想法iū-koh是按怎?

實在講,我對羅馬字無hit種beh死忠ê感覺,若是羅馬字死,台語文興,我仝款ē tsiok歡喜,beh使用羅馬字,對我來講,用羅馬字tsiânn單純是「實際上ê需要」,就親像使用台羅,mā是「運動tik實際上ê需要」,he m̄是信仰,無想beh為in殉道。

M̄知別人按怎想--neh,犯勢有人是想講:「羅馬字若死,台語就(hōo)死」,koh較犯勢是有人想講「某mih系統若無tsiânn做一般tik ê書寫方式,台語文運動就失敗!」 Tsit-ê某mih系統對有ê人來講是「通用」、對有ê人是「教羅」抑「台羅」.....

Tsit-ê情形來舉例,比論台語網tī幾月日前,有khiā美洲ê成員發批講「只要是用台羅寫ê post,阮若收--著,攏直接 delete,開to無想beh開,koh較免講去讀...」,thang講是上有神--ê...in ê反應,簡單講,譀kah出水...我連回to懶--ah。

Koh mā有人,是喙無按呢講,實際行動suah是kā某1个「ke-si」tshāi tsiūnn尪閣桌,變做神主牌á,行動是按呢,喙攏mā講「無...」,tsit款--ê較無老實...真適合選總統...
施俊州在4:45pm對2009 九月 27的評論

會 1 點 tō 好,tshun-ê 議題 tsiah koh 講:

「Tshui 廣羅馬字、羅馬字優先漢字」(A)nā kā 解說做:① 國中、小母語教育 ài tsi̍t 開始 tō 教 LMJ、tsiah 教漢字(KMT ê 國語運動、語文教育 tō 是 án-ne tshui--ê);② 你 nā 想 beh tsiâⁿ 做基本合格 ê 台語作家,tio̍h-ài 兼 o̍h LMJ,m̄-kuán 你歡喜寫全漢、漢羅 iah 全羅(e.g.黃勁連、林央敏 lóng 是台語素養 tsiūⁿ-koih ê 全漢作家)。Án-ne Bubuza(張復聚)ê 講法 tō 非常正確。M̄-koh,mā 是有 bē 少人反對,或者講 i khah kah-ì 漢字、LMJ khah 無法度接受。

不時 ē 看 tio̍h 1 个矛盾 ê 現象:1 方面(B),ta̍k-ê lóng 反對余光中 ke 教寡文言文 ê 主張;另外 1 方面(C),suah mā kap 人 leh 反對先教 LMJ ê 建議,或者 ka-tī bua̋i o̍h。其實,B kap C 理路是衝突--ê;A kap B 分別代表語文(文學)教育 tī 無 kâng 階段正確 ê 養成步數。我 tiāⁿ leh 想,我 ka-tī 是 án-tsuáⁿ 起頭寫華語文學--ê?真簡單,ke 讀寡華文作品,身軀邊隨時有 1 本字典 thang 查 [Ps.],然後 tsiah kā「身苦病疼」、「少年強愁」――tsi̍t-kuá lo̍k-kò so̍k-kò ê mi̍h-kiāⁿ 寫 tiàm 筆記簿 á。你 ài 先有基本 ê 華語「語感」(語法、字音)、擴展 ka-tī ê 詞庫了後,tsiah kā hit-kuá「lo̍k-kò so̍k-kò ê 病愁」組織--起-來,有 1 工 lán tō ē tsiâⁿ 做「有對外發表經驗」ê 華語作家--a。為怎樣,lán leh 寫華文 ê 時願意 hē 工夫;寫台語文學 ê 時 suah bē giàn--leh?

Ps. 高中時期,我 ài īng 4 本字(辭)典 tsiah ē teh-sàu:冊 phāiⁿ-á 1 本小字典;教室冊桌 á khǹg 1 本中型辭典;彰化老厝、台中租厝 ê 所在各 1 本大本辭典。

Voyu Taokara Lâu在5:05pm對2009 九月 27的評論
俊州對 (A) ê 解說我同意,袂曉羅馬字ê人,是無可能好好仔利用現此時ê台語資源--ê,tann較好ê字詞典kap網站,若無羅馬字ê讀寫能力,根本無才調去使用、hōo家己ê台語能力進步。

M̄-koh張復聚兄所講--ê,ná上毋是tsit-ê意思,伊所提起親像「台羅會ê章程有羅馬字kap華語版,有爭議ê時以羅馬字版為主」ê例,基本tik已經是1種「羅馬字」本位ê思考--a,羅馬字親像1塊神主牌仔,袂輸無羅馬字,就無台語ê感覺。

俊州講--ê (B) kap (C) 我mā夭壽仔贊成,每1个寫台語文ê人,攏愛問家己「對台語hē偌濟工夫」,有人較甘願佇華語teh稽考字詞,有人真願意拚勢學英語、日語等等,毋過煞將來毋捌hē sio-siâng ê氣力佇台語頂懸...我毋知...按呢是欲按怎求台語文ê進步?

