無通徛高山

[王立信]

無通徛高山

台灣人的心聲 阮逐工攏致意
嗑瓜子 看電視 遐是下班了後的代誌
嗯！ 浸嘛的天頂是有卡清氣 黑陰落雨有冬時
想起威權五十年 古物商的政府孤門閣獨市
戒嚴雞毛當令箭 戴帽仔盧鰻吃芭樂放槍子
二二八及美麗島只是鳥啪仔試手氣
親像乞丐趕廟公 嘴念阿彌陀 手夯剃頭刀

白色的統治 黑金政商勾結的代議 膨風的經濟貧富透拄天
貪官污吏滿滿是 國庫財庫通黨庫 親像灶神鎮灶空
撈百姓 飼政府 阮是吃昧肥嘛餓昧死
一塊一塊的大餅 親像天邊的月娘 放置八月十五的暗瞑
一盤一盤臭酸的牛肉冷支支 連退冰都猶退昧離

立法院的大哥甲大姐 冤家娘債 摔椅擋桌
掀肚擠 玩三p 申請有專利
上扣應 抹粉點胭脂 佇攝影鏡頭前 逐日咧拼生死
欲哮欲笑隨在伊 人古早是教忠教孝 因是教姦閣教哭
悲哀的選民 菜市仔腦智 一千五百 佗將民主一賣五十年
海外黑名單 台灣魂 為咱台灣母親暗暗塊吐喟

我槌心肝問家己 民主的花蕊 冬時則開愈美
咱著徹底來覺醒 瞑夢無了時 唔閣憂悶 放捨悲情
復原歷史真相 創傷可以原諒 失落的人情義理 用真心疼惜珍藏

目一下眨 又閣欲選舉 頭戴家己的天 腳踏番薯的土地
落實鄉土文化 認同母親台灣 趁這時 阿母的奶水香甘甜
嘸通不時一隻鳥啊號啾啾 孤單找無巢
卡唱嘛是孤女的願望 望你又早歸
啊 咱著打拼賭志氣 認真改革則愈出頭天

佇這時 阮目啁結微微 又擱專心看電視
灶腳傳來一聲雷 平地風波起
人啊 甭看遐有的無的 緊去捧碗夯箸
你是吃傷飽抑係閒閒無代誌
一庫凝槌槌