無題
沉默是金
輕雷罩烏
散步趕緊三輾兮約束
心靈放送 油塩另外兮味素
張弛伊 伊含阮礙目兮別人
話尾秋波 祇好頻道轉予歪斜
一路輕雷罩烏 濛仔雨插話落塗
目的兮目的
禮拜日
查某囝 網路查人氣間店
提議盈暗頓
揣毋行灶跤兮理由
肉骨茶麵即路追趇
嶄然仔遠途兮車格
大碗細碗 對應
活命 存留兮目的
定位佗趁早斟足
豈採 湯頭恰鹹
付數嗎係應該
究竟 食比想恰強勢
夆摃兮囡仔
厝邊兜
仝年次 黃昏日頭
老枝發幼芛 春開二度梅
腰囝惜命命 晟囝心疼疼
父老囝幼少年公
金含仔糖霜好寶貝
深思量 飼伊坎站長落落
再思量 食伊食昧著
看伊學爬 牽行 興走
驚囝著傷 甘願像雞母
四邊 箍圍
掠伊趇昧著 伊兮心臟漸漸勇
無乖抱來摃 心肝疼丟丟
伊係真正吼 怹是假影摃
細粒橄欖籽 冬時藉大漢
家己心內叮嚀暗唸 莫使心身快老
上無運動保養 映望倒還少
即步即步 大步大步
推磨命春回 玲瓏搞…
名嘴
無反方兮桌聲 一魚五吃
煎煮 生擒活拆
呸煞閣用銅臭兮草紙拭喙箍
記：TVBS圍鬥蔣為文.看諸公現世款形
道路 真理 活命
路正心曲 自然蛇行
心曲路正 難得光景
真光照古道 一路夠底
古道耀真光 全心進深
心清光現明活路
白白恩典血替贖
真心倚靠何罪有
自專放捨福齊天
當作活祭
揣即座合舒灶空
拚勢滾強兮大鼎
豈採 澹柴奧燒
不如獻上家己
科學水腦症
愛囝毋愛娘 阿娘哭俺爹
刣雞抾鴨卵 鴨卵孵無雞
假設 已知 證明 結論
莫怪門扇板逗昧合
原來雨蹬高過門楣徛
真正是
月下老亂點鴛鴦譜？
落雨兮原由
天頂誰底洗衫 囡仔指天講
地球外 天外有天
天頂誰底浮水相噴 囡仔指天講
天外有天 人外有人
天頂誰底洗身軀 無站無節
囡仔指天講……………
天公擋昧牢 佇33天外開聲罵講
練痟話練夠我遮來
囡仔指天講 33粒兮地球天 拄好
捾作一捾珍珠伴鍊 親像天星
互雨水來串聯 囡仔指天講
您必須是成員才能發表評論！
加入 台文戰線聯盟