「正聲廣播電台」訪談李秀「一个走揣路草女子」的心聲

[李秀]

 

一、「正聲廣播電台」訪談李秀「一个走揣路草女子」的心聲

頻道：AM1395

單元：幸福糖果屋

主持人：陳雅嬿

時間：2011年5月15日(星期日)  晚間 6:30 至 7:00

 

http://www.10000.tw/?p=16347

 

二、聽台英雙語童詩「一欉小花蕊」新冊發表後, 請閣來聽李秀「一个走揣路草的女子」心聲：

     台語是毋是台灣的母語？事實上，現此時的台語是經過吸收平埔語、外來語、閩南語，幾百年來擠壓溶合後才變成目前的台語，所以台語當然是台灣的母語。其實「台語」毋是上嚴重的問題，相信會曉講台語的台灣人，差不多80%以上是看無、甚至毋知影有「台文」這種文體。

     我是一个永遠咧走揣路草的女子。細漢看田嬰，就想欲變做田嬰，隨時風騷佇草枝頂予人掠袂著；看湖中水鴨，就想欲變作水鴨自由佇水萍頂泅來泅去。生命的流水無時無刻咧走徙，到2001年心內就準備走揣退休後生命的方向，2002年搬去溫哥華，2009年投入台文創作。在寫作的路上，行到想用英文、台文來書寫的路口。目前的成績單：第一份是台英雙語童詩集「一欉小花蕊」，第二份是台英雙語散文集「一个走揣路草的女子」。

     對一个使用華語、講台語超過半世紀的人，想用「英文」創作，是一項大代誌。續落來，閣想用「台文」寫作，對一个完全受華語教育，雖然會曉講台語，但習慣使用將近二分之一世紀的華文作者，這愈是一項大挑戰！這款工課確實困難重重，但是寫作到這个坎站，加減有寡使命感：一來，用「英文」書寫佮翻譯，可以予世界較濟族群的人了解故鄉台灣；二來，蹛佇海外，用母語「台文」創作，親像位心肝窟仔，揣著故鄉的親切。

     講到翻譯，這幾年的經驗有誠深的感覺，假使欲作字参字、詞参詞、句参句的「對等」翻譯，是根本無可能的，因為英、漢兩種語法、習慣、文化背景、民族傳統，有誠大的差別。頭起先為著欲忠於原作，儘量照字面翻譯，但是發見西方人有時煞毋知眞正的意思。即馬有一个習慣，英文創作或者英譯了後，我會予英文是母語的作家朋友看一下才感覺妥當，畢竟英文毋是我的母語。

     2010年得著府城文學獎台文類、2011年得著高雄市台文類文學創作獎，遮台文佮英文的作品，毋是教人欲按怎精進出脫，它是一个普通女子，位高雄到澎湖，位台灣到溫哥華，透過日常生活的風景，寫出想法佮反映。親像一欉佇塵土中的小花蕊，咧走揣蝴蝶的路草，向望將移徒的旅途佮經驗分享予逐家。此後，對台灣的感情、對澎湖的數念，繼續會用我的筆來表達。

     現場朗讀現代詩、兒童詩、散文。背景音樂由音樂系副教授洪千富演奏小提琴。

 

   「聽到山海」台文戰線文學系列演講 時間: 2011年5月20日 20:00至21:00

                 地址: 高雄市中華五路789號3F (夢時代誠品書店)