予國小台語教師的淡薄仔建議

[宋澤萊]

 

予國小台語教師的淡薄仔建議

──欲安怎寫作台語文章？

◎宋澤萊

103年度「本土語言文學創作徵文」補充教材組總評

 

今年度﹝103年﹞「本土語言文學創作徵文」補充教材組延續舊年，有真好的成績，甄選出9名得獎者，真濟文章攏得到評審的呵咾。

 

比如講，第一名〈○○○○○○〉，台語用字完全無問題，話語溜掠，文句清楚，真適合小學學生唸讀。第二名〈○○○〉對話真正呢活骨趣味，小學學生讀了，一定會笑未遂，是一篇更加適合學生唸讀的好文章。另外猶有一篇第二名的文章號做〈○○○○○○〉，這篇文章詳細寫出○○○○的來源、發展，是一篇小型的報導文學，真有內容，作者真肯用心，實在真予評審感心。其他猶有真濟篇攏真了不起。

 

雖是按呢，但是評審有幾個建議欲提供予未來參加徵文比賽的作者做參考：

 

第一：因為咱的徵文是為著提倡台文的寫作，所以作者最好嘸通先用北京語寫好文章，了後才閣改做台文。假使按呢做，道失去徵文的意義。咱大家既然是台語的老師，一定要學會曉直接用台語寫文章的本領，別人才未笑咱無才調。

 

第二：寫台文的時陣，要有台語日常生活講話的腔口，盡量予咱寫的佮﹝kah﹞咱講的接近。雖然有一寡北京語的語詞、文句真有意思，但是佇台語內底真罕得使用，這種語詞、文句咱道莫使用。特別是北京語專用的成語，最好避免使用。

 

第三：你的身軀邊一定要有一本台語字典或者是詞典，拄著未曉寫的字詞，隨時會當查考。

 

第四：電腦內面，有教育部規定落來的2、3千字的台語漢字，也有台羅拼音，你要會曉正確使用遮的教育部規定的台語字、音，才未予人感覺你烏亂寫。

 

第五：要定定去讀有名的台文作家所寫的詩、散文、小說，改善台文寫作的技術，嘸通想講我已經是台語老師道無必要閣去學台文寫作。咱要知影，講佮寫無完全共款，會講的人無一定道會寫，講佮寫是兩種技術，兩種藝術！

 

總是，寫台文佮講台語攏無簡單，咱要認真去學，一點一滴去改善缺點，夠最後定著會達夠一種美善的境界。

 

──2014、10、21