風格內 ê Phōng-kó-tàⁿ

[施俊州]

隔壁 ê 隔壁是 1 king 性格 ê phōng-kó 担，hit-lō 味有影「粉」tō tio̍h。

Lán 講「粉」，是任何 1 種mi̍h-kiāⁿ、物質，管 thāi i nńg iah tīng，kā 磨 kah 幼幼幼，講 khah 文--tsi̍t-sut-á 號做「末狀」ê 1 路 mi̍h，像 tīng kah ná lán ê 命 ê 石頭、鐵 á、金 á，磨 hōo 幼號做石頭粉、鐵粉、金 á 粉。

是講你看 hōo 斟酌，he tshāi「米」字爿--ê，m̄ tsiah 講鐵 á 粉、石頭粉、金 á 粉，甚至 suān 石磨做粉，tsiah--ê hiah--ê lî-lî-khok-khok ê「粉」，絕對 m̄ 是第一義--ê。

Ē-sûn-niâ「粉」是 gíng 磨五 穀 ê 產物，iah 是講 sa tsiah-ê 產物去 lih 加工所做--出-來 ê tshuì-tsia̍h-mi̍h，譬論講麵粉、蕃薯粉、綠豆粉，米粉、粉粿、粉條、粉圓、冬粉，iá koh tsi̍t-kuá 無粉名有粉實 ê 米奶、米篩目、粿 á án-ni。芳 hooⁿh！1 路 mi̍h nā 芳，磨 kah 幼幼幼 ē koh-khah 芳。Tse 是古早做農 ê 社會 ta̍k-ê 知 ê 道理，無 tō 你 ài kui 工閑 sian-sian，胃腸、心肝窟 á ē thang 透，有注心注意 leh 想人世 tāi，定著 ē 發現 tsit-iōng 理。

Hiőo！我 tsit-tsūn the tī 1 担醬 king，ah to tsái-khí leh 賣豆乳、蔭瓜 á、糖簽、麵 thi tsit 類 ê 醬菜担――我 tio̍h bî--tsi̍t-時-á。Hiő！後手爿 1 king khiā 大路邊 ê 漢藥店，tò-pîng-king 賣 pháng、tsiàⁿ-pîng-king leh 賣花；3 khám lóng khiā tī 中正路，lán 所講 ê 大路邊。Phōng-kó 担算 tī 醬 king 隔壁 ê 隔壁 ê 隔壁，án-ne 實際 ê 位置關係 tsiah 算 pué 有清楚。

Tsit-lō 時辰（sîn），花店 kap kiu tī 市 á 內 ê 醬 king kāng 款，早 tō 無 leh 賣--a，是講 iá ē-tàng 看 tio̍h lè-sù、空 ê 花筒 hē tī khah 內角；店頭、亭 á-kha 換排清一色 1 格 1 格、kuân 低 khám saⁿ 連 ê kué-tsí――lìn-gòo，我 m̄ tsiah ē 講 he 是 1 担 phōng-kó 担 án-ne。Siő！Lìn-gòo 味有影「粉」tō tio̍h，無輸以早 tiāⁿ leh kiâⁿ ê 粉 king……

講是清一色，he lìn-gòo iá 是有大細粒之分。Tō 是 m̄！He 担 á 賣 tsiâⁿ tsē 款 lìn-gòo，色緻、大細粒 lóng 無kâng，有紅--ê、ā 有黃--ê，koh 有綠色--ê，綠 kah 粉粉粉 kong。有 hit-lō 滴滴 á 粒，看--khiài 酸 bui-á 酸 bui koh bâ-bui-á 甜 ê 樣；有 hit-tsíng 形膨 sai-sai，ká-ná iá bē 送 Mè-tńg-hong（媚登峰）ê 婦 jîn-lâng ――lán 知 he 是來 tī 日本 hú-sih（富士）ê 大粒 lìn-gòo；hit 款中 pān 中 pān，紅 kì-kì iah 綠 kah 有夠 tsiâu 勻--ê，lán mā bat tō tio̍h，來 tī 美國陽光之州 California。講實在--ê，我對 phōng-kó ê 智識 tsiâⁿ 低路，koh-khah m̄ 知世間 nah ē 有 tsit-lō kui 心 leh 賣 lìn-gòo ê phōng-kó 專賣店？

