台文戰線聯盟

1.做tō tio̍h矣

  Morakot風颱已經過7工。
  所有嚴重的災情佇各種媒體的傳送下底,相信逐家定著tsiânn清楚,mā有濟濟的同理心;就親像10冬前921大地動的心情sio-siāng。
  10冬前921的時,因為空課在身,所致除了捐助薄厘絲的心意以外,本人無實際深入災區參與救災的行動。
  是m̄是人若食老khah會感傷人世間的生老病死?雖罔,921的時,我mā tsiânn艱苦心;不而過,這回造tsiânn人掠厝拆、活埋鄉親不計其數的Morakot,予我閣khah艱苦心,足足規禮拜。
  足足規禮拜,關tiàm房間仔內觀看網路頂面的濟濟消息,感傷、鬱卒無法度消tháu我滿腹的憂悶。其實,台灣人便若tú著大災難所表露出來的疼心,予我閣khah大的感動。
  這款感動,喚醒我的確ài行出來,若無,我會良心不安。
  食到40外,2冬khah加無頭路,閣會當雙手空空去讀研究所,這敢m̄是好命?
  自從搬來嘉南平洋徛居,tsiânn做飄撇的下港人了後,3冬外來,受我前後蹛過的台南縣市鄉親濟濟照顧、支持;所致,昨暗決定今仔日去新營的台南縣政府救災中心報到,出一寡khùi力鬥搬救災物資,為災民,mā為tsiânn做台灣人的天地良心。
  早起8點kha-tau佮阿淇、正雄兄合齊,ùi這回平安無事的安平出發,9點半進前完成報到手續。救災中心裡的志工挨挨陣陣,查某、查甫,少年、中年,眾人展現一粒熱phut-phut的心,kan-nā為著救災,只要一句號令,逐家拚勢衝頭前,親像驚搶輸人仝款。
  今仔日2009年8月15,我出2 tsūa任務,頭1 tsūa綴車去新化搬泡麵,第2 tsūa到下營國小搬2台貨櫃車的礦泉水,佮1陣青春的少年兄姊。衫褲澹了閣再焦,焦了閣再澹,已經5冬m̄-bat有這款經驗,khah早為錢、tsit-má為義。
  做tō tio̍h矣。

──2009.8.15寫佇流目屎的土地


2.Call人mooh水

  做tō tio̍h矣。
  有心phīng有錢加khah重要;有情mā絕對phīng有權勢閣khah重要。
  Morakot頭1工造tsiânn百年大災難了後,我就認為台灣根本無需要政府,這款對台灣鄉親無疼心的政府,有khah輸無。這款流亡政權,拍輸走贏來佔台灣地1甲子,猶原是流亡的心態;莫怪佇這件人的界管下底,災民個個四散流亡,iáu得袂著in真心的對待。
  現此時80 kha-tau以上的濟歲人,該當iáu會記得1945年8月15日本統治當局離開台灣,到10月25支那軍佔領台灣這2月日的期間,台灣是無政府的狀態;m̄過,台灣民間有1股家己管理家己的優質能力,m̄-nā無發生啥物重大的治安事件,尚且,台灣人發揮疼心,佇戰後彼段過渡時期,展現出互相扶持的人性光輝;一切的偷、瞞、騙、搶、劫,佇支那人來了後,才1日1日傷重。
  早起8點15 ùi台南車頭坐莒光號火車去新營,開69箍;為著省寡體力搬物件,開100箍ùi新營車頭坐計程仔去縣政府。9點thóng報到,量約半點鐘khah加就需要40個人去麻豆國小mooh 2000箱礦泉水,這款情形佮昨昏下晡佇下營國小做的空課sio-siāng。現tú現今仔日現身的志工人數,事實上佮昨昏差大碼咧,欲call 40個人有影無簡單;若欲閣要求全然漢草好的查甫囡仔,根本比登天khah困難;這個時陣,我的家婆性又閣giâ起來,kā家己當做桶箍,無惜面底皮大聲call人,雖罔,我明其知影喚查某囡仔mooh水有khah粗殘;m̄過,恁想,我敢iáu有別條路通行。
  Thia̍p kah滇滿滿的7台貨運車,佇逐家m̄驚艱苦的合作下底,佮麻豆國小校長請的阿助碗粿助陣之下,iáu未下晡2點就順利達成任務。
  今仔日有緣熟似ùi台北落南做志工的阿展3人組,in m̄-nā漢草粗勇、做代誌拚勢,mā有台灣人土直、伍人的性格,上要緊是in參我不止仔有話講。
  暗時轉來,予1位m̄-bat見過面的鄭先生載到台南後站,足感心。
  第2工,領著「台南縣政府莫拉克風災臨時志工證」,編號:0816001。

