阮踮冊店等汝踅煞了後…….

[王立信]

阮踮冊店等汝踅煞了後…….

毋知係落土散赤底
抑是喪鄉失栽培
吃褒神.臊腥鱻.古板老形體
沒膽.耳空輕.閣雷公性地

假日休睏咻飽趁黃昏
即對老尪公婆仔參詳
四界撈撈踅踅咧
隨儂愜意講好勢
汝掛烏仁阮老花
汝有跤力興踅街
阮較斯文徛看冊
反正百貨公司吹冷氣
抑免開半尟

自安呢騎鐵馬 翁某相渡
尻脊抵腹肚
黑煙嗆歸路
來夠大統目的地
兵分双路照慣例
誠品咖啡兼咧賣
偌掀偌咧相寶貝
政治經濟無興趣
英語豆芽沒交陪
腳步總是歇惦固定勢
凊采提即本台語冊
頭仔興興尾仔冷冷
徛殄.坦敧.換推.改跔.
即粒頭壳係昏鈍昏鈍
等久沒人 暗碎念,
俺某吓汝是踅去佗
小可物件買及歸世人

阮佇冊店 等汝踅煞好來轉
心情袂平順,沒講沒擔
越頭看著可愛兮汝懟阮笑一下；
買煞啦呃;歸仙人偌聽著船螺聲
大船入港囉…….。