台文戰線聯盟

永遠 ê 台語報業
──《首都詩報》創刊 ê 理念


11 月 20 e-po͘ 3 點 goā,台語雙月刊《首都詩報》(STSP)出印刷廠──正式創刊(刊頭印「11 月 15」創刊),定位做《府城詩刊》(2007)ê 革新號。主事者有 5 位,校長兼摃鐘:社長潘靜竹、發行人潘景新、總編輯柯柏榮、總經理歐財榮,主筆由小弟本人擔任。Chiah-ê 頭銜基本的是掛好看--ê;尤其是「主筆」,無理解 ê 人百面看 bē chiūⁿ 目。

Kah-nā 設「主筆」,tō 表示純文學刊物《府城詩刊》革新 ê 重要 1 步:鼓勵台語詩創作、評論以外,本刊有 hit-ê 意思 kiâⁿ ǹg 反映台語文學社群(台文界)動態 ê 社區報發展,《首都論報》(STLP)是未來「再革新」ê 目標。現時,頭 2 版由本人負責主編,是「報」ê 核心、「報紙」編輯政策 ê 試行,含蓋台語文學所有文類活動 ê 寫真、報導;第 4 至第 7 版,由傑出台語詩人柯柏榮「總編」,是台語詩專版、STSP 重點中 ê 重點;版面風格,以台語詩 ê「副刊」做例樣(其實是 STSP ê「主刊」),刊登創作稿 kap 論述為主。

第 3 版是「報」kap 詩刊 ê 過渡,詩作 iáu 是主要內容;uì 第二期開始,按算以「首都冊評」iah「首都人物∕社團」做版名,詩作以外 ē 刊 1 篇千字內 ê 冊評 iah 人物∕社團寫真,「報導」優良台語詩集、chiūⁿ-kioh 台語詩人 kap 團體。第 8 版是報尾 á、廣告欄,除了刊 1 首「報尾詩」、稿約 kap 總編輯 ê 話,mā ǹg chē-chē 優良店號、企業團體、肉砧菜 tàⁿ tàu 牽成,提供廣告業務,hō͘ 本刊「工商服務」--chi̍t-ē。

本刊 ê〈發刊詞〉(STSP 1,3 版)án-ne 會:「關顧過去,運動期《台語文摘》ê 創刊(1989)代表島內台語『研究』以外,台語文學社群『社區報導』ê ui(胎衣)形成--a。1991、96 年《台文通訊》、《台文 Bong 報》創刊,koh-khah 是前運動期海外台語報業──《台灣語文月報》系列刊物(1975-79)ê 部分繼承,論者稱漢羅刊物系譜 ê『永遠』報業。STSP 想 beh 跟 toè、學習--ê,是 chit 線刊物脈絡 ê 報導性、創作欲念 kap 語言 kè-e̍k 理念(漢羅合用文、標準化)。」豬頭皮 choàⁿ 無油,「永遠 ê 台語報業」m̄ 是本刊講 ê 大聲話;台語報業 ê「永遠性」來 tī「永遠」無法度達成--ê 台語文報業 ê bû-thok-pang(utopia)欲念,是致哀 ê 詞。「永遠」éng-éng 是文化生態危機 ê 反映、「最後」修辭 ê 代替(displacement);意思是:報紙、社區報,是台語文運動期(1986/89-)所 kheh 欠 ê 刊物形式,mā 代表台文界 kheh 欠報業人才──m̄ 管編輯 ê 才情,iah 新聞專業。

STSP kan-na 是台語報業 ê 試行,sa 詩做例而已,並無按算 beh chiâⁿ 做 chiàⁿ-káng ê 報紙、甚至日報;「萬歲萬萬歲」koh-khah m̄ 是本刊 ê ǹg-bāng。本刊 ê「空思夢想」ke̍k-ke 是 uì 詩報 kàu「論報」、8 版而 16 版,ē-sái 關顧所有 ê 文類創作、研究 kap 活動,pìⁿ-chiâⁿ 實實在在 ê 台語「文學」社區報,為台語文學創作、民間語言 kè-e̍k 實踐,kap 台文界 ê「社區營造」盡 koá 心血。以 chit 款規模來講,STSP 或者未來 ê STLP 需要 ê bak-khuh,頭 á-chân 恐驚 m̄ 是金錢,顛倒是眼界(vision)kap「kioh-siàu」──編輯人才、種子通訊員(記者)、chē-chē 有心有才情 ê 台語作家、讀者……

Chiah chhiáⁿ 詩人、研究者寄詩稿、評論稿來編輯部、讀者寄匯款單來 gún ê 口座;厝邊隔壁 nā 有 niű-sù mā chhiáⁿ tàu-sio 報。Gún bóng 報,lín bóng 聽。

Án-ne 是 gún ê 願望(Amen)。

《台灣教會公報》3017期(2009.12/21-27):21 版

檢視次數: 216

胡長松在1:13am對2009 十二月 27的評論
"台語報業 ê「永遠性」來 tī「永遠」無法度達成--ê 台語文報業 ê bû-thok-pang(utopia)欲念,是致哀 ê 詞。" 真心適的講法,聽著嘛真心酸。
施俊州在2:25am對2009 十二月 27的評論

長松,針對你 ê 回應,講--1-句 tō 好,算是回應:
我想,tshìn-tshái 1 間學校,nā 有法度設立完整 ê 台語文系、所,含蓋語言、文學(含創作)、大眾傳播 3 組,án-ne tsit 間學校 tō ē tshìng--a。我 ká-ná leh 反駁 ka-kī「永遠性」ê 講法?另外,「永遠」、「最後」lóng 是原住民作家 ê 用詞。台語作家 mā 有人 án-ne 寫,比如許正勳。Tsiâⁿ 趣味。

PS. Ē kan-na 講系所,是因為短期內beh 設「學院」ká-ná 無 siáⁿ 可能。

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款