──2009.8.16寫佇流目屎的土地


3.姊妹兄弟

  歇睏1工了後,今仔早起阿淇佮正雄兄閣參我做陣去新營報到,準備做捆工。
  聽講阿展in 3人透早7點40就駛貨車運送災區物資。雖罔今仔日無緣佮in相會,m̄過,我的眼光的確無半點走閃,in有影是正港熱血的台灣青年。
  這tsūa阮欲去的所在是大內二溪國小。印象裡,大內我m̄-bat踏跤到,對這tah khah深的image是頭社的平埔夜祭。當該然,到這當今我iáu未曾親目看見頭社夜祭,kan-nā佇葉石濤的情色小說〈頭社夜祭〉裡,讀著淡薄仔原始的氣味。
  來到大內,予我想著這擺風災受害不止仔傷重的甲仙小林。平平是咱徛居的Siraya地頭,小林人的心內恐驚一世人oh得復原永過的樂暢;特別是in佮其他平埔夜祭khah無仝的文化傳承,向望m̄通予Morakot連根底都khau起來。
  今仔日是我踮台南縣政府做Morakot風災志工的最後1工。仝款感心予我call去大內mooh水的幾位少年兄,in無相棄嫌掠我做tshūa頭的,大內任務完成,轉去新營了後,in kho̍k-kho̍k綴前綴後,無幾分鐘就問1擺佗位iáu有需要出任務。
  其實,m̄-nā in幾位,今仔日熟似ùi東山來、iáu咧讀國中的柏翔,參in厝邊讀小學的囡仔兄,聽著欲去大內mā是衝頭前,1點仔都無咧tsùn-būn。予我上感動的是,柏翔聽我講3工後欲去屏東做志工,無第2句話隨huah欲綴我去。
  3工來踮新營有緣鬥陣的朋友,雖罔逐家無互相交換名姓,總是,佇這場因為Morakot的無情風雨所帶來的有情緣會,佇我心內,恁攏是我的姊妹兄弟。

──2009.8.17寫佇流目屎的土地


4.真情Antony

  「台灣予我真濟,我予台灣真少。」這是佇台灣教英語的英國人Antony,踮遊覽車頂的真情流露。
  今仔日綴賴清德服務處團隊去屏東林邊災區服務。透早6點thóng,1陣各地來的志工早就tshûan便便等咧上車。面頭前行過1位標準西洋面模仔、漢草粗勇的外國先生,逐家目睭隨金起來。偎近探問,伊是1位ùi英國來台灣教英語的老師。自古以來,外國人來台灣徛居對這塊土地付出真情的人滿四界,我想,Antony mā無例外;若無,伊何必苦跤穿靴管、手捾kah大包細包參眾人去災區做志工。
  來到目的地林邊,才見識著啥物叫做路糊糜仔的威力。Morakot已經過10外工矣,沿路攏iáu閣是厚tut-tut的路糊糜仔;規路攏有逐所在來的、無仝團體的志工朋友,眾人跤穿靴管、手gia̍h沙thio,無畏下港的日頭無情的苦毒,m̄-nā大粒汗細粒汗流無歇,規身軀看會著的所在、頂頂下下攏bak路糊糜仔,若親像災民咧。
  Tsiânn感心,遮的志工朋友m̄驚路糊糜仔bak kah規身軀、mā毋驚in所產生的臭味,逐家合齊,1桶閣1桶,你接予我、我接予伊,接出1幅林邊的真情人間圖。
  「台灣予我真濟,我予台灣真少。」這是ùi英國人Antony的喙裡所吐露出來的真情。咱該當予伊熱烈的phok-á聲,ah若遐的kan-nā會曉huah口號、對台灣無半點疼心的kioh-siàu,恁敢知見笑?

──2009.8.20寫佇流目屎的土地


5.路糊仔糜

  昨日屏東縣政府雄雄宣布昨昏起志工暫時莫入去災區,原底連續報名4工的行程suah按呢斷去;我m̄甘願偆落來這3工無代誌做,前暝ùi林邊轉來了後,hē生命揣網路消息khà電話,佇我tú想欲放棄的坎站,無意中看著嘉義王先生招募災區機動隊的消息,我m̄敢躊躇趕緊報名加入。
  昨昏下晡2點,王先生、虎尾來的17歲少年家威翰佮我,3位本底無任何交tshap的人,因為Morakot聚集作伙。阮ùi嘉義車頭起行,4點kha-tau來到屏東糖廠附近、開補習班的張老師腹腸開闊,kā in樓頂徛家兼民宿的6人房免費予阮蹛2暝。參其他災區志工比起來,我有影tsiânn好命。
  昨昏欲暗仔阮有先去探路,決定今仔日去林邊鬥相共。3人機動隊的確phīng團體khah有行動力,iáu未9點阮就來到林邊媽祖廟就近、水淹kah不止仔傷重的人家厝鬥清厝內。
  我kā厝主借1枝鐵耙,負責耙in隔壁lòng曠間的路糊仔糜,聽講主人走kah無影無跡,厝邊好心替in發落;規厝間的路糊仔糜,若我1人清,恐驚清2日mā清袂了。佳哉,孤鳥清2點鐘了後,1陣穿青色kah仔、ùi台中來的志工,1睏頭tsiânn 10個人加入我的陣營,眾人無分你我,逐家運用各種無仝的傢俬出力拚,歇晝了後,拚kah下晡2點外,量約kā規厝間的路糊仔糜拚kah清氣tam-tam。
  經過規日ànn腰拚路糊仔糜,腰脊骨早就thènn袂直,是我做志工5工來上界硬斗的1擺。4點半kha-tau暫停今仔日的穡頭,厝主好意講另日欲寄in家己種的蓮霧予阮3個人,喚阮留落名姓、地址,我感覺鬥相共歡喜甘願,歹勢予in破費,所致無留下聯絡方式。
  暗時轉來民宿心內掛意這層代誌。為著無欲tshiat人的意,我決定明仔透早,kā阮蹛佇佳里阿姊的名姓、地址交予厝主,請伊將蓮霧直接寄予阮阿姊。

