台文戰線聯盟

台美人二二八小說《The 228 Legacy 》紹介

感謝鄭良光先生紹介,我最近拄共一本台美人的二二八小說創作“The 228 Legacy”讀完,所以佇遮小可分享。

這本“The 228 Legacy”是台美人的生活史小說,是一本得獎的小說,作者Jennifer J. Chow是台美人新世代,書寫三代女主角的人生,反映台美人佇美國社會的生活挑戰,嘛有心理上佮台灣歷史文化的連接。小說是用怹佇美國社會的遭遇開展,篇幅無小,英文原文攏總有322頁。

這本小說主要是一家三代女性主角:

第一代(阿媽)Silk,出世佇台灣的日本殖民時代,嫁予一位優秀的化學研究者Lu,怹本底幸福的婚姻受著228破壞。彼時,優秀的Lu因為抗議KMT,予KMT盯著,最後失蹤,死佇228。事件了後,有身的Silk就離開台灣,來到美國加州生活。Silk有真長的時間毋願提起翁婿的身世,用恬靜面對悲劇的過去。伊一直佇葡萄園做空課,奉行身體勞動懸過學術的價值觀,堅強晟養查某囝大漢。

第二代(老母)Lisa,出世佇美國,有美國公民的身份,毋過伊自細漢經歷經濟低層的辛苦,閣有真長的時間完全毋知影老爸的過去,按呢,對伊的生長佮認同攏是真大的挑戰。伊生長佇嬉皮的年代,有過一段荒唐的往事,佇毋知影的情形下佮一位有家庭的浪子鬥陣,最後生落查某囝Abbey。佇小說內面,伊因為工作的關係熟似一位華人Jack,佮伊的互動形成台美人認同問題的內在議題。因為Jack的出現,嘛致使Silk共Lisa的老爸Lu的過去沓沓講予伊知影。

第三代主角是查某囡仔Abbey,佇故事進行的1980年彼時伊是12歲,佇學校成績真好,毋過嘛有伊的難題。一方面怹兜親像真看輕學校成績,一方面伊嘛受著人際關係的霸凌排斥,甚至為著得著友情,伊刁故意共考試放水寫毋著。用較下的成績得著友情的代價真大,伊受邀請去伊本底欣賞的有錢同學Ara怹兜參加家庭舞會,遇著予人下藥的事件,雖然最後逃出毒手,毋過Ara聯合所有同學講伊講白賊,甚至怹向校長陳情欲共Abbey趕出學校。Abbey搪著的事件是弱勢者遭遇壓迫的時欲按怎面對權力關係的「隱喻」,這佮伊的家庭內面的228身世遠遠呼應。同時,Abbey對身世內面的台灣文化佮歷史的態度,並伊的老母佮積極佮親近,伊時常利用機會欲對阿媽遐了解伊的阿公的過去。

小說的故事是透過這幾个主角佇1980年代的美國生活場景來進行,嘛佇故事內面沓沓仔走揣怹佮台灣母土的連接。對加州台美人的三代生活史,這本小說有真寶貴的記錄。另外,冊內面有大量的心理分析書寫,嘛會使講是心理療傷的書寫,面對過去的傷痕,作者強調用坦然的態度勇敢面對,來減輕所有掩崁造成閣較大的傷害。

當然,因為作者是台美人(應該是冊nih第三代這个世代)的身份,冊內面的歷史現實書寫無親像台灣作家遐呢直接,閣冊內面的認同議題佮台灣本身所面對的嘛有無仝,毋過,這拄拄是台灣讀者來讀這本冊所會使得著的趣味,嘛是引起咱會使互動思考的主要議題之一。

有興趣的朋友,會使佇遮購買這本小說,嘛有kindle的版本,加真方便:

http://www.amazon.com/228-Legacy-Jennifer-J-Chow/dp/1625530390/ref=...

檢視次數: 143

意見

您必須是成員才能發表評論!

加入 台文戰線聯盟

© 2017   Created by 胡長松.   管理小組

成員徽章  |  報告問題  |  服務條款