講透機，lìn-gòo ê 味有影「粉」kah 無臭 siâu，我 ku tiàm 醬菜担 tsiah hn̄g koh 鼻ē tio̍h！我 the tī hín 內底無人知，ah to 罕得有人 kiâⁿ kah tsia 來 kong。市 á beh 晝 tō 收 kah 差不多，何況 tsit 時 tsūn--leh！Kui-ê 市 á 暗 sàm 暗 sàm，kan-na hit 角 sì 有 1 枱羊肉担，hn̄g-hn̄g 有聽人 leh 喝拳 sái 話尾，koh 青菜、肉絲 á 落油炒、煎匙 píng 白飯 khia̍k 亞鉛鼎 ê 聲說。

Hiőo！1 粒 giô khah 贏 3 條茄。Phōng-kó 担 tsit-tsūn 換 1 个 tsa-bóo gín-á 來 leh顧，tíng-ē 身 iá 穿員林家商 ê 制服，胸前綉學號、年級 tsuā，kap he 菜市 á 名。

瓊，lán án-ni 叫--伊 khah tsia̍h 心ko，員商家政科三年 á ê 瓊，坐 tī「粉」kah 無天無良――夭壽芳 ê phōng-kó 內底面，tiām-tiām hia 坐，目光有時 ē 看 tuì 有車 ná 無車 ê 中正路，kap 對面爿 hit 條足細條 ê 巷 á，罕罕 ē ua̍t tuì hit-pîng 路頭路尾 leh siòng，mā m̄ 知有 siam tio̍h siáⁿ 貨--無？

瓊--a in 老 pē，原底 leh huāⁿ 担 hit-ê 中年人，ah 無想 beh tńg ê 款，手 tīⁿ 1 枝水瓶銃 tsia tsuāⁿ hia tsuāⁿ，ta̍k 不時 koh tsuāiⁿ 身形走 tshua̍h--去 ê phōng-kó――kā he 果身 khah 胖 ê lìn-gòo tshiâu hōo 在 pān，蒂頭 lóng ǹg thian-pông、hōo 肚臍 khang 笑天。

像 tsit 款 m̄ 是 luā 鬧熱 ê 鄉鎮，暗暝 nā 來，kui 條街 tō 無輸 hit-lō 3 級車頭ê 月台，tiām 靜 koh 端莊―― ká-ná 對號快雄狂過站、無停了後 ê 無聊，甚至 pha-hng。

Tsiâⁿ tú-á 好，中正路尾 tō 有火車頭，3 級--ê，1 pang 莒光號 tsiah 雄狂駛落南 niâ，南北二路 ê 世事 bē 輸 kap lán lóng 無 tī-tāi。

車頭前有 1 担像夜市 á án-ni leh 賣 ê 唱片担，tng leh 放送上新 ê 華語 kha-seh-tòo（cassette）〈快樂天堂〉……我 m̄ tsiah 講「tiām 靜」、「pha-hng」kap「荒涼」lóng 算不得已 ê 字詞，ná 像 tàu-tah koh 無 siáⁿ tah 心 án-ne。Án-ni 會好--ah，he 歌聲好親像響 tī tsiâⁿ hn̄g tsiâⁿ hn̄g ê 所在，bē 輸 20 幾年前 hiah hn̄g，雖然 tsia kàu hia 無 kah 100 公尺。

