台文戰線聯盟

來喔!來看臺語電影~王哥柳哥遊台灣

來喔!來看臺語電影~王哥柳哥遊台灣

  檢采,咱人若知影家己賰無幾工通好活,會按怎?這陣上想欲做的是啥?抑是這層不幸的代誌,若是發生佇咱一粒一的身上,咱是欲按怎安慰伊才好?

  遮爾嚴肅的問題,最近佇外國片『一路玩到掛』,才認認真真搬演過,引起真大的迴響。無想到,佇1958年,咱的臺語烏白電影「王哥柳哥遊臺灣」早就演過矣。上大的差別是:外國片是苦齣,予你看煞,心肝會搐一下、搐一下;啊若咱的「王哥柳哥遊臺灣」,是一齣笑詼,予你看了笑咍咍閣心涼脾土開喔!

  王哥、柳哥in這對褲帶結相連,死忠兼換帖的好朋友,可惜運氣一直攏無蓋好。肥朒朒的王哥,伊的工課是佇路邊替人拭皮鞋,看著媠姑娘仔,煞共人客的白皮鞋拭甲變做烏皮鞋;瘦卑巴的柳哥是咧踏三輪車的,無代無誌去拄著一對足大箍的翁仔某,毋但載袂振動,落尾閣反車。結果,兩人定定趁無錢閣愛倒貼人客的損失,實在有夠衰。有當時仔,散甲無錢通好食飯,枵到大腸告小腸,佳哉隔壁厝邊,溫柔體貼的阿花佮柳哥相意愛,毋甘伊枵腹肚,著會攢足濟豐沛好食的飯菜予in食。

  當當逐家咧歡喜,阿花in阿母答應欲將阿花嫁予柳哥做某的隔轉工,王哥佮柳哥䢢拄䢢去拄著一名叫做「小神仙」的算命仙,伊鐵口直斷講,三日內王哥一定會發大財;毋過,柳哥著可憐矣,因為四十四天一到,伊著非死不可。小神仙閣臭彈,若算了無準會當來掣伊的喙鬚。

  果然,三工內,王哥的愛國獎券真正中著大獎,獎金是二十萬。等王哥去共獎金領轉來,逐家歡歡喜喜想講欲按怎慶祝較好,柳哥煞開始煩惱,伊是毋是真正會活袂過四十外工呢?阿花仔看伊遮煩惱,好心請王哥是毋是會使用這條錢tshuā柳哥去遊台灣?為著好朋友,王哥真爽快隨答應。

  著按呢,王哥、柳哥開始遊臺灣囉!

  一路上,除了看風景、食好料的以外,閣發生真濟笑詼的代誌。親像,暗時蹛飯店欲洗身軀,這兩个庄跤倯,毋細膩行毋著所在,走入去「女子浴室」,實在烏白來,這款代誌真正是會笑破人的喙。

  飯店內底有一个諞仙仔,看in兩人戇頭戇面,若像真好騙,就騙講欲tshuā in去屏東拍獵。啥知戇的也有一項會,這改換巧的予戇的騙,王哥看破伊的跤手,緊共錢換做磚仔墼,等這个佬仔發現,in早著跤底抹油,旋甲遠遠遠矣。

  王哥佮柳哥佇山內踅來踅去,揣無路,予原住民公主掠去做一夜駙馬,享受天頂落落來的禮物,真是艷福不淺。毋過,柳哥心肝內猶是愛著伊心愛的阿娜答--阿花,想來想去,也是決定連夜叫王哥做伙逃走。

  兩人走啊走,盤山過嶺,對半暝暗眠摸行到天光,總算行出山區來到平地,拄拄仔好,佇巷仔口,看著兩个放五虎利的歹人,對一个阿婆起跤動手。原來,阿婆一時手頭無方便,共in借一屑屑錢,後來利滾利,變做兩千箍,散赤的阿婆根本還袂出來。善良的王哥、柳哥,看阿婆強強欲予in拍甲昏昏死,就挈兩千箍予阿婆去還數。無想到,這兩个無天良的雷公仔點心,良心去予狗食去,攏無驚人咧做天咧看,錢一提過手,歹心隨起,閣出手拍阿婆,逼伊講出到底是啥人暗中咧共伊鬥相共。阿婆著生驚無法度,袂堪得in凌治,只好騙in講是蹛佇飯店的兩位姑娘好心鬥幫贊的。

  王哥、柳哥規氣好人做到底,男扮女裝,好好仔創治兼教示這兩个歹人,共in騙甲个戇戇踅。一直到歹人招王哥、柳哥做伙洗身軀,這聲代誌煏空矣,王哥、柳哥嘛無咧驚,in同齊聯手共歹人修理甲悽慘落魄喝毋敢。

  雖然in拍贏歹人,猶毋過煞傱入去一間咧鬧鬼的厝,險險驚一下半小死,後來才發現原來是一陣囡仔疕,佇遐假鬼假怪。in決定欲去掠龍輕鬆一下,等予掠龍的掠掠的了後,規身軀攏誠爽快。行出來賞蘭花,毋細膩共一盆兩千的蘭花摃破去。

  就按呢,遮耍遐耍,時間一目nih仔就過去矣,算算的明仔載就是第四十四工,柳哥想講死嘛愛死佇厝哩,同時伊的腹肚嘛雄雄痛起來,莫非真正死期到矣。in包袱仔款款咧,趕緊坐火車倒轉去臺北。到厝了後,王哥、柳哥佮阿花三个人一直哭,拍算提一寡錢為柳哥半喪事,賰的全部捐出去做善事。

  王哥準備真濟柳哥愛食的物件予伊食,阿花嘛tshuā一个醫生來看柳哥,醫生看了嘛幌頭表示毋救矣。柳哥傷心共愛食的物件食食咧,屎放放咧,腹肚痛煞好起來!

隔轉工透早,逐家來揣小神仙算數,掣伊一半的喙鬚,因為伊只算著一半。等逐家走了後,另外一半的喙鬚小神仙家己著偷偷掣掉,原來伊的兩撇喙鬚攏是假的。真正是子丑寅卯,木蝨虼蚻 ,算命若會準,草仔埔都會生竹筍。

  終其尾,這改換王哥踏三輪車仔載柳哥阿花去法院公證結婚,圓滿幸福。

  佇影片中咱會當看著往過的總統府、介壽路,就是這馬的凱達格蘭大道。閣有省政府、日月潭、新店烏來……等等,各地風景名勝。猶有日月潭族長、大公主和二公主嘛有佇電影中出現,鬥幫贊小可仔演一段。當當時,李行導演拍的這片臺語發音的烏白電影,票房衝到真懸,是一片真成功的商業電影。

 

海翁台語文學第157期2015.1

檢視次數: 329

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款