無欲tiām-tiām（用舌用筆來革命）
2009年12月25日，發起「08憲章」ê中國學者劉曉波，hō͘北京ê法院判處11年徒刑。面對世界各地對劉曉波ê聲援kap要求重視人權的聲音，北京政府當作無聽見。台灣政府安安靜靜，毋敢出半滴聲。
「08憲章」是受tio̍h三十外冬前年捷克ê民權運動「77憲章」所啟示。
1977年3月佇布拉格，春天ê花蕊才拄位凍kah硬硬硬ê土裡鑽出來，墓地ê拜堂內，一群人聚集紀念過身去ê哲學家楊‧帕托切卡（Jan Patočka 1907 – 1977），他是「77憲章」ê起草者kap發言人，受警察約談了ê隔日，死佇病院。來赴葬式ê人並無真濟。因為，他ê朋友若m̄是坐佇監—nih，就是佇自己ê厝內受軟禁。
當棺木扛出禮拜堂，人群慢慢行向掘好ê墓，安靜ê墓園四周圍，忽然充滿聲音：政府出動了直昇機，飛佇墓園頂，機器ê噪音蓋過墓邊ê演說者ê聲，紀念ê歌聲只有唱佇人ê心，唱袂入人ê耳空。官方ê媒體隨in ê意在記錄一位反抗者ê死。
1977年，離68年ê「布拉格之春」已經有九冬，離蘇俄ê戰車硬將詩歌tēⁿ死ê記憶漸漸褪色。濟濟人流亡佇國外。總是，留落來ê人繼續用舌用筆來革命。捷克一個充滿活力kap批判力ê音樂團體「宇宙塑膠人」（The Plastic People of the Universe）(我本人會譯作：宇宙thang塑造e5人民)e5音樂會被鎮壓，一時間，人民開始受氣，無法度koh忍受政治án-ni野霸對待文化kap藝術，帕托切卡、哈維爾（Vaclav Havel）、kap當過外交部長ê哈葉克（Jiří Hájek）共同發起「77憲章」。佇68年bat發表「2000字」文獻ê瓦久利克(Ludvic Vaculik)嘛用他真利ê筆，koh一擺參與佇人權運動，242位「文化界」ê人士簽名，強烈要求政府tio̍h重視人權、tio̍h釋放政治犯、解除對言論發表ê監視kap控制。Tsiah—ê「文化界」ê人，其實有濟濟人早就失去頭路，作品無法度出版，有ê去做顧門ê警衛，有ê是工廠ê小工。總是，in ê作品透過一款叫作Samisdat (地下獨立出版) ê方式，一疊一疊打字油印ê粗紙，暗中四界流傳。
共產政府對「77憲章」ê反應，是用掠人、監聽、跟蹤、免職、以及種種禁制來對付hia-ê在文件上簽名的人。七十歲ê帕托切卡，勇敢地擔任發言人的工作。
每一擺，一位佇威權壓迫ê下面敢講實話ê人引起注意，威權者就會用所有ê方法互他tiām去。
帕托切卡ê一生，就是一再失落講話ê所在ê人生，總是，一直到他死，他無欲tiām-tiām。德國統治捷克ê時，他用少年哲學家ê熱情，編輯反抗運動雜誌《捷克魂》(Ceska mysl)，為佇集中營受難的人發聲。佇共產主義時期，帕托切卡因為敢言，一擺koh一擺失去他教冊ê頭路，總是他無因為án-ni就無出聲。通過私人ê講課，透過寫作，他幼路koh清楚ê思想，養飼少年人ê心。彼ê時代，國家正式的出版品根本失去公信力，佇粗紙頂面，用打字機打出來ê Samisdat (地下獨立出版)，才有說服力。透過Samisdat，他詳細、嚴謹來討論捷克ê精神kap此個國家立國ê道德根基。「77憲章」是此款思考ê聲，微小，溫和，總是真有氣力。總是，此擺調查與控制ê系統，將此位老哲學家逼死—ah。
直昇機轉旋佇墓園ê，用響亮吵鬧ê聲，欲互一個運動e5聲tiām去。總是，耳空雖然聽袂到祈禱ê聲，人ê心內微聲5望，袂消失。12冬後，堅持ê盼望之聲koh成做大河，「77憲章」ê另外一位發言人哈維爾，成做一個民主時代ê總統。
有時咱想來真m̄-kam：佇混亂ê世局，無情ê壓迫下面，濟濟發光ê少年生命，互暴力來傷害；佇獨裁集權ê控制下面，濟濟利劍劍ê思考與真正嫷ê詩情，硬是hông逼到tiām去。
佇台灣，咱看著真濟被硬切斷ê生涯，由m̄願做日本殖民地ê人民，來流浪，死佇棉蘭ê府城進士許南英，到31歲就死在國民黨政府警察手中ê數學天才陳文成；位「苦悶ê台灣」到「自由時代」，即片土地一擺koh一擺損失火熱的活力，一擺koh一擺冷落來，佇威權與暴力前失去聲音。
總是，即馬，咱無袂互伊koh再冷去。咱無欲tiām-tiām。「台文戰線」是咱ê Samisdat，是咱ê獨立之聲，是暴力威權、金權虛華ê力袂當奪去ê，是咱自己ê聲。此個聲在聲援劉曉波先生，此個聲在關懷所有用舌與筆在做革命ê人。願咱堅持落去，等一葩一葩ê火互相結連，光與熱欲聚做強大ê氣力，創造新時代。
您必須是成員才能發表評論！
加入 台文戰線聯盟