Kui 條街 á lóng tī 風格外，雖 bóng 市面 kap 其他所在無 siáⁿ 各樣。Tsia 有 人，hia ā 有人，sì-kè 有人 leh kiâⁿ 踏 ko。頭前有賣魷魚羹--ê，後爿有賣 sù-siông 米粉湯 kap 滷肉飯--ê。路頭圳溝 hia 有 1 板橋，號做「燕霧」；橋邊孤門獨戶，有 1 king 古式 tshù-hiā lia̍h kuân hit-tsíng 低厝 á 棧房；厝前厝後停 1、2 台 等 leh hông 叫 ê 裕隆 á 勝利 2000 iah 2 千 2 hài-ià。He 是庄 kha 所在 ê「車行」――計程車行，beh 坐電話 ká--來 tō 有。車行邊有 1 欉水楊，樹 á 邊 kám 無坐 2、3 仙閑人 tī hia tsia̍h-hun、phò-tāu，káⁿ 是 ùn-tsiàng、人客？Kui 條中正路，家家戶戶無 khiā 店--ê，厝內 mā lóng tshiō 出暗頭 á 溫存 ê 燈光，非常日常。

Kah-nā án-ne，荒涼是 beh uì toh 講起--leh？荒涼，thái-thó 是 phōng-kó 担箍圍 á 15米方圓地尺 ê「風格」、氣氛，iah 心tsiâⁿ？！15公尺以外，tō 是 「風格外」iah 非風格。

Lú 講 lú hàm ko！是講，千萬 m̄-thang lia̍h 準 he 是我 ê 心情，雖然我 Si-á Bòng ngóo（我）心有諒解――有 tâng 心--lah。Koh 翻頭 kā 想，tō 算 he 心 tsiâⁿ 我有理解、有同情，mā m ̄是第一義--ê；風格是 tuì 10 guā 公尺外 ê 1 對目睭，流洩--出-來-ê。

Hit 2 蕊目 bih tī 10 guā 米外 ê 中正路對面――Phōng-kó 担 ê 對面爿，1 條暗 sàm 暗 sàm ê 巷 á 路，kiâⁿ--入-去有 1 king 長老教會，駐會--ê 是 1 位手勢 hiáⁿ koh hàm-kóo、口氣嚴 kah ná《舊約》風格 ê 牧師。Hit 雙目睭 tsīng 開始 tō lia̍h tsia 金金 siòng，瓊 in 老 pē 並無致覺，ká-ná 人在江湖、身在其中鼻 bē tio̍h lìn-gòo 粉粉粉 ê 味。

M̄-koh 瓊知，伊知 hit 2 蕊目睭，hit 對目睭 tsīng-kàu-taⁿ 臘曆紙見紅 lóng ē 來看--伊。Tsīng 眾人 leh 瘋（hong）〈明天會更好〉hit-tè kha-seh-tòo kah taⁿ，年 guā 有--ōo――胸前 ê 年級線 mā uì 2 條 pìⁿ 3 tsuā kong。

生份 ê 目睭，看久 uân-ná ē 熟 sāi。瓊知影 he 目光 ê 主人是 tsa-poo-ê，tī 台中 leh 讀高中，kìⁿ-nā 歇睏日 lóng ē uì 外庄騎鐵馬來看--伊。少年--ê 鐵馬 phīng--leh，phīng tī 巷 á 口 khah 入--去、he 人家厝 ê 壁堵，人坐 tiàm 鐵馬 á 頂 gōng-gōng-á siòng、暗暗 á siam án-ni。其他--ê lóng 算風格外 ê tāi-tsì，免 siáⁿ siuⁿ 交代。橫直 tsa-poo--ê 有寫過批，是講 2 个 hām 講 kah 1 句話 to 無，緣分自頭 lóng tsiâⁿ 神秘。

Bi tiàm 壁堵 ê 陰影，hit 對目睭 leh siòng tsit-pîng――偷 tō 是--a。Lán 講「偷」，是 1 種失德、失禮 ê 行為，因為事主僭權 kā 別人 ê mi̍h àm-tsīⁿ-á ni--來變 i--ê。賊 á！He 是 1 對賊 á、慣竊 ê siáu 狗 á 目！想 hōo 真，he hông 偷--去-ê 是 siáⁿ？Phōng-kó？感情？青春？Iah 是 kāng 款無人 thang準算 ê 時間、性命？……