自細漢,我就佇台北大漢,阮爸母受潮流ê影響,佇厝--裡攏慣勢kap阮做囡仔ê講華語,我ê台語,實在講是過去tsit 12-13冬,家己反字詞典、加上佇李江却基金會讀冊會慢慢仔粒積、硬king--起-來-ê(包括幾若冬直直佇讀冊會接受人對我作品--裡ê字詞使用ê指正),tann我有--ê字詞典真濟本,攏是為著欲佇書寫台語文ê時thang揣適當ê字詞、熟語,koh為著欲補充不足,家己做資料庫,teh整理語料,來收集連字詞典to落勾ê話語。

寫台文ê人kám m̄免按呢稽考字詞、要求程度? Tse kám毋是任何1種語言ê作家ê基本要求?(雖然我毋是作家)

實在講,真濟台語文ê寫作者,對語言ê素養要求,無in對華語、英語、日語、法語遐爾仔頂真.....
施俊州在7:36pm對2009 九月 27的評論

Taokara:你講你 m̄ 是作家,tsit 點 sǹg 你 ê 回應內底 khah hàm ê 論點。你百面是作家;tse kap 你有出 1 本短篇小說無關係。我想,《Tò-tńg》tshìn-tshái sa--1-篇,lóng 是作家 ê 證據。況且,kan-na 我 ê 話句 tō 有 bē tsió 語詞是 lán kā 你「偷」--ê。Tsit 點,mā sǹg 是你 ê 影響。

另外有 1 點,你 ê 判斷是 m̄ 是有 tîng-tâⁿ ê 所在,mā ē-sái koh 討論。Babuza 兄心肝 á 底 ê 想法(intention),我 m̄ káⁿ 掛保證;kan-taⁿ 讀 tsit 句:「台羅會 ê 章程有羅馬字 kap 華語版,有爭議 ê 時以羅馬字版為主」,除去有 LMJ 本位之嫌(可能性),話句本身 mā 有台語本位 ê 關懷 tī--teh。Tī 「2 國(語)簽約、換文」ê 脈絡頂,tsit-lō「本位主義」是 ē-tàng 接受--ê。

浪人陳建成在12:01am對2009 九月 28的評論
俊州兄,你所收集的物件看起來真濟,啥物件都有當提出來。你敢會當甲箱仔車駛入來網站予大家參考?講耍笑的。

你介紹的Facebook我有入去矣,毋擱裡面一寡仔功能猶無啥會曉操作,所以若連絡或者回應有脫節的時陣,請諒解。我家己自我評估,目前對電腦的操作可能佇「中度智障」的程度。
Voyu Taokara Lâu在12:13am對2009 九月 28的評論
俊州:

按呢理解Babuza兄ê想法真好,我真願意按呢來理解。

我希望有1工會當kā我整理佇網路頂ê資料庫公開,tann手頭有siunn濟紙本ê筆記,攏是tsit幾ā冬去讀冊會「偷學」--來-ê,若會當攏數位化,會真利便使用。

請諒情我講我「m̄是」作家,我按呢講m̄是teh假佯也按怎,是因為我對一般通用ê tsi̍t寡銜頭ê定義真無理解,真驚若接受,就隨受著「一般tik ê定義」ê定義。

比論:「作家」是啥物,我就猶無tsiok理解,有出冊--ê kám就是作家?無出冊ê人,kám tio̍h ài等出冊了後tsiah「變做」作家?舉實例來講,Franz Kafka在生ê時無出版冊,咱kám beh因為按呢講「伊是伊過身了後,tī伊ê好朋友Max Brod替伊整理手稿出版冊了後,tsiah變做作家」--ê?

另外1个詞對我來講mā無tsiok簡單定義,啥物是「詩人」? Kám是「有寫詩--ê」就是「詩人」? 有teh寫詩koh寫了bē bái,精差無出版,按呢kám算是詩人? Koh,若有出版詩集,m̄-koh詩寫了普普,按呢kám就一定叫做「詩人」?

上尾舉1个kap我本身較有tī-tāi ê例:「啥物是基督徒?」 我信上帝,mā信耶穌是伊ê獨生囝,信耶穌為人ê罪釘死tī十字架,了後koh活,m̄-koh,我無認為聖經攏總是上帝ê啟示,mā無認為聖經攏無誤tânn,koh,我認為現此時大多數ê教會ê大部分教示攏是「teh放屁」,個人婉轉無法度接受,按呢,我kám是「基督徒」? 我kap一般社會所叫ê「基督徒」kám thang用「兄弟姊妹」teh sann稱呼?

按呢,透過基督徒tsit-ê例,我想應該ē-tàng說明我對「作家」tsit-ê銜頭是按怎ē感覺躊躇--a。
施俊州在1:50am對2009 九月 28的評論

浪人:我 mā tú 加入 niâ!我是「中度智障」上嚴重 ê hit 級!
資料上濟--ê 是台語文學館館長(籌備處主任)――方耀乾先生(阿本--a 家伙 mā 不止 á 濟,無 kâng 路 mi̍h niâ);我 lóng 去 hia「偷」mi̍h-kiāⁿ。有閑 tsiah tshuā 你--來。

承賢:「有閑tsiah tshuā [lí lái]」標「……你--來」,kám tio̍h?

意見

您必須是成員才能發表評論!

加入 台文戰線聯盟

© 2024   Created by 胡長松.   管理小組

成員徽章  |  報告問題  |  服務條款