台文戰線聯盟

海翁文學,廈門相隨

《千金譜》頭一句:「書是隨身寶,財是國家珍;一字值千金,千金難買聖賢心。」就是咧勸人讀冊認字著用苦心。俗語嘛講,食一歲,學一歲;食到老,學到老;食到死,學到死;死毋通學,逐項攏通學。想到遮,咱人著敢緊趁這馬,老罔老猶閣會哺塗豆的時陣,殘殘報名參加今年八月的「海翁廈門臺灣文學營」,想講嘛欲來好好仔學習充電一下。
  一路上,逐家有歌有曲心頭鬆,唱歌唱曲解心悶。課程精采閣多元,內容豐富閣充實;臺灣佮廈門的教授老師,才高八斗,不只腹內全膏好內才,閣教學認真,十八般武藝精通盡展,會使講是「肚臍開花,蜘蛛吐絲」無一項袂曉,無一項毋捌的。
  臺灣老師教授的課程有安排,蔡金安「臺灣閩南語的復興運動」、吳國禎「心所愛的臺灣歌」、陳明仁「臺語俗語分類」、何信翰「臺語欲佗看?新世代的母語傳播」紹介臺灣溪頭妖怪村裡,足濟店頭家用真趣味的臺語文來介紹店面特色,吸引真濟觀光客來交關;李勤岸「咱的詩人咱的歌」,特別聽著三首李教授的詩用藝術美聲的方式來演唱,阮自生睭目閣毋捌看過臺語詩有這款表現方法,真正是大開眼界,令人佩服。另外,廈門部份有陳耕「閩南文化進社區的意義、宗旨、目標和方法」、鍾樺「閩南語合唱歌曲的春天」、李向群「海滄歷史人文縱橫談」、葉宏民「簡介大陸南語歌曲近30年發展狀況」、周長楫「閩南方言與文化進校園」。攏總有十个課程主題,攏真精彩,若親像珍珠瑪瑙、山珍海味,主人搭心準備,早就已經攢便便,囥佇阮的眼前囉,予阮有通食閣有通掠。
  課程結束了後,老師教授嘛真親切佮咱誠懇交陪。一開始,晚會的時陣,蔡金安老師唱一首歌詞優美的台語歌曲〈菅芒花〉:「菅芒花,白無芳,冷風來搖動;無虛華,無美夢,啥人相疼痛?世間人錦上添花,無人來探望,只有月娘清白光明,照阮的迷夢。……」滄桑的歌聲,沓沓仔唱出遮濟年來,伊兩岸奔波,為臺語文化、文學骨力拍拚的心酸,實在無簡單,聽著是會使人心肝頭拍結毬喔。
  紲落來,陳明仁老師佇遊覽車頂,看逐家盤山過嶺,長途旅行,坐車坐甲誠辛苦閣無聊,就那背那唸伊寫的一首詩〈拍賣老臺灣〉來慰勞逐家:「閣來,這對枕頭/請出價,小等……/睏過數十年的恩愛/阮兄弟姊妹攏來出世/恁欲出偌濟/來,聽詳細/這對舊枕頭/睏過大東亞戰爭/睏過二二八事件/孤枕難眠的目屎/緊張驚惶的歲月/睏過臺灣的歡喜佮心酸/恁欲出偌濟/……」老師一唸煞,逐家噗仔聲隨大聲共催落去,所有的辛苦隨擲到十三天外。後壁,學員嘛有人起來分享家己寫的詩,予逐家品捧一下。若無老師拋磚引玉的效果,阮嘛無機會當聽著遮濟首好詩,實在是聽著趁著,袂䆀袂䆀。
  後來,一陣人做伙去中山公園散步時,看著一粒大石鼓頂懸,刻著國父孫文的題字「天下為公」,李勤岸教授隨笑笑仔講:「按呢毋著喔,天下攏是為著公的(kang--ê),這句話有嚴重的性別歧視喔。」教授滾耍笑的智慧,予逐家聽了笑咍咍。
  兩岸來參加的學員水準嘛是蓋懸,正港是「一聲蔭九才,無聲毋免來」,我對in的身上,嘛學了袂少的真功夫。親像珍勝大姊的囡仔詩,東雄兄的臺語詩,攏寫了削削叫,好唸好聽,唸了閣會紲葩,定定登佇《海翁台語文學月刊》頂面;另外,忠義兄對相褒歌的收集研究,百靈兄對俗諺鬥句的靈活運用,更加是綿死綿爛,堅持到底。
  時間過了足緊的,七工六暝,一目nih,窣一下就過去矣。逐家對本底素不相識,到後尾仔變做破腹相見的一粒一,實在予人足感心的。好佳哉,這改有報名來參加,若無,逐工佇厝裡,無歌無曲,連鞭就成戇人矣。這屆的海翁文學營,會使講實在是辦了非常的成功圓滿,這逝路行來,拍開阮的眼界,才了解著臺語文學是如此闊莽莽、闊閬閬,無邊無界。沿路那欣賞文學美景,那熟識遮濟仝款對臺語文學有興趣有研究的朋友,行李滿滇的感動,予人今分開就開始向望期待明年閣一擺美麗的相逢。

海翁台語文學第165期2015.9

檢視次數: 460

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款