上代先，瓊 mā 是 hông 看 m ̄知--ê，kap in 老 pē kāng 款人在江湖。古禮有 ān，探門風了、講親 tsiâⁿ tsìn 前，tsa-poo--ê ē-sái 去偷看。Án-ni 比，tsit 例 kám tō 有失人 ê 禮 ka̋？Siah-sì-tsìng 無人知，或者講 he 是少年時代 1 tsíng 觀星望斗 ê 人生風格？

Lán gia̍h 頭看天――庄 kha gín-á lóng 有 ê 經驗，看天星閃閃 sih-sih，其實 hiah-ê星早 tō 死千年萬萬年！風格內 ê phōng-kó 担，展現夜空死亡 ê 運命……

我 Si-á Bòng mā 有 ka-tī ê 風格，你鼻看 māi--leh tō 知。有--無？1 tsūn 1 tsūn 咬肉、tsia̍h 心 ê 醬菜味！He tō 是我 ê 風格。

Tsīng beh 暗 á 來 kàu tsia，想講 tsit-tá-á sù-sī sù-sī，tō 先 tiàm tsia ut--tsi̍t-暝-á 好。像 lán tài tsit-lō 命，ma̋-á-tsài 路頭路尾揀 toh-tsi̍t-pîng to ài la̍k 骰 á--leh，beh thái 有場地按算講眠床 beh 安 tī toh？Ah to 看所在 bih-tshih bih-tshih，tō suan--入-來-ah！Koh tshuē 無椅 liâu thang the，m̄ tsiah ē 矸 á tshāi--leh、包袱 á hē--leh，紙 pang tshu hōo 好 tsua̋ⁿ-á 安居落--來。

M̄̄-thang lia̍h 準我是 thái-ko 爛癆 ê 流浪漢、酒鬼。Lán leh 流浪有 ha̍h 實，ài sám-lim mā 有影，m̄-koh 我 m̄ 是 lín 所理解 ê 流浪漢，hit-lō 肩胛頭擔 1 枝破雨傘、吊 1 包 m̄ 知 siáⁿ 貨 ê 暗鬖鬼。我 ê 包袱 á 是 hit-lō 有 thang té 書 ê tsheⁿ 綠色後脊 phāiⁿ-á，相當 mā 是「陽明國中」夜間部出業--ê；lán ê 作文 ，sia̋n-séⁿ mā lóng o-ló 有 tio̍h，欠栽培 niā-niā。

Lim bóng lim，頭殼 mā tsiâⁿ 清楚。講 lán m̄ 是在地人，地頭 mā 來有 7 工--a。Siáⁿ-mih 店 khui tī toh、小食担排 tá 位，mā lóng 清醒 á 清醒 ko――Pháiⁿ-sè！應該講「清楚」tsiah tio̍h，「清醒」--ê 是人、是頭殼 tsiah tio̍h！我有按算 ka-tī ê 地頭 ke tiàm--幾-工-á，雖然 m̄ 是在庄--ê，畢竟平平 lán 彰化 ê 塗肉是--m̄。

是講 ke tuà--幾-日-á 可以，nā beh 停 kui 個月--ê，千萬 m̄-thang。經驗經驗 tō 好，況且 1 个所在 tuà 久 ē ngāi-gio̍h，bē 輸有目睭 ta̍k 不時 lia̍h 你金金 siòng。

前幾日 á 我 lóng 睏 tī 圳溝邊 ê 公有停車場，beh 暗 á tsiah 徙來 tsia kong。頭殼 nā 無清楚，beh thái 有才調 tshuē kah tsia 來？He lìn-gòo ê 味「粉」kah ná siáⁿ--leh！

目睭 siòng tuì hia，瓊 in 老 pē m̄ 知 tiang 時無 khuàiⁿ 人--a。瓊猶原定著坐 tī hia，頭 àⁿ-àⁿ，雙手 hē--leh 我 lut--你、你 lut--我 án-ni，giōng beh 出油有。Lú 來 lú 無場地--a，tsia gún-tau ê 水果担 neh！siáu 狗 á 目！風格內 ê phōng-kó 担 kap 目睭之間，有超過 10 米以上 ê 記 tì。

