賺食人哀歌

[王立信]

賺食人哀歌

.

阮無想欲閣辯解啦

秀才遇著兵 .有理講昧清

檢采態勢猶霧霧無明

人人攏自認係受害者

若嚥氣吞袂落 .凝心來憂鬱致病

汰討咧 .極不極

學習聖經中約瑟兮一生

“人的意思是歹；耶和華兮意思是好”

安呢就夠額啦

.

阮無想欲閣相諍啦

諍贏輸了尊重

諍輸開費情誼

現不打；頷頸仔筋大細箍

汰討咧 .極不極

隨順汝兮主裁 .相安等待

無定著遮是上主化妝兮祝福

.

阮無想欲閣抵抗啦

跤踏別人兮天

勢面狹擠佇風頭

君子爭千秋 .小人爭一時

汰討咧 .極不極

持定景遇好歹主賜定 .倒不如

心平靜氣 .好好交託

聽後聚集 .反轉兮報頭水湧

.

阮無想欲閣肖想啦

是汝的 .路尾定著走袂去

莫信人定勝天 .扭轉乾坤兮大話

若親像膨風兮刺鮭 .貓仔展虎威

汰討咧 .極不極

拍熄過貪兮欲望 .簡單過生活

耶穌講：清氣心肝兮人有福氣

.

賺食人嗎有捧人飯碗兮尊嚴

佳哉；賺食人佇禮拜日拼糞埽予耶穌

伊憐憫阮佇伊予槍扎兮胸脇兮血水中安歇

“得力在佇平靜安穩、得救在佇歸回安息”

佇伊翅股遮截保護下 阮徛在佇石磐頂

.

阮沾著尊嚴.自由.安息兮滋味…………….。

2010.8.4高雄

[高月員]

立信弟兄

願佇主內的
攏得平安

[王立信]

月員姐仔平安：
感謝回應鼓勵，憐憫人兮人有福氣，因為伊亦欲得著憐憫。