──2009.8.22寫佇流目屎的土地


6.林邊心情

  這世人頭擺來林邊m̄是食海產、買蓮霧,是為著無情的Morakot害林邊淹水淹kah滿流直界。下晡3點半,欲離開服務2工的徛家彼時,我對主人講:向望後回到林邊是來tshit-thô,m̄好閣來救災。
  聽講這tah是林邊地勢上界低的所在。媽祖廟tú好砌佇邊仔,媽祖婆仔敢無鬥保庇?人講「亦tio̍h神、亦tio̍h人」,水災雖罔是天拍天tshiânn,大自然強猛的khùi力,m̄是任何人會當阻擋的,不而過,每擺天災地變所造tsiânn的破害1擺phīng 1擺閣khah傷重,敢講攏無半點人為的因素在內?
  媽祖廟邊iáu會當看著1間正身護龍的紅瓦厝。時代無情,這款古早厝現此時已經oh得見,頭擺參伊相會,suah看著伊的門口埕予1沿看無深底的路糊仔糜嵌牢牢,好佳哉有山貓thìng好來來回回1日車數十tsūa路糊仔糜,予紅瓦厝的門口埕ta̍uh-ta̍uh-á恢復伊原底的樣相。我想,設使你問駛山貓的ún-tsiàng到底ài閣幾工才清會離,減采伊會hàinn頭問天。
  佇林邊街仔,你會看著跤踏車、Oo-tóo-bái、Thoo-la-khuh、兵仔車佮各種運送人員、物資的車,來來去去潦過退袂離的垃圾水佮路糊仔糜,規工無歇。中晝食飯的時,坐佇農藥店隔壁鐵門thuah落來的店口,無幾分鐘就看見1台Oo-tóo-bái潦水熄火的畫面,苦主m̄知是欲哭抑欲笑?咱的雙跤lap佇路糊仔糜裡,這個時陣hūan勢才有法度體會受災戶的心情,咱的同理心mā佇這個時陣ta̍uh-ta̍uh-á ùi心肝底puh-ínn。
  向望後回來林邊thìng好看著鄉親喙笑目笑、身體康健無煩惱。

──2009.8.23寫佇流目屎的土地


7.World Vision

  昨暗12點kha-tau,佇網路看著台灣世界展望會嘉義辦事處需要鬥搬物資的志工。早起坐火車到嘉北站,行路到台斗街辦事處,iáu未8點半。其實,今仔日的任務是我這規禮拜做志工以來,上界輕可的1擺。Kan-nā佇嘉北街倉庫搬1寡米參其他物資,未到11點就kā所有空課做了。辦事處工作人員講過1暫阿里山的路若拍通,減采閣ài逐家上山鬥搬物資,我隨頭1個登記願意接受拍派空課。
  World Vision是世界展望會的英文名,這個名號我tsiânn佮意,我認為有「世界性的視野」。咱踏出家門做志工,無論去到佗位、做啥款代誌,敢m̄是需要培養家己這款「世界性的視野」?
  參台灣世界展望會結緣,是ùi幾冬前助養Bolivia的Rosa Isela(1998-)佮Guatemala的Sergio(2002-)開始。每個月只要台票700箍就thìng好幫助1位弱勢的囡仔,個人感覺是真值得做的事工。雖罔袂當佮囡仔見面,m̄過逐冬攏會收著台灣世界展望會寄來in的成長報告,內面有附in上新的相片,按呢我就感覺不止仔安慰。
  經過這7日參與Morakot風災志工的實地體驗,個人認為做志工m̄-nā付出,佇規個過程裡,事實上個人mā得著袂少友情佮經驗。救災有時有陣,志工這份榮譽是值得咱每1個人長久投入的志業。

──2009.8.25寫佇流目屎的土地

檢視次數: 191

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款