瓊 kap 我 Bòng--a kāng 樣，lóng 怨 tsheh hit 雙目睭，hit 對 siáu 狗 á 目。有時我 mā 有體會--lah，he 是 1 雙善意 ê 目光，流露同情 koh 虧欠 ê 感情，lām-lām 做伙講，號做……

Lín m̄-thang 想 siuⁿ tsē，lia̍h 準我 leh 講觀世音 iah 耶穌、是 lán leh 傳教，m̄ 是。我 Bòng--a 無 hiah 偉大。Tsīng 我 kiâⁿ tsiūⁿ liân-huê 路，甚至 koh-khah 早前，鼻 he屎味、醬 khuì khah tsē 過芳味――he 粉粉粉 ê 臭味：king-thé、phì-siùⁿ、ngāi-gio̍h ê 眼神、目箭。

Lán 是世俗 kah 有 tshun neh。是--m̄？炒青菜、炒羊肉、炒飯 ê 芳味、魷魚羹九層塔 ê 芳 khuì。市 á 內，中晝 1 點 tsìn 前有 1 担冷碗粿，素素無 tsham 肉豉 á 餡 mā tsiâⁿ 芳 kong！Koh 有 pháng 店、漢藥店通透出--來-ê 俗 pháng ê 味、當歸 hōo 人 bē 厭 ê 味……Hām 手頭 tse 矸 á，味 lóng 比 he 眼神 khah 芳。M̄ 是我心 ngē，是 lán tsit-ê 世界 kap 我 phīng ngē……Mài 講，mài 講……我 ê 目屎雄雄 sì-lâm-suî，giōng beh háu 出聲。

M̄ 是 lán beh háu-luā--人，m̄ 是，一切 kap lán ê liân-huê 告白無 tī-tāi。Lín 看，少年--ê uì 對面巷 á kiâⁿ--出-來，ǹg 1 雙手 lut kah 出油 ê 伊 kiâⁿ--來。

……1985 年年底發行 ê〈明天會更好〉，歌聲 bē 輸幾萬光年外 ê 星光，tī 車頭前hiah hn̄g ê 唱片担 leh tân。瓊 khiā--起-來，手 iap 後、真 bē 自在 ê 款。我記 kah tsiâⁿ 清楚，tī 暗 sàm 暗 sàm ê 菜市 á，tsi̍t-sì-kè 椅頭 á kap 碗粿 ê 油葱味，少年--ê 講 ê 頭1 句話：

「Lê-bóng 秤--1-斤……」我記 kah tsiâⁿ 清楚，he 是〈快樂天堂〉發片 ê 1987 年，lê-bóng kap 旺梨大出 ê 季節。

.
_____________________________________________

〈風格內ê Phōng-kó-tàⁿ〉得獎感言

Úkhuh：Ài koh kā 你提醒--tsi̍t-piàn，你 ê 名 tio̍h 唸做 [iú-khuh]。驚你 bē 記--得，koh 解說--tsi̍t-piàn：「Úkhuh」是「自由區」尾 á 2 字 ê 叶音――「叶」讀做 [hia̍p]（Ta̍k-kái lóng ài án-ni ㄅㄆㄇㄈ，真 thiám！Siâng 叫你是台語文盲）。「自由區」是和製漢字詞，uì 英語 phrase「Area Free」翻--過-來-ê。Án-ne 知--a ho͘ⁿh？Ah to bat 趁大錢 ê SoGO、大統百貨、Sín-kuáng-sán-é（新光三越），或者 lán 半暝 á 3 點 tiāⁿ lōng leh 買 hun、1 kái 買 3、4 條 ê Tsiá-lò-hû 安平店（24 hr.），tsit-lō 大 khám--ê 設 tī 邊 á 角、leh hōo VIP 兌換免錢貨 ê 服務台 iah 奉待區。是--lah，「free」、「自由」是免費、免錢 sio 送 ê 意思。是講，nā 套 tī lán 2 人 ê關係，或者講施 á Bòng ê liân-huê 人生，自由 tō m ̄是 hiah-nī「自由」--a。人 long 是 ài 付出代價--ê。龜 kha 龜內肉、做乞食 iā tio̍h 1 kha ka-tsí-á，你講是--m̄？Lán lóng 活 tī 1 个看有讀無、甚至無致覺 ê 世界，tō 算鼻 ē tio̍h hit 款 àu 敗 ê 氣味。Káⁿ 是李亂無意 á 無意講出 tshuì ê「非自由區」――ká-ná 你 kap 我，活 tī 1 tsíng 互相 tîⁿ-tuè、永遠無法度削離 ê 關係？

