台文戰線聯盟

張愛玲的1941-香港之戰   

      日本帝國海軍佇1941年12月7號,對美國太平洋珍珠港海軍基地發動戰爭。閣轉工,日本又閣開始攻擊香港,英國軍隊為著欲保護香港,佮日軍相戰,十八工了後英國的香港保衛戰不幸失敗,日本成功占領香港,開始香港「三年閣八個月」的日據時期。所以1941年12月8號到25號,這短短的十八工就是張愛玲〈燼餘錄〉內底所描寫的香港之戰。

      「燼餘」兩字的意思佇《新編國語日報辭典》1101頁的解說是:災厄後賰落來的物件,比喻遺民抑是遺孤。這就是張愛玲,伊對正式慎重的戰爭歷史無啥物興趣,顛倒對戰爭時、戰爭後龜龜怪怪的人性佮代誌,煞真有興趣。

      「人性」這兩字,佇仝一本字典87頁有真簡單的解說,就是人的個性、感情的衝碰佮理性。毋閣,一人一个性,有人愛食鹹;有人愛食甜;閣有人愛食汫,講按呢較健康;真正是,一人一雙箸,欲挾無仝味。咱干焦會當講,人性是誠複雜的現實。

       張愛玲佇〈燼餘錄〉內面嘛按呢講,伊講現實這項物件是無系統的,像七、八个人同齊唱歌,個人唱個人的,唱甲亂七八糟、離離落落、烏魯木齊、予人聽攏無。毋過,有當時仔也有清清明明,予人心酸目光的時陣。毋過,拄才今聽出音樂的旋律,連鞭又閣予重重疊疊瀳倚來的烏暗,共這一屑屑的了解隨掩崁起來。畫家、文人、作曲家共零星的、䢢拄䢢發現的和諧串做伙,造成藝術上的完整性。人生的趣味,攏是一寡無要無緊、無關係的代誌,所以香港之戰予伊有興趣想欲寫的內容,全攏是伊身軀邊發生的,有關人性的小可代誌。閣加上伊毋是用整齊的對照法落去寫的,毋是古早善惡分明、精神佮肉體遐邇仔明確衝突的寫法,所以有時陣主題毋是真清楚明顯,就親像《戰爭與和平》按呢,予故事家己付出伊會當付出的,予讀者提伊家己會當提的,按呢較接近事實。毋過,這嘛是研究張愛玲的小說、文章上困難的問題。

       難罔難,問題嘛是愛解決。我想來想去,頭殼額仔強強想甲欲煏破去矣,好佳哉,靈感一來,才想著共伊寫佇〈燼餘錄〉內面的人性分做戰時佮戰後兩部分來講。

       戰時面對死亡的驚惶,逼使逐家的人性反應攏毋仝款:蘇雷珈是戀衫情結,戰爭對伊是一種真難得的教育;艾芙林因為進前日本兵佇in庄仔內刣死足濟人,造成伊有真嚴重的創傷後壓力症候群的反應;大膽的炎櫻是享樂主義,照常去看電影、洗身驅、唱歌;愛看冊的張愛玲,麻痺的悲觀主義,炸彈佇頭殼頂一直擲,閣連紲兩工無食飯矣,攏無要緊,毋過一定愛看煞《官場現形記》,閣那看那煩惱是毋是有時間會當予伊看煞。字印了足細,光線閣無夠,但是,伊想:一个炸彈擲落來,閣欲目睭創啥物?唉!這陣想欲做啥,連鞭去做,無定著攏袂赴矣。

       第二部份,戰後死裡逃生的樂暢,予人歡喜到發燒起痟,人人攏著急無閒咧滿足家己的物欲佮情欲──食、買物仔佮結婚。有結婚閣算袂䆀,無結婚偷生囝才食力。規條街仔路,逐家那買那行那食,邊仔囥的屍體,逐家攏假影無看著。甚至,佇病院做看護的大學生,干焦顧家己的喙空,無管病人的死活。種種自私、無知、空虛、侗戇、孤單、……,人自出生到死亡,可能看袂著、用袂著的種種飲食男女的人性,佇這十八工的香港戰爭,攏總加速進行、完成、結束。

  張愛玲愛看毛姆的小說,為著欲舞清楚毛姆用畫家果更的故事寫的一本小說《月亮與六便士》,伊就去研究果更,後來煞真欣賞果更,嘛足愛看伊的畫。 我毋敢講,我愛張愛玲,因為我知影,較真真正正痟張愛玲的人比起來,我真正無遐爾愛,較in比起來,我只是對伊不止仔有興趣爾爾。毋過我知影,頭起先我是先愛著臺語文,愛著臺語文學。既然,祖師媽張愛玲的小說、散文、研究的文章閣冊,有華文版、英語版、日文版……等等,各國無仝款文字的版本,佇咱臺灣,煞無臺語版的張愛玲,這哪會通得,恁講著無?

       所以,我愛臺語文學,為著欲用臺語文介紹張愛玲,我開始研究張愛玲,嘛漸漸仔愈來愈愛伊,佇天頂的祖師媽若有看著,伊無定著會想講:「這个老查某,伊愛臺語文學,就若親像我愛毛姆的小說仝款;伊來研究我,就若親像我去研究果更仝款,一模一樣。按呢嘛是袂䆀,真好,真好!」

海翁台語文學第174期2016.6

檢視次數: 384

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款