平常時愛寫小說佮散文,童詩毋捌想過欲寫。佇一个溫馨的黃昏,音樂家黃友棣教授,看著我綴兩个小乖乖,佇文化中心草場上嬉戲追逐,而且隨口哼唱著一寡外國的童謠,伊沉重按呢講:「你們這些文字工作者,該為下一代寫些童詩,不要老叫他們毫無選擇的接受外來東西。寫出來!我樂意為他們譜曲。」長者諄諄,聽者謹記在心。就按呢,我共家己完全投入毋單那是詩、嘛是童心的境界。
「童心是人類內心遙遠的故鄉。」貼切點出我創作童詩的心路過程。文學創作會當抒發理念佮情懷,不二過寫作兒童文學,愈會當將一个人的童心引導出來,親像共失落足久的寶物揣轉來身軀邊仝款。自按呢一片一片的雲彩、一朵一朵的花草、一點一點的雨滴…化作囝仔時眼眸中所看到的世界。尤其厝內我彼兩个學琴的小朋友,嘛予我真濟創作的靈感。
兒童是人生發展中一个重要的階段。怹的幻想、好奇、同情、想像… 差不多生活佇家己的天地內。事實上,兒童本身就是一部真好的文學。
譬如國小低年級的同學,若看會著仔、摸會著仔,攏有趣味,這是一種純真的直接反應。伊袂考慮其他方面的影響:親像風颱來矣,伊袂想著風颱帶來的災害,因為伊毋免上課,爸母毋免上班,閣再講風颱的刺激參新鮮,會當引起伊足大的剌激。
世界佇怹看來,人佮萬物攏是一家。伊看小星袂震動,嘛會使講是一群無聽話的嬰仔,予月娘老師罰踦佇天頂;雷公大概予雷兄弟惹生氣才會發赫大的脾氣;小雨點愛四界跳舞蹉跎,有的佇厝頂耍飛刀,有的跳到河內游泳、有的淋佇土跤佮花蕊姐仔談天說地…這款參天地萬物合一的情懷,真正是人生上美妙的時期。
高年級的同學,身心有足大的發展,求知慾增加,理智咧發育,獨立的個性慢慢形成。求知欲、正義感、愛冒險時常佇生活中流露。像「今仔日」、「空氣」、「阮咧彈琴」…等等,就是怹的縮影。
觀察童心變化,是寫作童詩上大的快樂!這本童詩集起初是用華語創作,其中十二首,黃友棣教授已經譜成曲,予兒童唱歌得著快樂是伊上大的向望。
華語版本有得著高雄市文藝獎童詩佳作,頒獎時陣嘛捌佇高雄文化中心予小朋友表演過。評審所講的「這些著作跳出前輩童詩作家的表現手法,具有獨特的創意。」現在經過十幾冬的歲月,我將它翻譯成英文。
續落來,閣予胡長松的「踏入臺文,世界會愈曠闊」的觀念影響。起先我有翻英文比翻臺文較簡單的感覺,真歹勢! 我是正港的臺灣人矣,那會使有這款想法。下定決心,當然嘛有臺文前輩如陳雷兄的鼓勵; 宋澤萊講「佇異鄉寫家已的母語,會當消除思鄉的痛苦」,這句話正中我的要害,尤其彼當時佇寒冷的感覺內,予我真大的溫暖。
另外我特別愛勞力澤萊兄,因為伊住的所在袂當買著好的字典, 所以叫長松兄佇高雄寄字典來溫哥華予我,我講郵費傷貴矣,等我轉去臺灣才講,長松講「佮作家的作品相比,郵費無要緊啦!」即馬我已經漸漸看著五彩的春光矣,毋單那臺文的代誌爾爾,閣有友情的感動。
這本臺英雙語童詩集有28首,向望會當予小朋友、大朋友帶來一寡驚奇,一寡共嗚,知影宇宙萬物之間,攏有值得逐家來品嘗的趣味。
您必須是成員才能發表評論!
加入 台文戰線聯盟