無 m̄ tio̍h，Bòng--a tō 是李亂（Bòng--a 本名施裕孟，是 gún 二伯公 ê 孫，慢我 2月日出世），人格 kāng 款不良不良；現此時 tī 中庄 Bé-tshù hit 箍圍 á leh 顧 kiáu-king（iá 無 kah「整 kiáu」hiah tsiūⁿ-kioh）。Lán 發表過 1 篇小說，號做〈李亂 ê 冊單〉（2009.04，《台文戰線》14 期）；驚講 3 位評審看破 lán ê kha 手，m̄ tsiah ē「偷天換日」、tiàm 文本當中烏龍 se̍h 桌，kā 李亂 ê 名換做「Si-á Bòng」（其實是 hîng hōo Bòng--a）。Tī tsit 篇 m̄-tsiâⁿ 散文，施 á Bòng 雖然是敘述者，論真講 m̄ 是重點。重點 tī hit-ê「iáu」無名無姓 ê 少年家 kap 瓊（窮？）ê 關係。Hit-tsūn 少年--ê tī 風化城 leh 讀台中二中，臘曆紙見紅 lóng ē tńg 來偷看瓊。少年--ê bat kā 我講：I àm-tsīⁿ saⁿh tī 頂 pak-kuà--ê bē tsió，獨獨瓊 hōo i 1 款「驚為天人」ê 感覺。Tō ká-ná Bòng--a 講--ê，「驚為天人」tsit-lō īng kah 臭 phú ê 成語，kap「荒涼」、「pha-hng」kāng 1 路，lóng 是不得已 ê 字詞。He 是 1種「神秘」ê 心理感受、性命經驗，完完全全列 tī 非 ∕ 自由 ê 項mi̍h、人生貨底 kap「pùn-sò」，iā 是少年大頭 á ài 付出 ê 代價。

我想，你對 lán tsit 篇散文 ê 枴 á 花、創作 mê-kak，tiāⁿ-tio̍h 無趣味。你 khah giàn beh 知--ê 是瓊 ê 真名：李瓊瑤。大頭 á kā 我講：Hit 日，一生中獨獨 1 kái，i tiàm 電腦頂 the̍h tsit 3 字 google--tsi̍t-ē，隨走出 ká-ná 天星 、 海底沙無 tè 算 ê 詞條，lóng m̄ 是瓊。Án-ne 你知--a ho͘ⁿh！Lán lóng 活 tī 自由區無自由 ê 世界，1 種互相 tîⁿ-tuè、永遠無法度削離 ê 關係，只要 hit 枝筆 gia̍h tiâu--leh。

.

[胡長松]

俊州是咱身邊尚有敘事自覺的敘事者，總講一句，伊底講古的時，不時提醒伊底講古，予咱思考講古這件代誌。窮實講，這是真有後現代精神的寫作實踐，是上新的物--a。

咱這站真好運，詩人張德本前輩提點阮一个重要的米國小說家號做John Barth(詩人講的時，我想對John Dos Pasos去)，過去埋佇阮的屜仔底，今提來kap逐家菜poo2根罔咬鹹交換咬一下。

伊有一篇小說叫做〔自傳：自我錄音的小說〕，第一句話是按呢：

見若　聽　我者　以講話的方式　賜我活命。

[施俊州]

我 nā 寫小說，bái 才 ê 所在 tō tī 故事性（情節）hua̍t-ha̍t（乏乏），tse 是「先天」ê 欠點（ài koh 訓練、加強），m̄ 是 thiau 意故 beh「去情節」，實驗新小說（nouveau roman/new novel）；拆白，tō 是 lán 無夠「小說本位」，本格素養無夠。Ē án-ne，m̄ 是因為我生活經驗無夠，可能是過去長期讀詩、寫詩，想像、落筆 ê 方式 khah 偏「imagery（意境 ∕ 意象集體）」思考，我自稱「狗改不了吃屎」！

相對來講，觀點、敘事 ê 問題是小說 tsit 科 khah 趣味、koh 有法度傳「教」ê「技術」，我 mā iáu leh o̍h（學）。講 tò-tńg--來，nā beh 真正做小說家，小說「本位」iá 是 khah 重要。Tsit 點，我 ài koh 向長松學習、小說 ke 讀--寡。所以講，現此時我 iá m̄-káⁿ 僭權講 ka-tī 是小說家。另外，有 ê 人可能 ē hiau-gî：散文 nah tio̍h án-ne 寫？其實，我完全無 beh 挑戰散文成規 ê 意思。Koh 講 khah 白--leh，我根本 tō 無心寫散文。Tsit 款 mi̍h-kiāⁿ 投散文獎，是「不得已--ê」。

[胡長松]

荒ham3 (閣有咱用舊去的詞：拋荒)的imagery/style是理解俊州的文字的一个基礎，位【李亂ｅ冊單】以來，咱就有這个感覺，這是ｍ是俊州青春記智的原型，若有趣味，咱過一站挺好來罔破豆。

較早咱攏認為小說的「本位」是情節（故事）佮人物（閣二者後面的〔意義〕），毋過這个本位嘛確實予實驗者檢討一站矣。小說敢是故事？我佇一回的研習會內面佮一寡朋友開講，我所理解的「小說」是按呢：「真實的作者借小說的述敘者（隱藏的作者），講古予隱藏的讀者聽，閣透過真實的讀者閱讀（重頭講）來重建」的一个過程。簡單講就是：

真實作者-隱藏作者-情節（故事）-隱藏讀者-真實讀者

新的小說是對這个過程的反思：情節敢會使提--走或者用畫面代替（親像霍格里耶的小說）？模仿共真實作者提--走是啥物情形（親像我引John Barth的彼段）...等等。

實驗過，忝矣，猶是會使轉來寫寡［老掉牙］的故事，是我個人的體會，罔參考。

[施俊州]

想 beh kā 長松 ê 小說「公式」牽 tuì 小說 kap 詩創作 ê 問題：

真實作者（AA）-隱藏作者（IA）-情節（P）∕ 敘事（N）-隱藏讀者（IR）-真實讀者（AR）
敘事：narrative；敘述：narrate / ion；敘述者：narrator ∕ persona：（第一）人稱角色
隱藏作者 ê 相關概念：ethos、narrator、persona、tone、voice......

我講現時台語小說 ê 成績（水準）超越現代詩。反對--ê 佔 khah tsē。耀乾兄講 i「理解」我 ê 講法，m̄-koh mā「無贊成」。Hit 工中秋節，宗源先--ê 頭 1 kái 聽人 án-ne 講，mā 反對。 Tsín 無 beh 講 tse。Tse ài 實際舉例、比較，工事 siuⁿ 大。Ta̍k-ê ē-sái 去讀 09 研討會耀乾發表 ê hit 篇論文，做思考 ê 起 khiàn。我 beh 講--ê 是：理論上，文類屬性 ê 比較。

我先設 1 个前提：以寫「好」詩、「好」ê 小說做前提來講，詩「先天」tō「輸」小說 thiám-thiám。為 siáⁿ-mih？因為 lán 讀 tio̍h ê 好詩，一般 lóng 停留tī AA―IA ê 層次，而且偏 AA，in uá 靠--ê 是修辭 ê 力量，以及修辭後爿 ê 「形上思考」。好 ê 小說，iah 是有基本素養 ê 小說作者 tō 無 kâng，每一個環節 tsē-tsió lóng ài kha̍p--tio̍h（暫時排除 AR tsit-ê 因素）。用 khah 白 ê 講法，tō 是虛構（fictoin ∕ 小說）ê「神力」、神秘力量、工夫，詩人「輸」小說家 thiám-thiám。Sa 頂面 ê 公式來講，IA、P / N、IR lóng kap AA 有關係，甚至根底 tō 是 AA ê 投射；tī 每一個環節（層次），小說作者 lóng ài 假扮、分身、戴 siáu 鬼殼（persona）。

有人可能 ē 講：詩 m̄-nā 靠修辭 niâ，mā ē-sái 處理其他環節，親像長篇史詩、短篇敘事詩 án-ne。所以我 m̄ tsiah ē 講，詩人 ài khah 有野心--leh，pheⁿ 1 寡心力往 tsit-ê 方向 kiâⁿ。Tsit 時 tsūn，詩人 kap 小說家其實是 kāng 國--ê（Tse《台文戰線》小說專題有討論--過），lóng the̍h「藝術國」ê 高等護照。

PS. 回應長松頭 á 篇：Tī 現有 ê 台語小說內底，khah 有「敘事自覺」iah 是後設色彩 ê 文本、作家，iá 有陳明仁 ê《A-chhûn》kap 黃元興 ê 講古「小說」（黃是無自覺、「創作犯規」；i 是 o̍h 吳樂天 ê 風格）。
.

[胡長松]

文類之間的比評，我看是相對的。掠敘事的變化、闊度作標準，免講小說嘛贏。我感覺台語的小說愛kap世界的小說比才有建設性，kap詩來比評，較無大的緊急性。這是講，咱愛思考，世界的小說寫到啥物地步矣，阿咱的跤步綴到佗，這是我個人較關心的代誌。

相對的，台語詩kap世界的詩來比就真要緊，愛探討詩的技術本質佇佗位，世界的詩寫到啥物地步矣，台語的詩步綴到佗位。

我理解俊州按呢比較的[精神]，小說重敘事的步數，會使予眾詩人參考無bai2。相對的，小說家愛向詩人學習語言的密度kap修辭。

佇我個人的心肝底，我認定現代小說猶是目前人類敘事藝術的王者，包括電影佮戲劇佇別位有優勢，毋過敘事這方面，我看攏猶毋是現代小說的對手。

[施俊州]

真實作者（AA，我）；敘述者（N，施 á Bòng）；少年--ê（T，大頭--a，窺視者）。

2 位講了 long 在理，秋白--a 讀 2 piàn mā hōo 人感心。純粹 khiā tiàm 文本來讀，mài kha̍p AA 寫作現場 ê conditions（extra-text ê 讀法），風格是記智（tì/tî）造成--ê。問題是 siâng ê 記智？N？T？文本並無交代（絕對 bē-sái 是我 AA，無--者文本 ê 框 tō 破--去-ah）。我想，tse 應該是秋白 ē hiau-gî ê 原因？

*Án-ni 會好--ah，he 歌聲好親像響 tī tsiâⁿ hn̄g tsiâⁿ hn̄g ê 所在，bē 輸 20 幾年前 hiah hn̄g，雖然 tsia kàu hia 無 kah 100 公尺。
*風格是 tuì 10 guā 公尺外 ê 1 對目睭，流洩--出-來-ê。
* Lán gia̍h 頭看天――庄 kha gín-á lóng 有 ê 經驗，看天星閃閃 sih-sih，其實 hiah-ê 星早 tō 死千年萬萬年！風格內 ê phōng-kó 担，展現夜空死亡 ê 運命……
*風格內 ê phōng-kó 担 kap 目睭之間，有超過 10 米以上 ê 記 tì。
*我記 kah tsiâⁿ 清楚，he 是〈快樂天堂〉發片 ê 1987 年，lê-bóng kap 旺梨大出 ê 季節。

Tsit 幾句 tàu-tàu khiái（「起來」連音）讀，〈風格內 ê Phōng-kó-tàⁿ〉ê 敘事 khang-khiah（空隙 ∕ 「漏洞」）、龜尾 liu，tō suan--出-來-ah――記智、「風格」同是 N、T、AA ê「風格」、記智，ài sa 外文本 ê 證據、脈絡來合理化。